1 A nana asibi Yesu te a bikiya alikama, yayagizi yi sua zi nyunwa su dure zabi worede su su saba alikama suku. 2 De Parisiyawa geni mbo de yayagizi Yesu sua yi, su gye yi nkye, <<Geni, yayagizi ke sua yi mbo de e man kyawu ba nana asibi!>>

3 E keleba su nkye, <<Ku karanta bo mina Dowuda yi a nana de e shi nja nsu oboki ANKI su yi de sua zi nyunwa? 4 E te a laki Mirikisi, e shi nja oboki tepiya yi su suku buredi de su la sa keteri, de doka yeda su de su suku ba, se pirisi na kede. 5 Ko ku karanta a siki doka Musa ba de nana asibi pirisi yaa yuru a siki laki Mirikisi su yi banza nnana asibi nzun yomu ema lepi ba? 6 Na gye ku nkye nsude pi laki Mirikisi e ma anya mu. 7 <Toseyi Naa mma bila, ba sedeka daba ba,> Nde ku shina mbo de kelima mu ma yi nupi, kwa taba geni lepi worede man lepi ba. 8 Yaa nsebeki e ma Obagizi asibi.>>

9 Yesu dege anya ni e yuru a siki kolonwa su, 10 nse minzi da nsu nani sharuwa anya ni. Sua bila anya de sua ka Yesu ni beta, su minya yi nkye, <<E yi kyawu de su worikye nsu suwo nana asibi?>>

11 Yesu gye su nkye, nde nse da ku e mani timshiya se e puari a siki romu a nana asibi, ka yuru de ki butu yi bo? 12 Nsebeki pi timshiya dereja soseyi! sobon yomu, doka amu pala nkye kede mu sua nse daa nto nana asibi ba.>>

13 Se e gye nseminji de nani yi sharuwa nkye, <<Munka nani ake.>> Se e munka nani yi dandani nani yi worikye. 14 Sede parisiyawa su te yi showura de su kisa Yesu.

15 De Yesu zi mbode su yi a kiya e yi, e dege ma yi bila anya ni; yowa ntani su biya yi, guru e worikye worede sua yi suwo. 16 E gila su kede su gye nseda kowaa ma e shi. 17 E pala yomuna sobon de e sika mbode Anebi Ishaya e pala:

18 <<Damu e shiya ma bunwa na de Ni zabi,

Nsude Na so, ni e shi na yi perisiki;

Na sa Aworo Na a kiya e yi, Yaa gye worede su shina Mirikisi ba shiriya na.

19 Yaa yi rikishi ko kuka ba;

Ba nsude yaa zi murinya yi a kiya turiki ba.

20 Kakala de bila watala yaa taba watala ba,

pitila nsu ayanki yaa taba bita ba.

yaa taba butu dishiya se gaskye shakiya

21 A siki seni e yi worede su ma Yawudawa ba sua sadishiya su nja shi.>>

22 Anya ni su zo ni makapi kuruma de yaa yi beta ba sobon e mani aworo mumungu. Yesu worikye yi, de e zi nja de e kwa yi beta. 23 Se guru ntani su yi mamanki ni mbode Yesu yi. <<Su nkye, e shiya ma Yaa ni Dowuda bo? 24 De parisiyawa zi mbo de Yesu e yi, su pala nkye, <<E kula arizeni sobon Bezabu tolense ni arizeni na bayi sori de e ma kula arizeni. 25 Yesu shina tunani dishiya asu, e pala nkye, <<Guru solota de yaa topula nja kiya yi yaa puari, nja kowoni geri ko gizi de laba bi yaa sigeba ba. 26 Nde obiri te topula nja kiya yi, e laba nki yi bi ema yi geba nja nki yi. Yaya na solota yi yaa sakisi? 27 Nja nde ku nkye Ni kula arizeni ni sori bezabu, ni sori waa ntani ku sua kula su te a woze? Yomu, Yaya kutiri ku sua Pala mumungu a kiya ku du. 28 Sede nde Ni kula arizeni ni sori Aworo Mirikisi, e nana nkye solota ni Mirikisi e zo anya ku aka

29 <<Ko jaja, ba nsu de yaa yuru a gizi nsu sori de e kwa yi mbo de e manshi ba, sede yaa para e domuna yi; tukuna yaa kwa yi keyi a gizi yi.

30 <<Du nsu de e ma nja ni ba; e ma yi geba nja ni, nja du nsu de yaa sua nto tala ba yaa zizila. 31 Sobon yomu na gye ku, guru lepi nja saba de ntani su yi sua yape su nshi; sede du nsude yi beta saba a kiya Aworo Mirikisi, Mirikisi yaa taba yape yi ba ko a kwanki mu ko nsu zo. 32 Du nsude yi beta ni nene a kiya yaa nsebeki sua yape yi, sede nsu de yi beta ni nene a kiya Aworo Nsuseki na yape yi ba, ko a kwanki mu ko a kwanki nsu zo.

33 Sa ntasi de yi kyawu yaa yi yaya kyakyawu, ntasi de yi kyawu ba, yaa yi yaya kyakyawu ba. Sua shina ntasi te anya Yaya de yapu. 34 Oku yaya ogbozi oku de ku ma mungu kwa pala mbo kyakyawu? dege mbo de e ma dishiya nse beki na baki yaa pala bo. 35 Nsu de e ma kyakyawu yaa beyi mbo kyakyawu butu a siki mbode e man shi a rigogo yi, nsude e ma mungu nsebeki mbo mumungu yaa butu a siki dishiya yi. 36 Sede Na gye ku a nana shiriya kowon nse yaa te pala guru mungu beta de e yi. 37 Kelima baki ke na sua yike shiriya, ko yaa butu ke ko yaa butu ke ba.>>

38 Se worede su su parisiyawa nja male kokoyi doka Musa su gye Yesu nkye. <<Male, mua bila de ki nana mu mbo mamanki dege anya ke.>>

39 Yesu keleba nkye, <<Mungu ntani kwanki mu nsu reshi yeda nja Mirikisi kwa bila geni mbo mamanki! Yesu gye su nkye. Sede ba mbo da ba sua nana ku nshi de pi mbo mamanki ni Anebi Yunusa de ku geni. 40 Ku geni yiri de Yunusa yi kwana wuku a siki totolo gunda, yomuna yaa nsebeki yaa yi nana wuku nja dederi wuku a siki ni kesa 41 Nana shiriya ntani Neneba sua dege sua geni lepi aku, sobon su juyi te anya Mirikisi kwanki de Yunusa e keyi su manki Obagizi; kuzukam nsu de e pi Yunusa aka anya mu. 42 Nana shiriya mata seleki Sheba ni kudu yaa dege yaa geni lepi ku; sobon de e butu a kesa e zo zi mbo kyakyawu de seleki Sulemanu yaa kokoyi; Na gye ku nse da ma anya mu de e pi seleki Sulemanu.

43 <<Kwanki de Mungu aworo te butu bila nse beki, yaa te bila anya de yaa te zunwa. Nde te samu ba. 44 Yaa gye kiya nkye, <Na kuma te a gizi na.> E te zo geni nse da man ba, anya ma sere, su gyala yi kyakyawu. 45 Yaa kuma te kwa yi mumungu aworo bokwe de su pi sori, sua te zunwa anya ni. Mbo de e paru nja nse ni yaa pi mbo de paru nshi a pari, yomuna yaa paru nja mungu ntani ni kwanki mu>>

46 De Yesu e ma siki beta Amaa e yi nja yayuwa yi su zo. Su sakisi a woze, sua bila de su yi beta nja Yesu. 47 Anya ni nse da a siki asu gye yi nkye, <<Geni, Amaa ke nja yayuwa ke su sakisi a woze, sua bila de su yi beta nja ke.>> 48 Yesu minya su nkye, <<Waa na e ma Amaa na? Nsu waa su ma yayuwa na?>> 49 Yesu munka nani te anya yayagizi yi, nkye, <<Da mu na ma Amaa naa na nja nsu yayuwa na. 50 Du nsu de yi mbo de Adaa na de ma siki bisi yaa bila e shiya ma, yayiwa na nja Amaa na.>>