1 Kwanki ni yayagizi Yesu zo anya e yi su minya yi, nkye, <<Waa ma tolense a solota gizi bisi?>>

2 Yesu sukwa yaa dende zo sakisi a sisika asu. 3 Yesu gye su nkye, Na gye ku gaskye, nde ku shenja man kankye yaya dende mu ba, kwa yuru a solota gizi bisi ba. 4 Sobon yomu guru nsude la kiya yi ma mbodaa ba kankye yaa dende, e shiya yaa ma tolense a solota gizi bisi. 5 Guru nsude keleba yaa dende piri mu sobon seni na eni E ka e keleba.

6 Sede guru nsude saa yaa dende daa a siki worede su yeda nja ni yi lepi, yaa pi yi kyawu de su domuna yi dunsi leda de su leyi kutiri ta siki andun totolo riki.

7 <<Gbotu durinya de sua sa ntani sua yi lepi! e ma dole na mbo de yaa sa lepi e zo, sede gbetuma ni nsude yaa sa de paru anya yi! 8 Nde nani ko seni ake yaa sa de ki yi lepi, yanka yi kutiri. E pi kyawu de ka yuru a gizi Mirikisi nja nani kputuru nja de ka yuru a gizi wuta ni dindindin . 9 Nde ndani ake yaa sakye de ka yi lepi, butu yi. E pi kyawu de ka yuru a gizi Mirikisi nja ndani daa, de ka yuru a siki wuta nja ndani bi.

10 Kone kede ku nene yaya dende worosu mu. Na gye ku meleku asu a siki bisi sua geni pisika Mirikisi adaa su kowon nana. 11 Yaa nsebeki zo na de e sila worede beta. 12 Mina ma tunani aku? Nde nsebeki mani timshiya deri, de daa a siki asu beeta, yaa bila teseyi ni tera de e te bila daa de beeta bo? 13 Nde e samu yi, Na gye ku gaskye, Yaa yi peri siki a kiya e yi pi teseyi ni tera worede su beta ba. 14 E ma yomu la nja Adaa a bisi yaa bila de kede yaa dende daa e beta ba.

15 Nde Yayiwa ake yike lepi, te de ki gye yi lepi yi. Sede e ma oku bi nja shi. Nde na e zi ke, ki kuman yayiwa ake zo anya ake. 16 Sede nde e zi ke ba, kuma de ki la nseda ko ntani bi de su te nja ke, Sobon de su ma sheeda ake, de guru beta de ka pala ntani bi ko wuku su ma ashina ake. 17 Nde e ki de e zi su, te de ki pala mbo de paru guru gye nsu biya Yesu; De ki gye yi, nde e zi beta ntani shoshi ba, bila yi ema kankye nsu biya boka nja nsu keleba gendu.

18 <<Na gye ku gaskye, guru mbo de ku yeda a durinya Mirikisi yeda nshi a bisi, mbode ku ki a durinya Mirikisi yaa ki a bisi.

19 <<Na sakye gye ku gaskye: Nde ntani bi yeda ni mbodaa a durinya de su yi lepa a kiya e yi, Adaa ku de e ma a siki bisi yaa yi ku nshi. 20 Guru anya de ntani bi ko wuku ma a siki e yi de su tala a siki seni na, Ni ma anya ni nja su.>>

21 Se Biturusu zo anya Yesu e minya yi nkye, <<Obagizi, senkwaa na yape yayiwa na lepi de yi ni? Sen bokwe?>>

22 Yesu keleba nkye, Sen bokwe aba, Sede sen bokwe bokwe sen Sebeyii,

23 <<Nkaa, solota ni bisi e ma kankye seleki de yaa bila kikiriga mbo nani e yi de e ma nja bunwa e yi. 24 De Seleki para kiriga mbo de e ma nshi, se su keyi bunwa e yi daa de keleba basi gyolo ni dupu gom anya e yi. 25 Tunde bunwa yi e man gyolo de yaa biya ba, seleki pala nkye su leyi, ni mata yi, ni yaya yi nja mbo de e manshi guru see de su biya gyolo de e keleba. 26 <<Se bunwa ni dunkye ni gunyam yi a geba seleki. <Yi ni akuri,> e pata yi, <Na biya mbo guru de ni keleba anya ke, kwanki de ni samu. 27 Seleki e zi toseyi yi, e yape yi guru mbo de e keleba anya bunwa yi se e bila yi te.

28 <<Se nseminji mu butu a woze, e geni yayiwa bunwa daa de sua yi ANKI gabada de keleba basi gyolo dinari deri anya yi dun e kuma nshi beyi ba. <E keyi wuya ariga nkye!> biya ni gyolo de ki keleba anyana.>

29 <<Yayiwa bunwa de sua yi ANKI gabada dudu dure agunyamu e yi e pata yi nkye, <Yankuri ma ke nja ni, Na ba ke gyolo de ni keleba anya ake guru.>

30 <<Sede bunwa ni ki. E keyi te kule a jaru, sede e biya yi guru bashi de keleba. 31 De worosu bunwa de sua yi ANKI gabada geni mbo de paru, su zi anwashi su te gye seleki mbo de paru guru.

32 <<De Seleki sukwa bunwa ni ta siki. <E gye yi nkye e ke mungu bunwa,> <Ni yape ke guru basi de ki keleba anyana, sobon de ki ologba ni nkye ni kadishiya. 33 Ashe e ke ma ka zi toseyi oboki ANKI ake nta yiride ni zi toseyi ake bo?> 34 A siki anwashi nsugizi e pala nkye su keyi te sa a jaru de Genbeki, se kwanki de e biya guru basi de e keleba.

35 <<Se Yesu gye su nkye, yomu na Adaa na de ma a siki bisi yaa yi nja ku guru sede ku yape lepi yayiwa aku dege siki dishiya aku.>>