1 <<Yesu gye su nkye solota gizi Mirikisi e ma kankye nsu gizi de e butu mbaki nsape yaa bila nsu worede sua yi yanki a bikiya ni ntasi inebi e yi. 2 E yeda de e biya su gyolo dinari ni yanki nana daa se e gye su de su te a bikiya e yi. 3 De keripi tera yi e butu e geni woron su sakisi abije mani yanki mbodaa ni yi ba. 4 E gye su nkye, <Oku ma Ku te yi ANKI a bikiya na, de ni biya ku mbo de ma dede.>

5 Se su te.

E kwa sakye butu beyi keripi gom sha bi nja keripi wuku e kwala worosu de su te yanki a bikiya yi. 6 De keripi biyari ni nyema yi e butu san worosu sakisi sua yi yanki mbodaa ba. E minya su nkye, <Mina na sa ku de ku sakisi anya mu nana da mani yanki mbodaa ni yi ba?>

7 Su keleba yi nkye. << <Sobon de nse daa la mu yanki ba,>

<<E gye su nkye, <Oku ma ku te de ku yi yanki a bikiya na.>

8 <<De nyema yi, nsu bikiya gye nsu de yaa kone bikiya e yi, <Sukwa nsu worede sua yi yanki de ki biya su gyolo asu, para nja nsu worede su zo a beyi kami de kaa baa nsu worede zo pari.>

9 <<Nsu ANKI de zo keripi biyari su zo guru su keleba gyolo ni ANKI asu. 10 De worede su la su zo ni pari, sua sa dishiya nkye sua keleba gyolo pi yomu. Sede guru asu su keleba kyakya. 11 De su keleba gyolo asu, su para mungu beta nja nsu bikiya. 12 Su nkye, <worede su zo a beyi su yi yanki ni keripi daa,> <Ki ba su gyolo kyakya nja mu de muma yi yanki a siki dimi de nana si mu,>

13 <<Sede e keleba da a siki asu, <Oboki na, Ni shushe ke ba. Ki yeda de ka yi yanki a kiya gyolo dinari daa na bo? 14 Keleba gyolo e ke de ki te. Na so de ni ba nsu worede ni la su a beyi nta yiri de ni ba ke. 15 E ni Ni man dama de na yi mbo kyakyawu ni gyolo na bo? Ko kaa zi anwashi na de ni man mbo nani nyowa?>

16 <<Sobon yomu ni karishe sua ma ni pari, ni pari sua ma ni karishe.>>

17 Se Kuzukam Yesu yaa bise te ni Wurishelima, e la yayagizi yi gom sha bi ta keteri e gye su nkye, 18 << Ku zi, Mua te a Wurishelima, sua la Yaa nsebeki ba toree ni pirisi nja male ni doka Musa. Sua sa yi de e muntu 19 sua leyi beyi ba nsu worede su shina Mirikisi ba, de su yi siya nja sua yi amberemu nja sua gidiri yi. Nana ni wuku yaa dege nleyi!>>

20 Amaa ni yaya Zabedi zo anya ni Yesu nja yaya e yi, e dunkye a kisi, yaa ologba yi nkye.

21 E minya nkye, <<Minana ka so?>>

<<Yeda de yaya na bi mu su zunwa daa a nani dama ake nja daa e zunwa a nani guni a gizi solota ake.>> 22 Yesu gye su nkye <<Ku shina mbo de kwa minya ba,>> . <<Kwa yi yaa sha Genbeki de na sha?>>

<<Su keleba nkye>> Mua yi yaa.

23 Yesu gye su nkye, <<Gaskye kwa yi yaa sha Genbeki, sede ku zunwa adama ko aguni na e ni na ni man nsu beyi ba. Adaa na ni bisi e shina yaa ba worede e gyala sobon osu.>> 24 De yayagizi e yi gom su zi mbo de pala, su zi anwashi nja yayiwa su bi worosu ni. 25 Se Yesu sukwa su guru anya daa kaka e pala nkye, <<Ku shina nkye toree ni nsu worede su shina Mirikisi ba ntani asu Genbeki, nja girima su. 26 Kede e ma yomu a sisika ku ba, guru nsu de yaa so e ma tolense a siki aku se dole e ma bunwa ni woron su, 27 Nja nsude yaa bila de ema ni pari dole ema bunwa aku, 28 nta yiri de Yaa nsebeki e zo de su yi bowuta naba, sede e shi e bowuta su, nja de beyi leyi yi amomoko ntani nyowa.>>

29 De Yesu nja yayagizi e yi sua bila Yeriko, ntani nyowa su biya yi. 30 Makapi ntani bi su zunwa a keteri turiki, de su zi nkye Yesu yaa bise, su sukwa Yesu nsori su ma nkye, <<Obagizi, Yaa ni Dowuda, ki zi toseyi amu!>>

31 Ntani nyowa su yi su rikishi su gye su nkye su yi shuru, sede su ja murinya nyowa, su ma nkye, <<Obagizi, Yaa ni Dowuda, ki zi toseyi amu!>>

32 Yesu sakisi sukwa su. <<Minana kwa bila de Ni yi ku nshi?>> Yesu minya su.

33 <<Su keleba nkye,>> Obagizi, <<Mua bilade mu sakye geni.>>

34 Yesu zi toseyi asu e kpa ndani asu. dandani ndani asu bure su ma geni se su biya Yesu.