1 De Yesu gama gye su guru mbo mu, se e gye yayagizi yi nkye, 2 <<Nta yiride ku shina, buki ni yenteri rigye nana bi de yaa bise, sua la Yaa nsebeki beyi de su gidiri yi.>>

3 Se tolense ni pirisi nja toree ntani su tala a kolonwa ni tolense ni pirisi, de seni yi ma Kayapa, 4 de su yi shewura de su ka Yesu a boyi de su kisa. 5 Sede su pala nkye, <<Ba a kwanki ni buki nkaa kede ntani su dege ni rikishi.>>

6 Too Yesu ma Betani a gizi ni nsu de sua sukwa yi nkye Sima de ma kputuru, 7 mase daa zo anya e yi ni tuni tularee nsu kemeshi de mani gyolo nyowa, kwanki de Yesu yaa si mbosi e la tularee nya Yesu e shi a kiya.

8 De yayagizi yi geni mbo de mase mu yi, su zi anwashi. Su minya Yesu nkye <<Mina sa de mase mu yaa bebeta tularee mu?>> 9 <<Yaa yi kyawu de su la tularee mu see ngyolo yowa de su laba gyolo ba potoruwa.>> 10 Yesu keleba su nkye, ku shina mbo mu, <<Mina sa de kwa dama mase mu? E yi ni mbo kyakyawu. 11 Potoruwa kwa ma nja su kowoni nana, sede e ni kwa geni ni kowon nana ba. 12 De e nya tularee mu nki na, yaa shiri pekye kwanki de sua bishina Ni. 13 Na gye ku gaskye, guru anya de sua keyi nabari kyakyawu mu te a siki durinya, mbode mase mu yi sua pala yi, de su turunwa nshi.>>

14 Se daa a siki gom sha bi, de sua sukwa yi nkye Yawuda Isikariyoti, te anya tolense pirisi 15 Yawuda minya su nkye, <<Mina kwa ba ni nde ni ka Yesu ba ku?>> Se su kiriga gyolo talatin butu beyi. 16 Dege kwanki ni Yawuda yaa bila turiki de yaa la Yesu ba su.

17 A nana ni pari buki ni buredi de mani darigeza ba, yayagizi Yesu zo anya e yi su minya yi nkye, <<Anga na ka so de mu shiriya ke mbosi ni buki nyenteri?>>

18 E keleba nkye, <<Ku te a siki totolo geri anya ni nseminji daa ku gye yi nkye, <Male nkye: kwanki e yi kusa. Yaa si mbosi ni buki nyenteri a gizi ake nja yayagizi yi.>>> 19 Yayagizi Yesu su yi yiride e pala gye su nkye su shiriya mbosi ni buki yenteri.

20 De nyema yi, Yesu zunwa de si mbosi nja yayagizi yi gom sha bi. 21 De sua si mbosi, e pala nkye, <<Na gye ku gaskye, daa a siki aku yaa butu ni a beyi.>>

22 Su da mu soseyi se sua minya nkyasu dan daa sua nkye, <<Ni shina e ni na ba, Obagizi?>>

23 Yesu keleba gye su nkye, <<Daa de sa nani a siki gongo mbosi nja ni e shiya yaa butu ni a beyi. 24 Yaa nsebeki yaa te ayiride e ma rubuta a kiya yi. Sede gbotu ni nsude yaa butu Yaa nsebeki a beyi! Yaa ma nkyawu de su yapu yi ba.>>

25 Se Yawuda, de yaa butu Yesu a beyi, nkye, <<Ni shina eni na ba, Male?>>

Yesu keleba gye yi nkye, <<Ee, eke na.>>

26 De sua si mbosi, Yesu la buredi, e gbede Mirikisi se e sua, e ba yayagizi e yi nkye, <<La de ku suku; nki na ka.>>

27 Se e la koshiya, e gbede Mirikisi se e la ba su, nkye, <<Ku sha a siki e yi, guru aku. 28 E shiya ma zini ni sabuwa ni anikowori, de nya sobon yowa ntani de yape lepi asu. 29 Na gye ku gaskye, Na sakye sha riki yaya ntasi mu gagaba dege kuzukam ta nana de na sha sabuwa nja ku a gizi ni Adaa na.>>

30 De su yi wonka yobo, su butu ta woze ni dunsi ntasi zetu.

31 Se Yesu gye su nkye, ndederi mu guru aku kwa yi gudu bila ni e ni dan daa na sobon mbode yaa paru nja ni, su rubuta yi nkye:

<< <Na dukwa nsu kiwo ni saa,

Se timshiya ni siki saa sua laba.>

32 <<Sede kwanki de su degeni a siki kumsha, Na rigye ku te Galili.>>

33 Biturusu pala nkye, <<Ko guru asu sua yi gudu sobon mbode yaa paru nja ke, E ni na yi gudu ba.>>

34 Yesu pala nkye, <<Na gye ke gaskye,>> <<Ndederi mu, kami de zakala yaa yi kala, kankye ki shina ni ba sen wuku.>>

35 Biturusu pala gye yi nkye, <<Ko sua ki sa ni nja ke, Na taba ki ke ba.>>

Guru yayagizi yi su yeda nja mbode Biturusu e pala.

36 Se Yesu nja yayagizi yi su te anya de sua sukwa yi nkye Gesemani, se e gye su nkye, <<Ku zunwa anya mu de Ni ta geba anya ni te yi lepa.>> 37 E la Biturusu nja yaya ni Zabedi bi te nja shi, se e para yi beki siki nja da mu. 38 Se Yesu pala gye su nkye, <<Beki siki ma dishiya naa zi kankye ni ma a baki muntu. Ku zunwa anya mu de ku sua ni nto lepa.>>

39 De e ja ta geba piri, e puari ripe ndani yi a kisi e yi lepa nkye, <<Adaa Na, nde e jima ke ki la yi koshiya ni Genbeki mu bila ni, sede e ma so Na aba, sede so ke.>> 40 De e kuma zo anya yayagizi yi e sa su sua yi kwana. <<E minya Biturusu nkye. Kwa yi yaa de ku zunwa lepa nja ni ba, ko ni keripi daa bo?>> 41 <<Ku kone nja de ku yi lepa sobon kede ku puari a siki ni gwada ba. Aworo e yeda sede nki seni.>>

42 E kuma te ni bi te yi lepa nkye, <<Adaa Na, nde yaa ma dole la de kala koshiya mu bilani ba sede Ni sha yi, ki yi mbode ka so.>>

43 De e kuma beyi, e sakye geni su sua yi kwana, sobon ndani asu yi loni. 44 Se e kwa bila su te yi lepa ni sen wuku, e kwa pala mbode e pala npari.

45 Se e kuma te ayan yayagizi yi e gye su nkye, <<Ku tuku Kwana ma ku kwa pushe? Geni, kwanki na e yi kusa, Yaa nsebeki sua butu yi a beyi de su la yi beyi a nani ntani nsu lepi. 46 Dege, de mu te! nsu butu ni a beyi yaa zo ka!>>

47 De e ma a siki beta, Yawuda, daa a siki ni yayagizi yi gom sha bi nja ntani yowa zo ni obalaba nja gwala, toree ni pirisi nja toree ni ntani su saka su. 48 Nsu butu ni a beyi ba su alama nkye: <<Nsude ku geni Ni runguma yi e shiya Ka ku ka yi.>> 49 Su te anya Yesu kwanki daa, Yoda nkye, <<Gesuwa, Male!>> Se e runguma yi.

50 Yesu gye yi nkye, <<Oboki na, yi mbode keyi ke zo.>>

Se ntani woroni ja zo a geba yi, su kpa Yesu se su keyi. 51 De su geni yomu, daa a siki worosu de sua biya Yesu kaa tokopi e yi, ja yi butu se e sala bunwa tolense ni pirisi, e butu yi kuni.

52 Yesu gye yi nkye, <<Saa obalaba ake a gizi e yi anyade e manshi,>> <<Guru nsu worosu de su yi anpani ni obalaba kisa nse sua muntu ni obalaba. 53 Yesu gye su nkye kede ku geni nkye Na yi yaa sukwa Adaa na, de saka manki ni meleku e yi de su pi keshi ni shoja gom sha bi de sua sa ni nani bo? 54 Sede yaya na mbode su rubuta a siki takada Mirikisi yaa sika ema dole na e paru yomu?>>

55 A kwanki ni Yesu gye yowa ntani nkye, <<Ku butu zo anya Na ni obalaba nja gwala kankye nsu de yaa ki biya doka, Ni zunwa kokoyi ku a siki gizi Mirikisi, kuka ni ba. 56 Sede guru mbo mu yaa paru de beta de anebi rubuta a siki takada Mirikisi e sika.>> Se guru yayagizi yi su bila yi te ma su ngudu.

57 Nsu worede kaa Yesu su keyi ta ayan Kayapa, tolense ni pirisi, anya de male ni doka Musa nja toree su gom. 58 Sede Biturusu biya yi ni nyisa, e te a siki kolonwa tolense ni pirisi. E yuru te zunwa nja nsu yaa kone de e geni mbode yaa paru nja Yesu. 59 Se tolense ni pirisi nja guru salaki, sua bila turiki de sua ka Yesu nlepi daa de yaa sa de su kisa yi. 60 Sede su samu lepi mbo daa a kiya e yi ba, sede ntani nsu sheeda yaruwa nyowa su zo a geba.

A karishe ntani bi butu zo a geba 61 su nkye, <<Nse mu pala nkye, <Yaa yi yaa jiru laki Mirikisi ni Mirikisi de e sakye gina yi nana wuku.>>>

62 Se tolense ni pirisi dege sakisi a bisi gye Yesu nkye, <<Ka keleba bo? Mina ma sheeda de menza worosu mu sua beyi a kiya ke?>> 63 Sede Yesu ma ma yi shuru.

Tolense ni pirisi gye yi nkye, <<Ni gama ke ni Mirikisi nsu leyi: Gye mu ko e ke na ki ma kiristi, Yaa ni Mirikisi.>>

64 Yesu gye yi nkye. <<Ee, e ma ma yi yomu yiri de ki pala.>> <<Sede Na gye guru aku: ta geba kwa geni Yaa nsebeki zunwa a nani dama Mirikisi ni sori yaa zo a siki gidagida ni bisi!>>

65 Se tolense ni pirisi saga riga e yi ni basi leyi nkye, <<E yi beta saba! Mina sa de mua bila sheeda daa jaja? Geni, ku zi saba Mirikisi de pala. 66 Mina ma tunani ku?>>

Su keleba nkye. <<E deta de e muntu,>>

67 Se su nya yi anyanya a pisika yi su dudu kwa yi. Worosu mari yi 68 su nkye, <<Yi mu beta, nde eke na ki ma Kiristi. Gye mu waa dukwa ke?>>

69 Kuzukam Biturusu zunwa a papada gizi, se bunwa mase daa zo anya e yi. E pala nkye, <<Eke ma ki ma nja Yesu ni Galiliya na bo?,>>

70 Sede e yi musu anya su guru nkye. <<Ni shina mbode kwa yi beta a kiya e yi ba,>>

71 Se Biturusu butu kopa a kolonwa te woze, anya ni yaa mase daa kwa geni yi e gye ntani de su ma anya ni nkye, <<Nse mu e ma nja Yesu ni Nazare.>>

72 Biturusu sakye ki Yesu jaja, ni melese nkye: <<Ni shina nseminji mu ba!>>

73 A beyi piri, worede sakisi anya ni te anya Biturusu su gye yi nkye, <<Gaskye ki ma daa a siki asu, beta ake pelesa ke.>>

74 Se Biturusu para basi kiya yi se e melese ba su nkye, <<Ni shina nseminji mu ba!>>

Anya ni zakala yi kala. 75 Se Biturusu turunwa beta de Yesu pala gye yi: <<Kami de zakala yaa yi kala, ka ki ni sen wuku.>> Se e butu ta woze te yi kuka nsu sori.