1 A beyi de Yesu gama ba yayagizi yi gom sha bi doka, e sigeba ni kokoyi nja beyi manki a siki geri ni Galili. 2 De Yaaya nsu tunkwasa zi a jaru mbo de kiristi yaa yi, e saka yayagizi yi te anya Yesu. 3 De su minya yi, <<E ke na ki ma nsu de yaa zo, ko mu sa ndani pekye nse daa?>> 4 Yesu keleba nkye, <<Ku kuma mbayi ku te gye Yaaya mbo de ku zi nja mbode ku geni: 5 Makapi sua geni, Gurugu sua yi tepiya, worede su ma kputuru sua samu worikye, Kuruma sua zi kuni, worede de muntu sua dege nleyi, nabari manki kyakyawu su gye potoruwa. 6 Nsu anabirika la worede de su zi shaka na a dishiya su ba!>>

7 De yayagizi Yaaya kuma beyi, Yesu para beta gye yowa ntani a kiya Yaaya: <<Mina ku te adenka de ku te geni? Akusuka de yaa wula sanwa a denka? 8 Minana ku ta a woze de ku geni? nseminji de sa keikei yi kyakyawu la? E ma yomu ba worede sa yiride keikei yi kyakyawu su ma kolonwa seleki la. 9 Se mina ku te a woze de ku geni Anebi la? Ee, Na gye ku, e pi Anebi. 10 Da mu e shiya ma nsude su yi rubutu a kiya e yi nkye:

<<<Na saka yamanki na a geba ke,

de gyala turiki ke kami de ki zo.>

11 Na gye ku gaskye: A siki guru worede mata yapu su nse da ma totolo kankye Yaaya nsu tunkwasa ba; kuzukam nsu de e ma dende a solota siki bisi e pi Yaaya. 12 Dege kwanki Yaaya nsu yi tunkwasa zo a kuzukam, solota siki gizi bisi ma Genbeki nsu sori topula sua leyi nsori. 13 Guru anebi nja doka ni Musa su yi beta a kiya Yaaya. 14 Nde ku yeda de kwa keleba yi, e shiya ma Iliya, de yaa zo. 15 Nsu de man kuni zi e zi.

16 <<Kuzukam, ni mina na ma gonta ntani kukuzum? Su ma kankye yaya dende de su zuzunwa a baki bize sua sukwa nki asu.

17 <<<Mu wula ku tapire

ku ki de ku yi wasa;

Mu yi ku wonka muntu ku ki ku yi kuka.>

18 De Yaaya zo e yi azimi e sha ba, e si ba su pala nkye, <E mani Mumungu aworo a siki e yi.> 19 De Yaa nsebeki zo yaa si yaa sha, guru ntani su nkye, su yowa si nja sha, oboki nsu keleba gendu, nja nsu yi <<Lepi,>>> Sede nzun yomu su ma nana simi Mirikisi, nana ema gaskye te anya ni ANKI e yi.>>

20 Se Yesu para kwabe totore geri de e yi ANKI mamanki a siki yi sobon su ki juyi bila mbo mumungu sua yi ba. 21 <<Gbotuma aku, Korasin! Gbotuma aku, Beseda! Nde mbo mamanki de su yi a siki aku su yi a geri Taya nja Sidon, nde sua juyi te anya Mirikisi su saa keyi sasa nja busi nki su. 22 Sede Na gye ku, gaskye yaa pi zi toseyi Taya nja Sidon nja de yaa zi toseyi ku a nana shiriya Mirikisi. 23 Oku, ntani Kapanawu, kwa geni kankye kwala nkyaku te a bisi? Yi, Sua la ke kutiri te anya zunwa nsu muntu. Nde mbo mamanki de su yi a siki ake sua yi a kesa Sodoma, de ari kuzukam sua juru yi ni wuta ba. 24 Sede Na gye ku nana de Mirikisi yaa yi shiriya, yaa pi zi toseyi ntani kesa Sodoma pi ku.>>

25 A kwanki ni Yesu pala nkye, Mma yobo ke, Adaa, Mirikisi m nja kisi, Ni gbede ni ke sobon mbo de ki boyi anya worede de suman simi nja nsu shina, ki pelesa ba yaya dende. 26 Ee, Adaa, da mu e shiya ma mbo kyakyawu de ki yi. 27 <<Guru mbo mu Adaa ba ni su. Nse daa shina Yaa ba se Adaa kede na shina yi, yomuna nse daa shina Adaa ba se Yaa nja worede jima Ya yaa pelesa Adaa ba su.

28 <<Ku zo anya naa, guru ku de ku gezi ni loni ka yi, na ba ku pushe. 29 Ku la ganse na sa a wuya ku de ku kokoyi anya na, sobon Ni ma din nja soki dishiya, Anya ni kwa samu pushe a siki leyi aku. 30 Sobon ganse na e man soki la nja kemeshi, yi de na ba ku e man loni ba.>>