1 Yesu nyunwa kwanto de e bise te a geri yi kapanawu. 2 Worosu su ntani keyi nsude nki yi sharuwa zo nshi, kwakwana a kalanga. De Yesu geni beigaskye asu e gye nsude nki yi sharuwa nkye, <<kadishiya, Yaa, su yape lepi ake.>>

3 Male ni kokoyi doka Musa gye nkyasu nkye, <<Nseminji mu yaa saba Mirikisi!>> 4 Anya ni Yesu shina mbode sua tunani dishiya asu, e minya su nkye, <<Mina sa de kwa shiriya mungu mbo a dishiya oku? 5 Wona pi soki: de su nkye, <Lepi ke su yape,> Ko su nkye, <Dege a bisi de ki yi tepiya>? 6 Sede na bila de ku shina nkye Yaa nsebeki e man yiko a durinya mu de yape lepi.>> Se e gye nsu nki sharuwa, <<Nkye dege a bisi, la kalanga ake de ki te a gizi.>> 7 Se nseminji nsu nki sharuwa dege a bisi te a gizi. 8 De ntani geni mbo de e paru, su zi womba, se su yobo Mirikisi de e ba nsebeki sori.

9 De Yesu bila anya ni, e geni nseminji daa sua sukwa yi nkye Matiyu e zunwa kingbolo keleba gendu, e gye yi nkye, <<biya ni,>> Matiyu dege biya yi.

10 De Yesu yaa si mbosi a gizi Matiyu, yowa nsu keleba gendu nja <<Nsu lepi>> Su zo si mbosi nja shi nja yayagizi yi. 11 De ntani Parisiyawa su geni, su minya yayagizi Yesu nkye, <<Mina sa de male aku yaa si mbosi nja nsu keleba gendu nja nsu <lepi>?>>

12 De Yesu zi yomu keleba nkye, <<Nsude mani lapiya yabila Nsu Mengeni ba, nsu de yaa yi suwo e shiya yaa te Anya Nsu Mengeni bo. 13 Sede ku te minya mbo de beta Mirikisi pala: <Toseyi Na na so, ba sedeka zini nama na ma bila ba.> Sobon Ni zo de ni sukwa nsu worede yi mbo gangasi aba, sede nsu lepi.>>

14 Se yayagizi Yaaya nsu tunkwasa su zo anya Yesu, su minya yi nkye, <<Mina sa omu nja parisiyawa mua yi azimi, sede yayagizi ake sua yi azimi ba?>>

15 Yesu keleba su nkye, <<Mina sa de oboki ango sua yi beki siki a buki tunde e ma nja su? Kwanki yaa zo de sua la ango bila su; kwanki ni sua yi azimi.

16 <<Ba nseda de yaa yi pashi keyi wuri nja sabuwa keyi, anya de e dumki yaa saga, saga ni yaa pi ni pari mungu. 17 Ba nsude yaa la riki ni Inebi sabuwa nya siki gwala de ma wuri. Nde su la nya gwala, gwala yaa wokye, riki inebi yaa nya kisi sua yi asara gwala. Momoko yomu riki inebi sabuwa su nya a sabuwa gwala yomuna, sua lesa riki inebi ko gwala ba.>>

18 De Yesu ma siki gye su mbo mu, tolense ni kolonwa daa zo dunkye a geba e yi, yaa ologba Yesu nkye, <<Yaa na ni mase muntu kuzukam zo de ki sa nani ke a kiya e yi, de ema leyi.>> 19 Yesu nja yayagizi yi su dege a bisi te nja shi.

20 De Yesu ma a kiya tepiya mase daa de yi shekera gom sha bi yaa nya zini e biya a beyi zo kpa Yesu a baki riga. 21 E pala a dishiya e yi nkye, <<Nde ni kpa riga yi kede na worikye.>>

22 Yesu juyi se geni yi nkye. <<Yaa na ni mase,>> Kadishiya, <<beigaskye ke sakye worikye.>> Dandani mase ni worikye dege nya zini yi.

23 De Yesu ta a gizi tolense ni kolonwa e sa ni nsu wula tapire muntu nja ntani yowa sua yi kuruwa, 24 Yesu gye su nkye, <<Ku butu te woze. Yaa mase mu muntu ba yaa yi kwana la.>> Guru asu su yi Yesu dala ni nene. 25 A beyi de Yesu butu ntani guru de su te woze, e te a siki laki e la yaa mase a nani, se yaa mase dege a bisi. 26 Nabari mbo mu gyowe te guru gunduma ni.

27 De Yesu bila anya ni, e ma siki tepiya makapi bi sua biya e yi, Sua yi kuruwa nkye, <<Zi toseyi mu, Yaa ni Dowuda!>>

28 De Yesu te siki gizi daa, makapi bi zo anya e yi, <<E minya su, ku yeda e ni Na yaa worikye ku?>>

<<Su keleba yi, ee, Obagizi mu yeda.>>

29 Se Yesu kpa ndani asu e pala nkye, <<E paru nja ku yiride ku beigaskye>>; 30 Se ndani asu bure. Yesu gye su nkye, <<Kede ku gye nseda ba.>> 31 Sede su te a woze te beyi nabari gyowe gunduma ni guru.

32 De sua te woze, nseminji daa de mani mungu aworo eya yi beta ba su keyi zo anya ni Yesu. 33 De arizeni butu bila nseminji de eya yi beta ba, e para beta. Ntani yowa su zi mamanki su pala nkye, <<Mu taba geni mbodaa yomu a siki Izireyila ba.>>

34 Sede ntani parisiyawa su pala nkye, <<Tolense ni arizeni e shiya ba Yesu sori de yaa butu arizeni.>>

35 Yesu te gyowe guru totolo geri nja dende, kokoyi su a siki kolonwa, e keyi su manki kyakyawu ni solota nja worikye kowoni suwuta nja suwo. 36 De Yesu geni yowa ntani, e zi toseyi asu, sobon de su ma a siki Genbeki siki nja su ma nsude yaa sua su nto ba, kankye timshiya de su beeta. 37 Se e gye yayagizi yi, <<Nkye ANKI e yi yowa nsu ANKI su yi yowa ba. 38 Sobon yomu ku yi lepa de Obagizi nsu ANKI saka nsu yi ANKI a bikiya yi.>>