1 A beyi kwana shida Yesu la Biturusu, Yakubu nja Yaaya yayiwa ni Yakubu, E sa su nyunwa kiya dunsi nkyasu. 2 Su ma anya ni nki Yesu shenja a geba asu. Pisika yi, yi asikye kankye nana, riga yi ma peri kankye asikye. 3 Dandani se su geni Musa nja Iliya, sua yi beta nja Yesu.

4 Biturusu gye Yesu nkye, <<Obagizi, e yi kyawu de mu ma anya mu. Nde Ki yeda, Na yi rugwa wuku anya mu, da ma Na ke, da ma ni Musa, da ma ni Iliya.>>

5 De e ma kiya beta, gidagida zo ripe su, murinya beta butu a siki a gidagida nkye, <<Da mu e shiya ma Yaa Na, de Ni mma so. Ku zi mbo de yaa gye ku!>> 6 De yayagizi e yi su zi yomu, su yi womba, su saa ndani asu a kisi. 7 Yesu zo kpa su. <<Nkye ku dege,>> <<Kede ku zi womba ba.>> 8 De su dege a bisi, su geni nse daa anya ni ba se Yesu.

9 De su ma sonka bila kiya dunsi, Yesu ba yayagizi e yi doka nkye, <<Kede su gye nse da mbo de su geni ba! Se kwanki de su dege Yaa nsebeki a siki kumsha.>>

10 Yayagizi e yi su minya yi nkye, <<Mina sa de male ni doka Musa su pala nkye e ma dole na Iliya e zo npari.?>>

11 Yesu keleba nkye, <<E ma yomu la Iliya yaa zo npari de gyala mbo guru. 12 Sede Na gye ku, Iliya e zo ntani shina yi ba, sobon yomu su yi mbo de sua so. Yomu na sua yi nja Yaa nsebeki.>> 13 Se yayagizi e yi su shina nkye yaa yi beta nja su a kiya Yaaya nsu tunkwasa.

14 De su kuma te anya de ntani yi yowa, nseminji daa zo ayan Yesu, e dure a geba e yi. 15 E pala nkye, <<Obagizi, Ki zi toseyi yaa na! Sobon e man suwo okpinkpi kon kwanki yaa sa yi puari a siki wuta nja riki. 16 Ni keyi zo anya yayagizi ake, su yi yaa worikye yi ba.>>

17 Yesu keleba, <<Yi oku de ku ki beigaskye nja mungu ntani! Ari woshe Na ma nja ku? Ari woshe Na yi takuwa nja ku? ka yi Yaa ni zo anya mu!>> 18 Yesu kwabe arizeni nkye butu! E butu bila yaa ni, dandani yaa ni worikye.

19 Se yayagizi Yesu zo anya e yi a boyi su minya yi, <<Mina sa de omu mu yi yaa kula arizeni butu ba?>>

20 Yesu gye su nkye, <<Sobon ku man beigaskye piri, Na gye ku gaskye, nde ku man beigaskye piri kankye saba mosta, kwa gye ogbo mu nkye, <Dege anya mu de ki te anya ni> Yaa dege te. Ba mbode yaa pi sori aku ba.>> 21 Yiri arizeni mu yaa butu ba se ku yi azimi nja lepa.>>

22 De Yesu nja yayagizi yi guru su zo gabada a Galili, Yesu pala gye su nkye, <<Sua butu Yaa nsebeki a beyi sua la yi beyi a nani ntani. 23 Sua kisa yi, a beyi kwana wuku Yaa dege nleyi.>> Yayagizi yi su yi beki siki.

24 De Yesu nja yayagizi yi zo Akapanawu, worede sua keleba gendu a siki gizi Mirikisi su zo minya Biturusu nkye, << Male aku yaa biya gendu gizi Mirikisi bo?>>

25 Biturusu keleba nkye. <<Ee, yaa biya,>>

De Biturusu yuru a siki gizi, Yesu na para yi beta, <<E minya nkye Biturusu, mina ki geni?>> <<Anya waa seleki durinya sua keleba gendu, anya ntani asu ko yaya bakwe?>>

26 <<Biturusu keleba nkye!>> Anya worosu su.

<<Se Yesu gye yi nkye, yaya asu sua biya ba. 27 Sede kede mu yi ntani mu lepi ba. Te atotolo riki de kisa akurigya ake. Gunda de ki ka ni pari, bure baki yi ka geni toro daa, la de ki biya gendu Na nja na ku.>>