1 De Yesu nja yayagizi e yi su kusa nja Wurishelima su keyi Betapaji a ntasi ni Zetu, Yesu saka yayagizi e yi bi, 2 Yesu gye su nkye, <<Ku te a geri dende de ma a geba aku, anya ni kwa geni janki domuna nja yaa a keteri e yi. Ku konse su de ku ka yi ni nshi. 3 Nde nse daa yi ku beta, ku gye yi nkye Obagizi yaa so su, yaa saka nja shi anjima.>>

4 Mbo mu paru de e sika beta de pala a baki ni Anebi:

5 <<Gye yaya mata ni Siyona,

<Geni, seleki aku yaa zo anya ku,

<<Nsu dishiya din, yaa yi tepiya a kiya janki,

a kiya dende ni janki na yaa yi tepiya.>>

6 Yayagizi e yi su te yi yiride de Yesu ba su doka nkye su yi. 7 Su ka yi janki nja dende e yi zo, susa su keyi asu, Yesu e zunwa a kiya asu. 8 Ntani nyowa su tona keikei asu a turiki, woron su watala yaya nani ntasi gima tona a turiki. 9 Ntani de su ma a geba e yi nja worede sua biya yi a beyi su yi kuruwa nkye, <<Osana te ni Yaa Dowuda!>> <<Anabirika ma nja yaa ni nsu de zo a seni ni Obagizi!>> <<Osana ma nja nsude pi girima!>>

10 De Yesu yuru a Wurishelima, Guru totolo geri su nyanji su minya nkye, <<Da mu ma waa?>> 11 Yowa ntani keleba, <<E ma Yesu, Anebi butu a Nazare ni Galili.>>

12 De Yesu yuru anya gizi Mirikisi e kula guru nsu worede sua see keyi nja nsu worede sua la keyi see nja nsu see keyi anya ni butu a woze. E juyi kingbolo ni nsu beyi gyolo ni riba nja bensi ni nsu sa yi ni tatambiri. 13 <<E gye su nkye,>> Su rubuta yi a siki takada doka, << <Gizi na sua sukwa yi nkye gizi lepa,> Se mala yi yi de ma <Gizi nsu bolowa.> >>

14 Ntani makapi nja gurugu zo anya yi a gizi Mirikisi, e worikye su. 15 Sede totolo ni pirisi nja male ni doka geni mbo mamanki de Yesu e yi yaya dende sua yi kuruwa anya ni gizi Mirikisi, <<Osana ma Yaa ni Dowuda,>> su zi anwashi.

16 <<Ki zi mbo de yaya dende mu sua pala?>> Su minya Yesu.

Yesu keleba nkye, <<EE>> Ki taba karanta takada Mirikisi bo?

<<<A baki ni yaya nja yaya dende

yaa sa de ki yobo Mirikisi.

17 Anya ni e bila su e butu bila totolo geri ni ta Betani, anya de e kwana.

18 Mbaki nsape, de e ma turiki ni kuma ta totolo geri, e zi nyunwa. 19 E geni ntasi bori sakisi a keteri turiki, e te anya e yi sede e samu yaya a siki e yi ba se genya. Se e gye ntasi bori nkye, <<Ka sakye yi yaya gagaba!>> Dandani ntasi bori kyekeri.

20 De yayagizi e yi su geni mbo de paru, su yi mamanki. Su minya Yesu.<<Mina sa de ntasi bori kyekeri seberi yomu?>>

21 Yesu keleba gye su nkye, <<Na gye ku gaskye, nde ku beigaskye de ku laba dishiya bi ba, mbo de paru ni ntasi bori mu kina kwa yi ba, sede kwa gye totolo dunsi, <Te, gizi nkye ake a siki totolo riki,> Yaa kwa zi ku. 22 Nde ku beigaskye, kwa keleba guru mbo de ki minya a siki ni lepa.>>

23 De Yesu yuru a siki gizi Mirikisi, de, yaa kokoyi, tolense pirisi nja toree ni ntani zo anya yi. <<Woni sori na ka yi mbo mu nja shi?>> Su minya yi. <<Kuma waa ba ke sori mu?>>

24 Yesu keleba su, <<Eni ma na minya ku beta daa. Nde ku keleba ni, E ni ma Na gye ku woni sori Ni ma yi mbo mu nja shi. 25 Yaaya nsu yi tunkwasa butu angana zo? E butu a bisi ko anya nse beki la?>>

Su yi musu nja nkyasu nkye, <<Nde mu nkye, <E butu a bisi,> Yaa minya, <Mina sa de mu yeda nja shi ba?> 26 Sede nde mu nkye, <Dege anya nsebeki> Mua zi womba ni ntani, nkaa guru su shina Yaaya e ma anebi la.>>

27 Se su keleba Yesu, <<Mu shina ba.>>

Se Nkye, <<Eni ma Na gye ku sori dawa na yi mbo mu nja shi ba.>>

28 <<Se Yesu gye toree Parisiyawa nkye mina ma tunani aku? Nseminji daa man yaya bi. E te anya ni pari nkye, <Yaa naa ta bikiya yawu de ki te yi ANKI.>

29 Yaa ni pari keleba nkye, <<<Na te ba,> Sede karishe e shenja dishiya e yi e te.

30 <<Se Adaa su te anya ni yaa ni bi e gye yi mbo de e pala gye yaa ni pari. E keleba, <Na te, Adaa,> Sede e te ba.

31 <<Waa a siki yaya bi worosu mu yi mbo de Adaa asu yaa so?>>

Su keleba nkye, <<Ni pari>>

Yesu gye su nkye, <<Na gye ku gaskye, nsu keleba gendu nja ki laki sua rigye ku yuru a gizi Mirikisi. 32 Bila ngye ku, Yaaya zo de e nana ku turiki gangasi, ku yeda nja shi ba, sede nsu keleba gendu nja ki laki su keleba Yi. De ku geni mbo mu ku shenja dishiya de ku yeda nja Mirikisi ba.

33 <<Ku zi kokongye da jaja: nse daa de man bikiya e nunkwa saba ntasi inebi. E yi golonwa gyowe yi, E yanka anya de sua tapi riki yaya ntasi inebi e gina laki nsu de yaa kone bikiya e yi. Se e la bikiya yi ba worosu nsu yi bikiya se e te ma yi atepiya. 34 De kwanki yanki bikiya yi, e saka bunwa e yi manki anya nsu worosu de keleba bikiya e yi ni aya de su beyi yaya ntasi.

35 <<Nsu worede keleba bikiya anya yi su ka bunwa yi woroni; su doka nse daa, su kisa nse daa, su kutiri worosu su dunsi ari su muntu. 36 Se e saka worosu su bunwa de su pi ni pari, su yi su yiri mbode su yi nsu pari. 37 Ni karishe, e saka yaa yi anya su. <E pala nkye,> Sua ba yaa na girima.

38 <<Sede nsu keleba bikiya aya su geni yaa yi, su gyen nkyasu, <To nsu de yaa si gado bikiya aka. Ku zo de mu kisa yi de mu la gado mu maana mu.> 39 Se su leyi kutiri a beyi golonwa ni bikiya ntasi su kisa yi.

40 <<Too, nde nsu bikiya zo, mina yaa yi nja nsu worede keleba aya ni bikiya e yi?>>

41 <<Su gye yi nkye, yaa kwa yi mungu ate kisa de e geni mungu asu,>> <<Yaala bikiya e yi ba woron nsu aya, de sua beyi na yi kwanki de sua yi yanki mbo su nyunkwa a bikiya e yi.>>

42 Yesu gye su nkye, <<Ku taba karanta takada beta Mirikisi bo?

<<<Dunsi de nsu gini ki yi

e shiya ma dunsi de sua saa a keteri kyakyawu;

Obagizi yi yomu,

ema mbo mamanki la a ndani amu>?

43 <<Nkaa yomu Na gye ku sua keleba solota gizi bisi anya ku sua la ba worede sua yaya ni mbo gangasi de Mirikisi yaa so. 44 Nsude e puari a kiya dunsi mu yaa watala piripiri, se nsu de dunsi puari a kiya e yi yaa leda yi ka nkye atuwa.>>

45 De tolense ni pirisi nja parisiyawa su zi kokongye Yesu, su shina nkye yaa yi beta nja su. 46 Sua bila turiki de su ka yi. Sede sua yi womba yowa ntani, de su leyi nkye Yesu e ma Anebi la.