1 Mbaki sape, guru toree ni pirisi nja toree ni ntani zo ni showura de su kisa Yesu. 2 Su domuna yi, su keyi te ba Bilatu de ma gomuna.

3 De Yawuda nsu de e butu Yesu a beyi, e geni yiri de poro yi, se e shenja dishiya yi e kuma ni gyolo aziripa talatin keyi te ba tolense ni pirisi nja toree ntani Yawudawa. 4 Nkye, <<Ni yi lepi>> <<E ni na ni beyi zini nsu de e yi lepi ba>> <<Mina e ma su ma anya mu?>> su gye yi nkye, <<e ma a laki ake na>> 5 Anya ni Yawuda e keyi gyolo zo ba su a siki laki Mirikisi se e butu. Yaa te lete kiya e yi. 6 Toree ni pirisi su kwa yi gyolo su pala nkye, <<Ema dedena ba de mu sa gyolo mu a siki bogolo gizi Mirikisi sobon ema gyolo ni zini na>> 7 Se su yi showura su la gyolo see anya nsu yi tuni de su bishina bakwe. 8 Sobon yomu, sua sukwa yi anya zini ari yawu. 9 Se beta de Anebi Yirimiya pala e sika nkye: <<Su la gyolo ni aziripa talatin, mbo de yaya ni Izireyila su shiriya a kiya e yi, 10 Se su yi ampani nshi su see anya de nsu yi tuni, yiride Mirikisi beyi doka>>

11 De Yesu sakisi a geba gomuna, se gomuna minya yi, e ke na ki ma seleki ni Yawudawa? <<E ma yiri de ki pala>> Yesu gye yi yomu. 12 De Toree ni pirisi nja salaki su basi yi, e pala nkye mbo da ba. 13 Se Bilatu minya yi, <<Ka zi beta de sua pala a kiya ake mu?>> 14 Sede Yesu gye yi mbo daba, kowoni dandaa ari gomuna yi mamanki soseyi.

15 A kwanki buki nyenteri gomuna yaa shika nse daa a siki nsu yaya jaru. 16 Kwanki ni su ma ni nseda de yaa yi rishi ji a jaru, sua sukwa yi Baraba. 17 Su tala kiya su se Bilatu minya su nkye, <<Waana na shika ku nshi: Baraba ko Yesu de su sukwa yi Kiristi?>> 18 Sobon e shina kishi na e sa su beyi Yesu a nani e yi. 19 De Bilatu zunwa a Kolonwa shiriya, mata yi saka manki anya e yi nkye, <<Kede ki yi nse gangasi mu mbodaa ba sobon e yi lepi ba, ni sha Genbeki anansi sobon e shi.>> 20 Sede tolense ni pirisi nja toree su masa ntani de e shika Baraba de su kisa Yesu. 21 Gomuna minya su waana a siki asu bi mu kwa bila de ni shika ku nshi?> su keleba nkye Shika mu <<Baraba,>>. 22 Bilatu minya su nkye, mina na yi nja Yesu de sua sukwa yi Kiristi? Bilatu minya su. Su keleba guru asu nkye <<Su gidiri yi!>> 23 Bilatu minya su nkye <<Yaya? woni lepi na e yi?>> Su yi kuruwa nsori guru asu nkye, <<Gidiri yi!>> 24 De Bilatu geni nkye e ma mbodaa de yaa yi ba, sede ntani sua bila dege dishiya, e la riki wonkye nani e yi a geba yowa ntani de su tala. nkye, <<Ni butu nani na a kiya zini nse mu de e man lepi ba>> E gye su nkye, <<E ma yanki aku na!>> 25 Guru ntani su keleba nkye, <<A laki zini e yi e ma a kiya amu nja yaya mu!>> 26 Se e shika Baraba. Sede e yi Yesu anberemu, e la yi ba su de su gidiri yi.

27 Se shoja ni gomuna su la Yesu te nshi a siki pada asu se su tala guru shoja de su ma anya ni de su gyowe yi. 28 Su tube Yesu keikei su sayi riga yiri ni solota seleki, 29 Su yi lendee ni tengiya solota nja ankwanya su sayi a kiya. Su beyi gwala a nani dama e yi se su dure a geba e yi sua yi baa. Sua pala nkye, <<E ke seleki Yawudawa!>> 30 Su nya yi anyanya, se su keleba gwala a nani yi su kwakwala yi a kiya. 31 Beyi de su yi baa, se su tibi yi riga de su sa yi. su kuma keikei yi sa yi. Se su te nshi anya de su ta gidiri yi.

32 Su ma a siki tepiya, se su gom ni nse daa ni Bakureni, seni yi ma Sima, su sa yi dole de la gidiri ni Yesu. 33 Su lesa anya de sua sukwa yi nkye Goligota, wato anya ni kwankwa kiya. 34 Anya ni su ba Yesu riki de yada ni ruwa inebi de musha de e sha, de e kpa baki yi, e ki sha.

35 De su gidiri yi, se su laba riga yi su kutiri kuriya. 36 Su zunwa a kisi, sua kone yi anya ni. 37 A bisi ni kiya e yi su rubuta mbo de sua su keyi: <<DA MU E SHINA EMA YESU, SELEKI NI YAWUDAWA.>> 38 Su gidiri bolowa bi nja shi, daa a nani dama nja daa a nani guni yi.

39 Worede sua bise anya ni guru sigeba nene nshi, sua zizika kiya su: 40 Sua nkye, <<E ke de ka pala nkye ka juru gizi Mirikisi de ka gina yi a siki nana wuku, sila kiya aka de ki sonka zo a kisi dege gidiri maana! Nde ki ma yaa ni Mirikisi!>>

41 Yomu na toree ni pirisi, nja male ni kokoyi doka Musa nja totore ni ntani su basi Yesu. 42 <<Su nkye e sila worosu,>>Sede eya sila kiya yi ba! <<E shina ma seleki ni Izireyila! Se e sonka a kiya gidiri dun mu beigaskye nja shi. 43 E sadishiya e yi nja Mirikisi. Bila de Mirikisi e sila ke kuzukam nde yaa bila yi, e pala nkye, eni ma yaa ni Mirikisi na.>>> 44 Yomu na bolowa de su gidiri nja Yesu, osu ma gye Yesu mumungu beta.

45 Dege sisika nana a kiya ari keripi wuku dopuwa ripe anya guru a kesa. 46 A dedeyi keripi wuku Yesu yi kuka ni totolo wurinya nkye, <<Eloi, Eloi, lamasabatani?>> Maana yi ema, Mirikisi na, Mirikisi na, mina na sa ki juyi ni bayi bila ni?>> 47 De worede sakisi anya ni su zi yomu, su nkye <<Yaa sukwa Iliya.>> 48 Dandani nse daa a siki asu yi gudu te la soso. E juku yi a siki riki ntasi inebi de musha, e sukwa yi a gwala e ba Yesu de e sha. 49 Sede worosu pala nkye, <<Ku bila yi eshi dandaa, de mu geni ko Iliya yaa zo sila nshi.>> 50 Se de Yesu yi kuka ni totolo murinya, E sheke amunshi yi se e sika aworo yi. 51 Se dandani labile de ma a siki laki Mirikisi laba gizi bi dege bisi ari kisi. Kisi yi mosi dunsi wokye. 52 Su bure kumsha se nki ntani nsuseki nyowa de su muntu su dege nleyi. 53 Su bubutu a siki kumsha asu beyi de Yesu dege a siki kumsha, se su yuru atotolo geri nsuseki, ntani nyowa geni su. 54 a kwanki de tolense shoja ni Roma nja worosu de sua kone Yesu su geni kisi e yi mosi nja guru mbo de e paru, su zi womba, su nkye, <<Gaskye nse mu e ma Yaa ni Mirikisi na!>> 55 Mata nyowa sua kone mbo de a paru nyisa. sua biya Yesu dege Galili de su kula ni mbo de yaa bila. 56 Asiki asu Meremu dege Magadaliya ma, nja Meremu amaa ni Yakubu nja Yusupu, nja Amaa ni yaya Zabedi.

57 De nyema yi, se nseda nsu mbo nani dege Arimatiya, seni yi ma yusupu, e shi ma ema daa asiki yayagizi Yesu. 58 Yaa ta anya ni Bilatu ologba yi de e bayi nki ni Yesu. Bilatu bayi doka su bayi. 59 Se Yusupu la nki ni Yesu lende a siki woriki sabuwa. 60 Se e la yi sa a siki kumsha yi de e yanka a siki dunsi. Se e kiri totolo dunsi ripe baki kumsha se e te ma yi. 61 Meremu dege magadaliya nja Meremu daa su zunwa a geba kumsha.

62 Nana daa, de a biya nana ni shiri, toree ni pirisi nja parisiyawa su ta geba Bilatu, 63 <<Tolense,>> su nkye, <<mu turunwa kwanki de e man leyi yaa gye ntani nkye, <Beyi nana wuku na dege. 64 Sobon yomu ba mu doka de mu kpanku kumsha yi ari nana ni wuku. Nde mu yi yomu ba, Yayagizi yi sua ta la gaan yi mbolowa sua kuma zo agye ntani nkye e dege. Yaruwa de pala akarishemu yaa dege dishiya pi ni pari.>> 65 Bilatu gye su nkye, <<Ku la shoja de ku te,>> <<de kone kumsha yiride kuma bila.>>

66 Se su te sua kone kumsha su ripe a kiya dunsi su sa nsu kpanku.