1 <<Yesu pala nkye kede ku yi ANKI ku ni gangasi de ntani su geni ku, de su yobo ku. Nde ku yi yomu, Kwa mani nani wuta anya adaa ku Mirikisi bisi ba.

2 <<Nde kwa ba nsu worede sua bila mbo da anya ku, kede ku wula tapire nsu yiride nsu munabuki sua yi a kolonwa nja kiya turiki, de ntani su yobo su. Na gye ku gaskye su keleba nani wuta su naka. 3 Sede nde ka ba nsu de manshi ba, kede kisa ntani su shina mbo de ka beyi ba, 4 Sobon mbo de kwa beyi e ma riripe. Anya ni Adaa aku de yaa geni a riripe, yaa ba ku nani wuta ku.

5 <<Kwanki de kwa yi lepa, kede ku ma kankye munabuki, Sua bila de su sakisi a bisi a kolonwa nja kiya turiki de ntani su geni su. Na pala gye ku gaskye, su keleba nani wuta naka. 6 Sede nde ka yi lepa, te siki laki ke, de ripe kopa de ki yi lepa nja Adaa, e shi de ka geni yi ba. Anya ni Adaa nde yaa te geni mbode ka yi riripe, a ba ke nani wuta ke. 7 Kwanki de ka te yi lepa, kede ki yi yowa beta, kankye worede de su ma Yawudawa ba, sua geni kankye boka asu yaa zi sobon yowa lepa asu de sua yi. 8 Kede ku yi kankye nta yiride su, Adaa aku shina mbo de kwa so kami de kwa ologba yi.

9 <<Yomuna kwa yi lepa;

<< <Adaa amu de ma a siki bisi,

Seni ake eman girima,

10 Solota ake e zo,

Nupi ka e paru

A durinya yiride sua yi a bisi.

11 Ba mu mbosi ni yawu nja ni kowoni nana.

12 Yape mu lepi de mu yi,

yiride de mua yape nsu worede de su yi mu lepi.

13 Kede ki bila de mu puari a siki gwada ba,

Sede ki butu mu bila ayan nsu mungu.>

14 Nde ku yape lepi de nse da yi ku, Adaa ku de ma a bisi yape lepi de ku yi. 15 Sede nde ku yape lepi de nseda yi ku ba, Adaa ku yaa yape lepi de ku yi ba.

16 <<Kwanki de kwa yi azimi, kede ku domuna ndani kankye yiri de munabuki sua yi, sua domuna ndani de ntani su shina, nkye sua yi azimi. Na gye ku gaskye, su keleba nani wuta asu naka. 17 Sede kwanki de kwa yi azimi, wonkye ndani de ku shapa mayi a kiya ku. 18 Nkaa kede ntani su shina ka yi azimi, sede Adaa ke de sua geni yi ba; nja Adaa ke, e shi de yaa geni mbo geni ka yi a boyi, yaa ba ke nani wuta ke.

19 <<Kede ku tala mbo nani aku a siki durinya ba, anya gana nja sikwan yaa bebeta yi, nja anya de bolowa sua wokye yuru de sukwa yi ba. 20 Sede e yi kyawu de ku tala mbo nani aku a bisi, anya de gana nja de sikwan yaa kpa yi ba, nja ayan de bolowa sua wokye yuru a siki de sukwa yi ba. 21 Anya de mbo nani ke ma a shi anya ni la dishiya ke e ma du.

22 <<Ndani ke e ma nta pitila de yaa ba nki ke asikye Nde ndani ake man kyawu, nki ake guru yaa sika ni asikye. 23 Sede nde ndani ke ma kyawu ba, guru nki ke yaa sika ni dopuwa. Nde asikye de ma nja ke e ma dopuwa, dopuwa ke e yi girima!

24 <<Ba nsu de yaa ma bunwa ni ntani bi ba. Sede ki ki da de ki so da, ko ki biya da de ki ki da. Ka taba so Mirikisi nja gyolo a kwanki da ba.

25 <<Nkaa yomu Na gye ku, kede ku damu a kiya ni leyi ku, mbo de kwa si ko mbo de kwa sha; ko keyi de kwa sa nki ku. Leyi ku pi mbo si, nki ku pi keyi bo? 26 Kone nsusuwa bisi; sua nyunkwa ba, sua kwa nwenyi ba, sua tala a siki rigogo ba; nzun yomu Mirikisi adaa ku yaa ba su mbo si. Bele oku, ku pi nsusuwa bo? 27 Waa a siki ku yaa jan nki yi leyi ni kwana da, sobon damuwa ke?

28 <<Mina sa Ka damu a kiya keyi de ka sa nki? Kone pure de sua yi girima ma su a pili. Su yi yanki ba su kwa dumki keyi ba. 29 Sede Na gye ku ko seleki Sulemanu guru dereja e yi e taba kyawu keyi da a siki pure mu ba. 30 Nkaayom Mirikisi yaa sa sanwa ni pili keyi, sanwa de yaa ma yawu gobe sua suwuta yi a kongo, belete oku, ki pi sanwa dereja anya Mirikisi bo, Oku mere beigaskye ni Mirikisi? 31 Sobon yomu kede ku damu nkye, <Mina mua si? ko Mina mua sha? ko Mina mua sa?> 32 Worede de su shina Mirikisi ba osu na sua bila yiri mbo worede mu, Adaa ku de e ma a bisi e shina nkye kwa bila guru mbo mu. 33 Sede ku sa kiya bila solota yi nja gangasi ni Mirikisi, guru mbo de kwa bila sua ba ku. 34 Sobon yomu kede ku damu, a kiya gobe, sobon gobe yaa damu ni kiya yi. Kowoni nana mani damuwa e yi de yaa zo nshi.