14 Ardi duuchchi’a dhugaa kulate kaddo’a tennee Mageniinxe mootummaxxi wengeele butta duuchcha’n lallabendan; ookkonechchi udumanna iikki muuxami daga.

29 «Eettene rakkotixxe barran uduma hirbange’n arishsho dukkandaan, agenjikinna ifa uwwaba’a; urjuwwatinna iimi’ni ibba, iimixxi hunnuwwanna lele’mitaan.✝

30 «Ookoneechchi uduma Manjiinke Beltik beessis iimate’n lellaan; ookkone wodda buttatik arduwwi duuchchi oodha. Insa’nenna Manjiink Belti iimatike duumanchinni, hunnatinna lumok gaachchanninni daga’naa anfaan. 31 Isinna lumoka malagatiinka hafuura laqisaaxxa ifixxa ergana ergaan. Ergannatinna buttike shooliinge kasuwwinaa’n, mitte iimatike kasinaa’n welii qico’n hedheeka isi’a fileemeeka manna bukk assitaan.»

42 «Yoona Gootti ha’nook heene barra dagaaxxa egendinammabaaxxee dammaqineexxi heqqedhdhe! 43 Tennee qalbeeffatte, miniink anni moodhachchi hashsha heene yanna’n dagaaxxa ege’neele silaat dammaqe mini ifik umemabaashsha heqqedhamman. 44 Manjink Belti keekkattinebaaxxe saate’n daggammaxxee ha’nonna iittanni qixxeeffattineexxi heqqedhdhe!✝

20 Ha’noo ajajeennaxxa duuchchanna assinaashsha insa’nee barachchiisse; aninna buttatike muuxami qico’n, duuchchii wodda ha’nonni welti hedhennen.»

32 «Yaane kinni eettenee barranna eettenee yanna Annake kaddole malee iimixxi ergannanna kaddo, Beltokenna kado, fedheekinna ege’nabaani.

1 Udumixxe barra’ni wixixxi assitaaxxi yanna daggaaxxa ege’ne! 2 Manni umo ifika eeyyake kadaan, iittanni maallaqakee hafemaake, ifi dukaake, hollaake, yowwaake, hadokee ajajemabaake, galateefatabaake, woyyumma afebaake, 3 jaalala afebaake, araara eeyyabaake, manjiinka summa balleessaake, umo ifika hirabaake, godoba jabaataake, eloxxa yaane gibaake, 4 waakataake, haafemaake, tolanga hollati wo’meeke, Mageno eeyyaati irra maaliinxa gammashsho eeyyaake kadaani. 5 Kunni manni Mageno addateeke labee leellaan; yaane kinni magenoonfachchotixxa hunna waakkataan. Iitta hedheeke mannanaa’n bayyati.

17 « ‹Mageni udumixxe barra’ni kaddaan hiyya’nee qici,

Hafuura anka manjo duuchcha’ni dunannon.

Ha’noxxi labbaxxinna meyyaxxi oose raaga haasotaan.

Ha’noxxi dargaggeeyye edi’a kaddaaxxa waleella uuddaan,

ha’nook geedhe oojjo oojjotaan.✝

18 Iittaanni eettenne barruwwa’ni labba meyyake anke erganjuwwi hana

Hafuura Anka dunannon;

insa’nenna raaga haasonnaan.

19 Ale iimate’n maso yaanuwwa

kaba buttate’ninna beessissuwwa

iittani munde, giiratanna wiliiletika qayyoota leellishannon.

20 Lumoxxi ulfeessendeexxi Goottiinxi barra dagebaa edidarre

arishsho dukkandaan:

agenjikinna mundetishsha diimmataan.

21 Goottiinka summa ye’aaki duuchchi kinni

anjiremaan.› »

28 «Ookkonneechchi uduma

Hafuura anka manjo duuchcha’n dhangalaasannon;

Ha’noxxi labbaxxinna meyyaaxxi oose raaga raaggaan;

ha’nooxxi geedhenna oojjo oojjottaan;

dargageeyye ha’noxxinna waleella uuddaan.✝

29 Ittanni eettene barruwwa’n meyyaxxenna labbake erganjuwwa’n midde,

Hafuura anka dhangalaasannon.

1 «Ookkone baro’n atike ardixxee uuraki lumoki sooreessi Mika’eeli ke’aan; manjiinxi sanne dadendeexxe yannanaa’n ookkone bari qico’n kade ege’nebaaki rakkotik bari dagaan. Yaane kinni eettene yanna’ni summi insa’nek ookkone Maxaafa’ni borreessemaake atik ardi duuchchi mitti mitting anjiremaan.✝ 2 Reyeexxi buttinake kade’emmaki manni duuchchinaa’ni heddi ke’aani; weli duuchchi woddixxe hedho’n e’yaa wodda wel kinni shookokeenna duuchchi woddike salphini’a ke’aan.✝ 3 Beekkoletinna iimike ifishsha, heddo mannanna qullummatike ora’n hiisaakiir iimixxe urjeshsha duuchchi woddi’a ifaan.

15 Goottakenaa’n adhinenneke hiyyichchishsha ha’no’n kulaannexxi yaane, no’o hedhoti he’naannekinna Gootti dagaa qico’ni turraanneki reyemmaka manna edinsabe’non. 16 Gootti umo ifingenninni lumok ajajinni, ergannatike sooresixxe raareninna Mageniinke malagatike hafuurinni iimi’ni dirraan; Kiristoosi’ni amane reyemmakirinna edise ke’aan. 17 Ookkonneechchi uduma no’o hedhotike kandeennekinna buttate’ni he’nenneki Gootta ayyarete’n adhdhinona’a insa’nen welti duumanchake’n iimi’a buttemannon, duuchchi woddi’anna Goottik welti he’nannon. 18 Tennexxee konne hiyyichchinni weli’aan weli dayyeesse.

6 Yoona dammanqo; no’oo umo ifika hirro malee’e mugaammake wele mannishsha kandonnoqqe’e. 7 Mugaaki hashsha mugammashsha; machcho’akirinna hashsha machcho’aan. 8 No’o kinni barrike manna kandeennaxxe’ee jaalalatanna amana qoma golle’namaake bagediink mi’yishsha oddo’wino; anjirematixxa adde ifi faachcheffantammaxxe bagediinxe gulleshsha umoke’ni uggudhdhino. 9 Mageni no’oo ye’eechchi anjirensha Gootta no’oke Yessuusi Kiristoosi darree’n alfinannoshshate malee mufe ifixxa no’o’ni dirriso’atebaan.

34 Lebeexxi Yessuusi hiyyee qici: «Yaane kinni itatinna ha’wiinxe bira sa’nenni machcheti, foogalatinna bultetee hediyoti wixixxi hiyyati qalbe ha’nooxxi dillootabaashshaa ifi heqqedhdhe! Kada gophphoole itti barra ha’noo fonxorotishsha deedhanga abiddaan. 35 Iitti barranna butta’ni hedhaake duuchcha’ni fonxorotishsha itti daggaan. 36 Tennexxee kaddo’aa hexxeexxe duuchchanaa’ni gatatee’e, Manjiinke Belti edonna uuratee’e dandeetinaashsha duuchchi wodda jabaatinne soodatte.»

8 Ha’no kinni anke jaaluwwaa Goottake’ni mitte barra kuma woggashsha, kuma wogganna mitte barrashshate kaddeexxa tenne mitte yaane deetinoqqe’e. 9 Mitti mitti manna’ni tureechcho fakkaatolenna Gootti ifike addachchisatike hiyyichcho muuxo’a turabaan; yaane kinni isi ayyinna ba’abaashsha, duuchchiingi aadde aago’a ha’noxxee ossaan. 10 Goottiinxi barra kinni moodhalchiinsha daggaan; eettene barra iimuwwa lumooke luuljinni saxxaan; iimuwwatixxi daduwwanna lumoke giirake eebbinjinni baxxaan; buttatinna ise’ni hedheechchi duuchchi gubataan. 11 Yoona duuchchiinxi yaane iitta baxxa’neechchinni ha’no hitta hexxinaake manna kada hasissutaa? Ee, woyyummatinna Mageno fakkaatati hedha ha’noo hasissaan. 12 Iittanni ha’noo Mageniinxa barra heqqexxina’ni dago isika muddansa hasissaan; eettene barra iimuwwa giirati itendeexxi baxxaan; iimuwwatixxi daduwwanna jabake eebbinjinni baqqaan. 13 No’o kinni qullumma hexxaaba haaroxxa iimanna haaroxxa butta isike addachchisatik hiyyichchishshanni heqqedhate’ni he’nennen.

51 Yoona mitte buqo yaane ha’no’n kulaannene. No’o duuchchiingi rennabe’no; yaane kinni no’o duuchchiinge jijjiiremmannon. 52 No’o jijjiiremmannokinna iikki udumik malagati ufuufemaa wodda dedhanga ille himmi hite baqqitammaxxe yanna giddon. Malagatikinna ufuufemaan, reyeek manninna alo’abaake kade ke’aan; no’onna jijjiiremmannon.

17 Kunnise ani,

haaro haaroxxa iimuwwanna haaroxxa butta dadanon:

Saxxeexxi yaanuwwa duuchcha dedhendaan:

qalbefataak hedhebaan.✝

18 Yaane kinni dadenke’ni,

gammadde: duuchchi woddi’a ililisse.

Ani Iyyerusaalemii gammashshotee’e,

arda isekanna ilileettettee’e dadannon.

19 Ani Iyyerusaalemii’ni gammadannon:

arda ankenna ililisannon:

Oodhishshatikinna raaretik hafuuri laqemabaan.✝

1 «Kunse boosixxe giirashsha ha’yitaaxxi barra dagaan; ifi dukaak duuchchinna fuggoxxa hujaak duuchchi huurake kadaan; itti daggaaxxi barranna insa’nee gubbaan» hiyya’neen Dad Duuchcha Ajajaak Duuchchi Woddik Gootti. «Hiddakanna dame insa’nee gatissabaan. 2 Yaane kinni ha’noo summa anka sodaatina’neekeri’aa iitti qullummatixxi arishsho ha’no’aa fuldaan; fayyattinna keela iseki giddo ha’no’aa kaddaan. Ha’noonna dhoobbo giddii’n fuldeemmaxxe jabbeshsha burraaqqinaan.

1 Ookkoneechchi uduma haaroxxa iimanna haaroxxa butta afenne, iitti siretixxi buttanna siretixxi iima sa’xxe’emman; abbaayyatinna ta’anni edi’a hexxabaan. 2 Iikki woyyichchi qachchi iitti haaroxxi Iyyerusaalemi ifike aro’i’aa seefateemmaxxe waajubichchoshsha qixxeffateexxi iimi’n Mageniinba’n butti’a dagaa wodda afenne. 3 Iittanni lumok hafuur eettene mootenaa’n hiyya’n fulaanaa laqenne qici: «Kunnise Mageniink galdum manjink weltiten; isinna insa’nenni welti hedhaan; insa’nenna isike arda kandaan; Mageni umo ifiken insa’nenni welt hedhaan; isinna Gootta insa’neeke kadaan. 4 Indiddo insa’neexxa duuchchanna insa’nexxe illetenaa’ni fiyaan; edixxi aadda saxxemmaxxee ta’anni edi’a reyo yookaan yaaddo yookaan oodhishsha yookaan seldo insa’ne’ni hexxabaan.»