1 «Ookkone baro’n atike ardixxee uuraki lumoki sooreessi Mika’eeli ke’aan; manjiinxi sanne dadendeexxe yannanaa’n ookkone bari qico’n kade ege’nebaaki rakkotik bari dagaan. Yaane kinni eettene yanna’ni summi insa’nek ookkone Maxaafa’ni borreessemaake atik ardi duuchchi mitti mitting anjiremaan.✝12:1 Mat. 24:21; Mar. 13:19; Wal. 7:14; 12:7. 2 Reyeexxi buttinake kade’emmaki manni duuchchinaa’ni heddi ke’aani; weli duuchchi woddixxe hedho’n e’yaa wodda wel kinni shookokeenna duuchchi woddike salphini’a ke’aan.✝12:2 Isa. 26:19; Mat. 25:46; Yoh. 5:29. 3 Beekkoletinna iimike ifishsha, heddo mannanna qullummatike ora’n hiisaakiir iimixxe urjeshsha duuchchi woddi’a ifaan. 4 Koo Daani’eeli atik kinni iitti muuxxematixxi yanna daggaa qici’a, konee maxxaafika hiyyichchi cufe, iso’ninna maxans; heddi manni eleqe kayya gongaan; ege’natinna bira saxxaan.»✝12:4 Wal. 22:10.

5 Ookkoneechchi uduma ani Daani’eeli lami manni galaan qaraqara mitti wido, mitti kayyii’n uurree’naa afenne. 6 Lamekenaa’n mitti, Layinotixxa seemma odo’weexxi galaani ali darre hedhammaka manjichcho, «Tinni maso yaanuwwa muuxematee hitteexxe yanna gattaa?» hiyye.

7 Iikki layinotixxa seemma odo’weexxi galaanii ali darre hedhemmak manjichchi, ifixxa middixxanna bita’ixxa anga iimi’a ke’isseexxi «Woggatee, wogguwwatee woggatike gamisi’aate kaddaan; ookkone woyyichchi mannixxi hunna, xeerensha muuxendaaxxa yanna tinni yaane duuchchi muuxendaan» hiyya’n isoo duuchchi woddi’a hedhaakenni kakata’naa laqenne.✝12:7 Wal. 10:5; 12:14.

8 Aninna laqennen yaane kinni qalbeeffatebe’no; tennexxee «Anke Goottaa, tenne duuchchixxi muuxensha maachcho?» hiyye qorenne.

9 Isinna ane’n hiyye hiisse haaso’ee qic, «Koo Daani’eeli kunni hiyyichchi muuxamiinke bari qico’n buqemeekenna maxxansemeeke kademaxxee yoona ati me’i. 10 Heddi manni qorqorsemaan, luqqi hiyyaan; ca’a hiyyaan; fuggaalless manni kinni ifinxe fuggo assitaan; fuggaaleyyetenaa’n mittikinna qalbeefataba’a; beekkole kinni qalbeeffattaan.✝12:10 Wal. 22:11.

11 «Iikki Barra barrak tolchi gateexxe yannanaa’ninna ba’ne iyyedaggaaxxi battitte yaane, kaasendeexxe yannanaa’n mitte kuma lame dhibbanna sallane tomme barra kaddaan.✝12:11 Dan. 9:27; 11:31; Mat. 24:15; Mar. 13; 14. 12 Ossaakinna mitte kuma sase dhibba, sase tommenna onde barraxxa muuxensha geyaak eebbisemeeken.

13 «Koo Daani’eel ati kinni muuxamii qico’ni me’i; lummexxaton; eettene muuxamiinxe barruwwa udumanna kexxettexxi ati’a dhaabemeeka geego adhdhittaton.»