1 Mitte barra moyanji Bilxasoor kuma ifike ja'laabuwwi'a lumoxxa jila jileexxi insa'nenni welti woyinetixxa booka ha'wa'neemmani. 2 Bilxasoor woyinetixxa booka ha'wande'n hedheexxi, anni isiki Naabukedenetsoori Iyyerusaalemike galmanaa'n iyyedagemmaxxa worqetixxanna birretike sibiljixxa buuduwwa'n, ja'laabuwwa ifikenn, aruwwa ifixxenninna shiixxooxxe ifixxe aruwwanni welt ha'wo'aa tenne buuduwwa iyyedangaashsha erganjuwwa ajaje. 3 Tennexxe erganjuwwikinna Iyyerusaalemi hedhemmake Mageniinke galmanaa'n daggemmaxxa worqetixxa buuduwwa iyyedage'naa moyanji tenne buuduwwa'n ifike ja'laabuwwinn, aruwwa ifixxeninna shiixxooxxe ifixxe aruwwann welt ha'we. 4 Insa'ne woyinetixxa booka ha'wina'n worqetika, birretike sibljika, sageeto sibljika, sibljiinka, haqqetikanna kinjiinka magenuwwa galateeffante.

5 Hirba ookkone'ni manjiinxe angaxxi qubba leelliteexxi moottummatike minixxe giddixxe gimo'n borreessite; moyanjikinna qubba tinni borressita'na'a afe. 6 Ookkone wodda moyanji alba xilledhe; alayyokenaa'n kexxeexxeninna anga lekka wexeqeme; mikituwwakanna gilgile. 7 Moyaanjinna hafuura gikki asseexxi morammakir, gojammakir, diginte daggamammakirnna urje laakko'ammakiir dagaashsha ajajeexxi tenne Baabiloonixxe beekkole'ni hiyyee qici, «Tenne borro haasesseexxi tika isexxa ane'n kula dande'aake manji'aa dhiille kaabba oddoossennexxi goobake'ininna worqetika haachchaba ugganno; isi anxe moottumma'n sakkake galchallo kadaan.»

8 Ookkonneechchi uduma moyanjinxa duuchchinxa beekkole ye'isse; yaane kinni borro eettene haasessateenna kad isexxa tika moyanjoke'n kula dandeenneba'a. 9 Tennexxee moyanji Bilxasoor yo'oshsha alayye; albakanna xilledhe; isik ja'laabuwinna mekki hiyye.

10 Mootitte moyanjiinkanna isike ja'laabuwwika haaso'a laqqeexxi jilatike mine'n e'yite hitee qici, «Koo moyaanjoo! Qeerra baro hedhe! Tenne yaanexxenna mekki hittoxxe, albakanna xillisoxxe. 11 Atixxe moottumma giddo woyyichcha magenuwwika hafuura afeek mitti manji hedheen; kunn manji atike annike baro'n magenuwwiinsha hedheeka beekuma qalbefachonna ege'naa afeemmakemman; iso'o anni atik Nabukedenetsoorinna moramakirke, gojamakirke, diginte daggamammakirikenna urje lakko'ammakar mannike akeekisanjo asse. 12 Moyanji iso'o Bilxasoor hiyye summa fulcheemmak Daani'eeli kunni eloxxa kiido, ege'nanna qalbeeffachcho afeeke kade'e ege'nemeken; oojjo tika, hiibbo hissanna buqo yaane farri assatixxa dande'a afe'emmaken; tennexxe'e Daani'eel ye'ise; borro itti maa hitaaxxa isi ate'n kulaan.»

13 Eettene yanna Daani'eeli moyanji edo shiqe; moyaanjinna iso'o hiyyee qici, «Moyanji anni ank Naabukedenetsoori Yihudakenaa'ni booji'e iyyedageeke manni giddii'ni Daani'eelte hinaak atetee? 14 Magenuwwink hafuur ate'ni hedheexxa ege'na qalbeeffachchonna gargar hedheeka beekkuma affeettexxa ege'neennen. 15 Tenne borro haasossineexxi tika isexxa ane'n kullo'a beekoletinna, diginte daggamammakir ani edo shiqeemman; yaane kinni tika ane'n kula dandeenneba'a. 16 Yaane kinni ati tikattixxa dande'a affettexxanna rakkissaaxxa yaane duuchcha kula dandeetattoxxa laqeenen; tenne borro haasesitotole, tika isexxanna ane'n kula dandeettottole, dhiille kaabba oddo'wittattoshsha gobake'ininna worqetika haachchaba uggudhdhitettexxi anxe mootumma'n sakkake galchallo kaddattoshsha assannon.»

17 Daani'eelinna moyanjoke'n hisse haaso'e hiyyee qici, «Uwwa atixxir ati'anni hexxuun; gica atikaranna wele manji'a gic; kado malee'e tenne borro haasossennexxi isexxa tikanna atee moyanjoke'n kulannon.

18 «Koo moyaanjoo! Lumok Magen Naabukedenetsoori anna atikee moottumma, lumminne, ulfinnakanna gaachchanna uwween. 19 Isi'a uwweeke lumooke baalloommanaa'n kexxeexxa ardi duuchchinna garga gargar hedheeka laagada haaso'aakir duuchchi isi'a culphiseexxi iso'o sodaate; moyanjinna shiyo'a haseeka shiya; gatiso'a haseeka gatisa; baalonsa haseeka baloonsa; salphisa haseeka salphisa'emman. 20 Yaane kinni hollatinna ifi dukati jabaatee wodda mootte ifixxenaa'n fugusseme; gaachannikinna isonaa'n mulqeme. 21 Isi ardi giddii'ni adhdheme; biniinchinxi sammonna isi'a uwwende; diidinxe harruwwanni welt hose gale; horinshanna badda'a dheede; Lumok Magen manjinxe moottuummuwwa duuchcha'n hunna afeexxanna moottumma duuchcha eeyyeke uwwaaxxa ege'naa qico'n bisi isik iimi'ni cophphisammake wojinn coo'mi hiyye.

22 «Koo Bilxasoor ati belto isinge kadde tenne duuchcha egendeenni hexxe ifi salphisebexxo. 23 Ifi salphissattaxxa bado iimike Dada duuchchiki Gootti ifi dukkette; galmixxa buuduwwanna iyyedagissettexxi atike ja'laabuwwinni aruwwa atixxenninna shiixxooxxe atixxe aruwwanni welt woyinetixxa booka tenne buuduwwa'n ha'witete; uuda, afanna qalbeeffata dande'abaaka worqetika, birretike sibljika sageettotike sibiljika, sibiljiinka haqqetikanna kinjiinka mageno galateeffattette. Yaane kinni hedho atixxinna ora atika duuchcha anga abideeka Mageno ulfeessitebexxo. 24 Tennexxe isi eettene borro borreessitaaxxa qubba erge.

25 «Itti borresseendemmaxxi borronna: Maane, Maane, Teqel, Faares* hita'emmaxxe kaddaa wodda.

26 «Isexxi tikanna: Magen atixxe mootummaka baro lakko'eexxi muuxemake'n idage hiyyoten. 27 Teeqel hiyyo Kiilende shollexxe hiyyotte. 28 Faares hiyyo mootumma atixxi qoodendeexxi Medoonikenna Faarisike manni'a uwwende.» 29 Ookkonneechchi uduma Bilxasoor Daani'eeli'n dhiille kaabba oddoossinaashsha, goobake'ninna worqetika haachchaba uggaashsha; moottumma isixxe'ninna sakkake galchallo assinaashsha ajaje. 30 Eetteneen hashsha Babilonk moyaanj Bilxasoor shiyemee'na'a, 31 jaane tommenna lame woggak Daaryoosi Medoonchi moottumma isixxa dhaale.