1 Baabiloonik moyanji Bilxasoor moyeexxe siretixxe wogga'n Daani'eeli taqete'n diipheeba hedheexxi oojjo oojjote; waleellatanna uude. Eettene oojjoka umo yaadanna borreesse.

2 Dani'eelinna hiyyeeqic: «Shoole iimik diidallichchuwwi lumoxxe abbaayya raassaa wodda hashsha waleellati uudenne. 3 Shool gargar gargar hedheek biniinchuwwinna tenne abbaayyanaa'n fule.✝

4 «Iikki taakkak biniinchi neenqa laba'emman; isinna sinbiriinka keela afe'eemman; aninna uuda'naa'n isik keeluwwinna goggosheme; manjiinshanna lame lekkanni uurraashsha buttii'n iimi'a qophphi asseme, manjiinxi qalbenna isi'a uwwende.

5 «Kunnise weli langak biniinchi dibbi hiyyemaake biniicha laba'emman; isinna mitte ga'mii'n iimi'a qophpi hiyyeexxi sase cinaachchiinxa miqe issoti ga'me'emman. Isinna, ‹Kexxettexxi godditatto qico it› hiyyeme.

6 «Ookkoneechchi udumanna uudannoo wodda ani edo qeedhancha labaak wele biniinchi hedhemman; ifike dudduro'ninna ci'atikishsha hedheeka shoole keela afe'eemman; kunni biniinchi shoole umuwwa afe'eemman; isi'anna galchatik baalloomi uwweme.✝

7 «Ookkonechchi uduma, hashsha leella uudene; kunnise sodaachchisaakinna alalishaak lumoshsha hunnaamessake kade'eek sholgaki biniinchi hedhemman; isinna lumolla sibiljiinxa isso afeemman; butuchche ita'na'a gateechcho duuchanna lekkat hirbeessa'emman. Isi edidarre hedhemmake biniinchi duuchchinaa'ninna gargar hedheekenna tomme gaafuwwikemman.✝

8 «Konne gaafuwwinxe yaane hedande'n hedhennenge'n konne gaafuwwixxe oddonaa'n weli gaaf xuutti hiyye; edisemmake gaafuwinaa'ninna isi edo sasi gosheme; kunni shiixxoki gaafi manjinxishsha hexxeexxa ille, hollati haaso'aaka afo'onna afe'emman.✝

9 «Aninna uudanege'ni,

«Mootuwwa bakkate'n uggendee'naa

iikki olmikinna iso'ni ofo'le;

Seemma isixxinna kaadetishsha golaloxxemman;

isike umixxi ordanna footinsha golaloxxemman;

Moote isixxinna giirati bubeno,

isixxe mootexxi moluwwanna ha'ita'neexxe giiramman.✝ 10 Giiratik wodi'inna isi edii'n burqeexxi

ya'a'nemma'a;

Heddo kuma'n laakko'emaak erganjiwwi isi'a ergatema'emman;

laakkossi iimi darre hedheeke kumuwwiirinna isi edo uurre'eemman;

Murte safende;

maxaafuwwikinna baneme.✝

11 «Gaafi iikki haaso'ammak hollaatite kadeemmaxxee aninna uushshote'n ke'enne; ani uudande'n hedhee'na iikki biniinchi abideme shiyemeechchi uduma renshi isik giirate'n darbeme iteme. 12 Wele biniichuwinaa'ni baaloommi hoyyeme; kaddo malee murendeexxe woggaxxa yanna hedhoti hedho'a eetti uwwende.

13 «Hashsha uudennexxe waleella'n manjinka belto labaak iimike duumanchinni welti dagaa'naa afenne. Isoona ookkone olmiinki edo shiqinshe.✝ 14 Baalle, gaachchannikinna lumoxxi hunna isi'a uwwende; gargar gargar hedheeka laagada haaso'aak gosa gosak manninna arduwwi isoo sagande; galcha isixxinna duuchchi woddi'a saxxabaaxxen; mootumma isixxinna haranga baxxabaaxxen.✝

15 «Ani uudennexxe waleellaxxee, ani Daani'eeli mekki hiyye ifi giddonna wixxirri hiyyeene. 16 Aninna ookko uurre'emmakeranaa'n mittinba'a shiqennexxi tenne duuchchinxee dhugaatixxa tika isoo qorenneni.

«Isinna tenne yaaneexxa tika hiyyeexxi ane'n kulee qici, 17 ‹Kunni shool lumollammi biiniinchi buttate'n mootaaxxe shoole mootummuwwan. 18 Yaane kinni ookkone Lumokixxi Woyyoole tenne mootumma adhdhitaan; duuchchi woddi'anna isee dhaaldaan, eetti baro baroke ifixxe assexxaan.›✝

19 «Ookkoneechchi uduma butuchcha'neekenna ninnifa'neeke gatechcho duuchchanna lekkati hirbeessa'neeke, sibilinxa issonna sageettotike sibilinke qe'ya afeeka, wele biniinchinaa'ninna gargar hedheeki lumoshsha sodaachchisa'neeke konne shoolgake biniinchixxa dhugaatixxa tika ege'nonna'a yorenne. 20 Iittanni konne biniinchike umi hana hedheeke tomme gaafuwwi hedhemman, konne gaafuwwiinxe oddonaa'ni shiixxoki gaafi quuxxise; aninna konne goggoshemeemmake sasi gafuwwixxee e'ge'nonna'a yorenne; kunni gaafi illuwwanna ofo'o afeemman; wele gaafuwwinaa'n caala sodaachchisaaka hollati haaso'aaka afo'o afeemman. 21 Ani uudannenge'ni kunni gaafi woyyoolete'ni bagedo baneexxi insa'ne injifate:✝ 22 Tinninna kaddeek iikki olmiki dagaa qici'anna ookkone Lumokixxe woyyoole'a muraa qici'aten; ookkoneechchi uduma insa'ne mootumma dhallaaxx barra dagge'een.

23 «Isinna ane'n hiyyee qici, ‹Iikki Shoolgaki biniinchi tenne butta'n mootaaxxe sholgeessoxxe mootumma kaddaan; tinni mootumma edi darre hexxemmaxxe mootummuwwa duuchchinaa'n gargar hexxeexxe kaddeexxi butta duuchcha hirbeessita'ninna bulleessita'n galchitaan. 24 Kunni tommi gaafuwwi eettene mootumma giddii'n ke'aake tomme moyanjuwwan; ookkoneechchi uduma konne moyanjuwwinaa'n gargar hedheek wele moyanji keexxi ookkone sase moyanjuwwa injifataan.✝ 25 Ookkone Lummoke'ninna afo'o fulchedhaan; woyyoole isixxanna miicaan; ayyaanuwwake murendeexxa yannaaranna seeruwwa jijjiiro'a wo'laana; woyyooletinna sase wogganna gamisakee anga isixxe'n sa'issende uwwendaan.✝

26 « ‹Ookkonneechchi uduma murte murenda; baalloomikinna isonaa'n adhdhemee'naa'a isinna duuchchi woddi'a balleessemaan. 27 Ookkoneechchi uduma iimati butta hexxeexxe mootummuwwaxxi galcha baalloominna lumminni ookkone Lumokixxe woyyoole'a uwweemman. Mootumma isixxinna duuchchi woddixxe kaddaan; galchalluwwi duuchchinna isoo magenooffata'ne isi'a ajajemaan.›✝

28 «Eettene oojjoti tika kaba qunqumende. Ani Daani'eeli, giddo yaadik yo'oshsha mekki hiyyenne; alayyikinna bifa ba'enne, kaddoolenna tenne yaane godoba galchedhenne.»