1 Moyanji Bilxaasoor moyeexxe sakkaxxe wogga'n ane'n edi darre leelliteemmaxxe waleella uduma ani, Daani'eeli wele waleella uudenne. 2 Tenne leella giddo ani Elaamike awuraajja'n Suusake umo qachchike kinjinke dalla'i giddo hedhennexxa afenne; eettene waleellaninna ani Ulaayike galaan qarqaranna uurrennani. 3 Tami asse uudanno wodda ani edo kunnise lame gaafik gedhebiink korbeess galaan qarqara uurre'naa afenne; gaafuwwi isikinna qeerrarammakemman; gaafuwwakenaa'ninna mitti welekenaa'n qeerredhaan; isi quuxxisek kinni udu'meeteman. 4 Iikki gedhebiink korbeessi dhidhimi darre'n, middi darre'ninna bita'i darre'n ifike gaafinni cifaa'naa afenne; mitti biniinchinna isoo ifinaa'n dande'e hoyyedheba'a; hunna isixxenaa'ninna dande'e baaje fuleek hedhemmabaan. Eeyyeexxa duuchcha asse; umo ifikanna lummise.

5 Waleella tennexxa yaane heda'ennenge'n lamiinxe illexxe oddo'n lumooka gaafa afe'eek recci buttinna kisebaang didhimii darrenaa'n butta duuchcha tansaasa'n dage. 6 Isinna galaan qarqara uurree'naa uudennake lame gaafike gedhebiinke korbeessibaa lumoxxe aarenni yaasume dage. 7 Ookkene gedhebiinke korbeessibaanna shiqe; isinna ookkone gedhebiinka korbeessa jabaxxe aarenni tumeexxi lamiinga gaafa isonaa'n enqe; isoo injifataaxxi hunnanna ookkone gedhebiinke korbeessa'n hexxemmaba'a; tennexxee iikki recci ookkone gedhebiinka korbeessa butta anxuqeexxi isi hana hirbeesse; ookkone gedhebiinka korbeessanna ookkone recconaa'n gatisa dande'eek hedhemmaba'a.

8 Iikki reccikinna yo'oshsha jabaate; yaane kinni ifi lummisatixxi hunna xungo geltee woddi isik lumok gaafi enqeme; eettene bakka'ninna shoole iimixxe diidalluwwa darre'n nophphaak lumolammi gaafuwwi fule. 9 Konne shoole gaafuwanaa'n mitteke'n weli mitti shiixxok gaafi xuutti hiyye; isinna Bita'ake'ni, boroti darre'ninna ookkone eloke boga'n hunnati nophphe. 10 Iimika sannachcha geyaa qici'anna nophphe; ookkone sannachchixxe urjuwwanaa'n butta ibiseexxi hana hirbeesse.✝ 11 Iimike sannachchik sooressinni ifi qixxeessati ifi lummise; barra barra'n isi'a shiqammaka tolchanna ifi'a adhdhe; isike woyyichcha galmixxa bakkanna battoosse. 12 Jallotenaa'n kexxeexxa woyyichchi sannachchi barra barra'n shiqammake tolchinninni welti isi'a sa'isseme uwweme. Asseexxi duuchchi isi'a qajeelde; dhugaatinna butti'a hunende.

13 Ookkoneechchi uduma woyyoletenaa'n mitti haaso'a'naa laqenne; weli woyyichchinna ookkone haaso'emmake woyyichcha'n, «Ookkone barra barrake tolchixxe, ba'netee buutote kaddeexxe jalloxxee, hirbeessamatee sa'isseme uwwemaake woyyichcha galmixxeenna sannachchixxee leelliteexxi leella muuxendaak haanote?»

14 Qoremeemmak iikki woyyichchinna ane'ni, «Lame kumanna sase dhibba gorsanna galgala qici'aaten; ookkoneechchi uduma iikki woyyichchi galmi haaroba luqqi assemaan» hiyye.

15 Ani, Daani'eeli tenne leella uuda'n iseenni wo'monnaa hedanenge'ni manjo labaachchi ani edo uurre. 16 Ulaayike galaanibaa'ninna, «Koo Gabiri'eel konne manjichcho'n tenne leellaxxa tika kul hiyya'n haaso'a'neeke manjichchika hafuura laqenne.»✝

17 Isinna an uurre'enaba'a shiqa'n dagee wodda alayyennexxi albik gonbisemenne. Isinna anee, «Koo manjinke beltoo, leella tinni udumike barixxeete kaddeexxa qalbeeffati» hiyye. 18 Ane'n haaso'ande'ni hedhe'naa albik gonbisemenneba diiphe cokkokki hiyyenne. Isinna anee kise'e buttii'ni ke'isseexxi uurrise.

19 Isinna ane'n hiyyee qici: «Tinni Leella muremeeke udumike baro'n kaddaaxxa yaane leellishshaaxxe kaddemmaxxee uduma ookkone mufetike baro'n maachchi kadaaxxa kunni ate'n kula'eennen. 20 Iikki uuddettek lame gaafik gedhebiink korbeess Meedoonikenna Faarsike moyanjuwwa leellishaan. 21 Iikki recci Girkeeke moyanjo kada wodda isixxe lame illexxe oddo'n hedheek lumok gaafi siretike Girikike moyanjon. 22 Ookkone enqememmake gaafixxe bakka'n fule'emmak iikki shool gaafuwwi, eettene mootumanaa'n fuldaaxxa shoole mootummuwwa leellishaan; yaane kinni mitti mittinxi mootumma eettene siretixxe mootumma qicixxa hunna affaba'a.

23 «Tenne mootummuwwaxxe udumike galchatika baro'n jalliyyetixxi fuggaalessumma hara xungo geltaa wodda, albi sodaachchisak godoba jabakik moyanji ke'aan. 24 Isinna hara worbake kadaan; yaane kinni ifixxe hunnannitebaan; mancira hiyyissaaxxa ba'ne geessissan; assaaxxe duuchchanna isi'a qajeeldaan; jajjabba mannanna woyyoole arda muxuqqi assaan. 25 Isinna sobiki durooman; ifinna lummisaan; nage'ik hedheeka heddo ardanna biraan; ookknee galchalluwwiinke galchallo'ninna ke'aan. Yaane kinni isi balleessemaan; balleessemaakinna manjinxe hunnannitebaan.

26 «Ate'ni kulendeexxi tinni galgalixxinna gorsixxi waleella dhugaateni; kaddo malee'e heddo wogga uduma kaddaaxxa yaane leellishshaaxxe kaddeemmaxxee waleella tenne'e buqqe abidi.»

27 Ani, Daani'eeli kurbu hiyye'e heddo barra'anna elagophenne; ookkoneechchi uduma ke'ennexxi ookkone moyanjinxe huje'n me'enne; uudennexxi leella anee'e alalishite; isenna ane'ni aaggeemmabaani.