1 Meedoonichchi Arxeksiisik belti Daariyoosi Baabiloonixxe mootumma'ni moyeexxe siretixxe wogga'n, 2 isixxe moweexxe taakkaxxe wogga'n ani Daani'eeli, Duuchchi Woddik Gootti, Iyyerusaalemi diigende turtaaxxi torbaane tomme woggaxxi muuxensha wabeeka Ermiyaasi darree'n haaso'emmaxxa woyyichcha maxaafi giddii'n qalbeeffatenne.✝ 3 Tennexxee jooniyya seemma oddo'we bululoke'n ofo'lennexxi agabo goddo hedhe soodachchoteenna kadhatee alba dada duuchchik Gootti Mageninbaa wirri hiyyenne.

4 Cubbo anxa faa'ci'wa'n Duuchchi Woddike Gootta anke Magenibaa hiyye soodatenne qici, «Ate eeyyaakerininna ajaja atika heqqedhaakeri'a aaggettaxxa jaalalatixxa kako heqqexxattoke dada duuchchike Gootta Magenoo, 5 no'o jalline cubbo hunjeenneni; balleessine fuggoxxe'ninna me'ineennen; atike ajajuwwinaa'ninna seera atikenaa'n uduma hingeennen. 6 No'oke moyanjuwwa'n, no'oke galchalluwwa'n, no'oke edike annuwwa'n iittanni bogiinke arda duuchcha'n atike summinni haasotteexxa atixxa erganjuwwa wabeeko laqaginbeennen.

7 «Ee dada duuchchike Goottaa! Ati qulichchake; yaane kinn no'o ati'a xuurameeyyete kada gophatenaa'n kexxeexxinni ati no'oo xeertetteke boguwwa duuchcha'n he'nennek Yihudiink, Iyyerusaalemikinna duuchching Isira'eelik ardi bayyikinna kado shiqo he'nennek techchixxe barra'n shooko oddo'wineennen. 8 No'oke Duuchchi Woddike Goottaa! Hunjennexxe cubbonaa'n kexxeexxa no'o, no'ok moyanjuwwi, no'ok ja'laabuwwinna no'ok edik annuwwi shooko odo'wineennen. 9 Dada duuchchike Gootta no'oke Magenoo! No'o ate'ni jallantennaxxenna kaddoole ati gattowwaalikenna marartatoken. 10 Duuchchi Woddike Gootta no'oke Mageni'a ajajemmebe'non; erganjuwwa isixxe wabeeko darree'n no'o'n uwweeka seeranna heqqe'nebe'no. 11 Isira'eeliki ardi duuchchinna seera atika sa'edheen; atika ajajanna laqa gibeexxi udumi'a hige'een.

«No'onna ate'n cubbo hunjennaxxee Mageniinka erganjo, Muuseke seerike maxaafa'n borreessendemmaxxi badinonna murte no'o'n dhangalaasseten. 12 Jabaxxa ba'ne no'on iyyedagati no'o'ninna no'oke galcahlluwwa'n assiyyotee haasottettaka haaso'a muuxetteni. Iyyerusaalemi'ni assendeexxi yaane iimati butti'a haranga assendeba'a. 13 Muuseke seerike maxaafa'n borreessendemmaxxe qixxe'n tinni ba'ne duuchchi no'o'n dagge; kaddo malee'e cubbo no'oxxenaa'ni ille iima higatinna dhugaa atixxa hordofati Duuchchi Woddika Gootta no'oke Mageninaa'n elle alfinebe'no. 14 Duuchchi Woddike Gootti assaaxxe duuchchinni qullichchake kademmaxxee Duuchchi Woddik Gootti no'ok Mageni ba'ne no'o'ni geessissatenaa'n ille iima higeba'a; no'onna isi'a ajajemmebe'no.

15 «Ta'anna, atixxe jabaxxe anganni arda atika Gibtsee'n fulchitetteke, telchixxe barra qico'ninna hedhaaka gurra ifi'a adhdhitetteke ee dada duuchchike Gootta no'oke Magenoo! No'o cubbo hunjeenneni; ateenna balleessineenneni. 16 Ee dada duuchchi Goottaa! Assitettaxxe qullummatixxe hujuwwa duuchchi'a, hite'e atixxa woyyitte kooba, Iyyerusaalemike qachchinaa'n atixxa mufe hiissedhi; cubbo no'oxxinna edike no'oke annuwwixxi balleessa Iyyerusaaleminna atik ardi no'oke qararaken hedheek duuchchi'a gaciffachchotik kade'eeni.

17 «Ta'anna no'oke Magenoo anee erganjo atikixxa soodachchonna kadha laqi; ee dada duuchchike Goottaa! Atike summi'anni hite'e diigemeeke atike galmi'a alba ifi. 18 Ee, anke Magenoo laqi; ille atixxenni rakko no'oxxanna summi atik itti ye'emeeke qachchixxa ba'ne uudi; no'o atee kadhanta'ennechchi no'oxxe qullummatixxeete kaddebaak atixxe lumoxxe marartexeeten. 19 Ee, dada duuchchike Goottaa Caqas! Ee, dada duuchchike Goottaa gattowwaal hiyyi! Ee, dada duuchchike Goottaa! Hinaanexxa caqasse assi! Atike qachcha'ninna atike arda'n atik summi ye'emeemmaxxee anke Magenoo turtoxxe'e.»

20 Ani haaso'a'ninna ifixxa cubbo'anna Isira'eelii'i anke ardixxa cubboo faaci'wa'n eettene isixxe woyyitte koobaxxeenna Duuchchi Woddika Gootta anka Mageno kadhata'n, 21 ani soodata'ennenge'ni eettene edixxe waleella'n uudeennak manjichchi, Gabiri'eel galgalike tolchixxa yanna anibaa wiinamik phirrisa'n dage.✝ 22 Isinna ane'n barriseexxi hiyyee qici, «Ta'a ani koo Daani'eeli ati'a beekkumakanna qalbeeffachcho uwwonna dageennen. 23 Ati lumoshsha eeyyende'etteke kaddeettaxxee ati soodachcho eettene reefi saffettaxxa yanna'ninni hiisichchi ati'a uwweme'een; aninna tenneenni ate'n kulona'a dageenne. Tennexxee tenne erga hubat, leella teenenna qalbeeffati.

24 «Xaqaro gatiso'aa, cubbo gabalo'aa, balleessa faaci'o'aa, duuchchi woddixxa qullumma iyyedago'a, waleellatanna raaga maxxanso'anna hara woyyitte bakkanna hariiro'a atike ardixxeenna atike woyyichcha qachchixxee torbaane tomme torba lalabende'een.

25 «Tennexxe egendattoxxinna qalbeeffatattoxxi yaane; Iyyerusaalemi haarensendo'anna qamachchendo'a lallabi fulaaxxe yannanaa'n iikki Hariiremeek galchalli dagaa qico'n torbaane tomme torbanna jiyaane tommenna lame torba saxxaan; Iyyerusaaleminna ifike oruwwininna ifike dalla'uwwininni qammachchenda; kaddo malee'e tinni kaddaak rakkotixxe yanna giddoni. 26 Eettene jaane tommenna lame torba uduma iikk Hariiremeek shiyemaan; isi'a gataachchi mittichchinna hedhebaan*. Ookkone dagaake galchallik ardinna dageexxi Iyyerusaalemika qachchanna ookkone woyyichcha galma diigaani; tenne yaannexxi muuxenshanna lola'iinsha daggaani; muuxamii qico'ninna bagedi kadaan; ba'netinna lallabende'een. 27 Iikki sooreessinna mitte torba heddi manninni jabaxxa kako aagaani; eettene torbake gimisa'n shiqammaka tolchanna uwwa gatisaani; lallabendeexxi murte iso'n muuxendaa qico'ni ba'ne iyyedagaaxxa battitte yaane, ookkone woyyichchi galmi giddo* uurrisaani*.»✝