1 Nabukedentsoori moyeexxe langaxxe wogga'n oojjo oojjote; uudemmaxxe oojjo'ni alayyeemmaxxee dhiiphi isoo abixxa gibe. 2 Tennexxee isiba dangeexxi isi oojjotemmaxxa oojjo kullaashsha moramakiir, gojammakiir, diginte daggamammakiirinna urje laakko'ammakaara ye'emmaashsha moyanji ajaja sa'isse; insa'nenna dangeexx isi edo uurrine.✝ 3 Moyanjikinna insa'ne'a «Oojjo oojjo'teenan isexxa tika ege'nonna'a lumo qica yaadik wixxirri hiyyenne» hiyye.

4 Ookkoneechchi uduma urje laakko'ammakiir moyanjoke'n Aramayike laagadinni, «Moyanjo ati no'o'a lubbo gali! Oojjottettexxa oojjo no'oo erganjuwwa atike'n kuli ati'a tinkannon» hine.

5 Moyanjikinna urje laakko'ammakeera'n hiisse hiyye haaso'ee qici, «Eettene oojjonna isexxa tika ane'ni kula gophphinoole kochchiisendine'naa'a minuwwi ha'nokinna oletixxe tuulo kadaashsha murennen. 6 Yaane kinni eettene oojjonna isexxa tika ane'n kuldinoole uwwatanna gica lumooka ulfinnanna anenaa'n alfitinaan; tennexxee eettene oojjonna ane'ni kulle; iseenna ani'a tikke.»

7 Insa'ne hiissineexxi, «Moyanjoo! Oojjo atixxa no'oo erganjuwwa atike'ni kuli; no'onna tika isexxa ate'ni kullanon» hine haasonne.

8 Moyanjikinna hiisseexxi insa'ne'a hiyye haaso'ee qici, «Ani mudhdhenexxa jabaxxa murte egendineemmaxxee yanna qeerrisate'e hassina'neexxa ane'n aagge'een. 9 Eettene oojjo ane'ni kula gophphinoole mitte bifaxxe mura woxa ha'noo heqqitaan; tinni yaane jijjiirendaaxxe hitine hediyyot dedhiinkanna fuggichcha yaada ane'ni kuldino'a weli aaggine'eni; tennexxee oojjo eettene'e ane'ni kulle; tika isexxanna ane'ni kula dandeettina'neexxa tennenni ege'nannon.»

10 Urje laakko'amakiirinna moyanjoke'n hiissine hinee haasonee qici, «Moyanjoo! Ati qortetteke qortumi'a dande'e hiissichcho hiissaak manji tenne butta'ni afemabaan! Huuni moyanjinna hoonee qiconna lumokenna hunnaamessa kadoolenna iitta hexxeexxa yaane moraaka, doochchaaka, yookaan urjuwwa laakko'aakaara qore ege'nebaan. 11 Moyanjoo! Ati qorta'ettek qortum hara rakkisaaken; manjiinke beltixxe oddo'n hedhabaake magenuwwa malee'e ayyinna tennee oojjo moyanjokee'e tikaaki hedhebaan.»

12 Tinninna moyanjo yo'oshsha aare gubate; Baabiloon giddo hexxeexxa beekkole duuchchanna shiyendaashsha ajaje. 13 Beekkole duuchchanna shiyendaashsha ajaji fule; Daani'eelinna isika jaaluwwanna hanse shinnaashsha manni ergeme.

14 Moyajiinke heqqanjuwwik ajajalli Aryooki Baabiloonixxa beekkole shiyo'a dagee wodda Daani'eeli isiba mareexxi beekkumikinna maliki isoo'o yaansiise 15 Isinna moyanjiinka ja'laaba Aryookii'i, «Moyanji konne wiinameeka ajaja mayee fulaashsha asse?» hiyye qore; Aryokinna tenne yaane Daani'eeli'n ifise.

16 Eettene yanna Daani'eelinna e'yeexxi eettene oojjo isi'a tiko'a yanna isi'a uwwendo'a moyanjo qore. 17 Ookkoneechchi uduma Daani'eelinna ifike minibaa ille iima higeexxi ifika jaaluwwa Hanaaniyya'n, Misa'eeli'ninna Azaarya'n yaane ifise kule. 18 Isinna isike wele jaaluwwi gatemmaxxe Baabiloonixxe beekkolenni welt mitteba shiyemabaashsha iimik Mageni insa'ne'a mararo'anna eettene buqo yaane ifiso'a soodantaashsha ege'nishe. 19 Eetteneen hashsha iitti buqo yaane waleellati Dani'eeli'n iffe; Dani'eelinna iimika Mageno saada'ni hiyyee qici,

20 «Beekkumikinna hunna isixxe kaddeemmaxxee

Mageniink summi duuchchi woddi'a saademowwaal!

21 Isi yannatanna sanne jijjiira

moyanjuwakanna mootete'n ofo'lishaani; ookko'ninna dirisa;

isinna beekkuma beekkoletee ege'natanna qalbefataakeeri'a uwwa.

22 Isi xilki hite sho'ondeexxa yaane ifisa; dukkanate'n hedheechcho ege'na;

ifikinna isinni welti hedhaani.

23 Anke edike annuwwike Magnoo! Atee galateeffata'ennen; atee saada'enneni;

atee qorennexxa yaane ane'n ege'nishetten,

beekkumakanna hunna ani'a uutetteni;

moyanjiinxa oojjo no'o'a tikketteni.»

24 Ookkoneechchi uduma Daani'eeli Baabilonixxa beekkole shiyyendaashsha moyaanji ajaja uwweemmake Aryookibaa mareexxi iso'n «Baabiloonixxa beekkole shiltoxxe'e; moyanjinbaa anee iyyemar; aninna oojjo isixxa isi'a tikannon» hiyye.

25 Aryookinna rakeexxi Daan'ieelii'i moyanjo Nabukedenetsoori edo shiqisheexxi, «Moyanjoo! Atixxa eettene oojjonna isexxa tika ati'a ifisaaka booji'emeeke Yihudiinke manninaa'n mitte manjo afeenneni» hiyye.

26 Moyanjikinna Bilxasoor hiyyemeeka Daani'eelii'i, «Oojjotennexxa oojjonna isexxa tika ane'ni kula dandettatto?» hiyye qore.

27 Daani'eelinna hiyyee qici, «Moyanjoo! Ati qortettexxa buqo yaane beekkole yookaan moraakiir, yookaan faro uudaakiir yookaan gojaakiir moyanji laqeexxa buqo yaane tika ati'a dande'aak hedhebaani. 28 Yaane kinn buqo yaane duuchcha ifisaak Magen iima hedheeni; isinna dagaake baruwwa'ni kaddaaxxa yaane duuchcha atee moyanjo Nabukedenetsoori'ni leellishe'een; ati taqete'n diiphphee'naa sammo atixxi giddo hexxemmaxxi oojjonna waleella konnechchi butta hexxeexxen.

29 «Moyanjoo! Taqete'n diiphphe'naa atixxi sammo edi'a kaddaaxxa yaane heddamman; buqo yaanek ifisallinna edi'a kaddaaxxa yaane ate'ni leellishe. 30 Tinni buqo yaane ani'a iffeeki ani wele manninaa'ni lumooka beekuma afennexxeetebaani; yaane kinni moyanjoo, atixxe oojjoxxa tika egendotta'anna atixxe sammo giddo heddaattaxxi yaane maachcho kaddeexxa qalbeefattota'aaten.

31 «Moyanjoo! Ati edo heenobaaxxa cala cala hita'neexxanna hara sodaachchisa'neexxa misile uurrite'naa affetten. 32 Tenne Misilek umi, luqqitte worqeke, isixxi qomanna hirre biretike sibljinni, isek godobinna hidhi iseki sageetotike sibljinni hujemeekemmani. 33 Tafuwwi isikinna sibljiinke, isixxi lekkuwwanna gamisi sibljinxenna gamisi faariik hujendeexxe. 34 Ati tennee misile uudande'n hexxxee'naa manjiinxi anga tuqqebaangi mitti kinji fottoqeexxi faarinxanna sibljinxa isexxa lekkuwwa ganeexxi bulleesse. 35 Eettenne yanna'ni iikkki siblji, iikki faari, iikki sageettotik siblji, iikki birretik sibljinna iitti worqe mittenba bulloottexxi aldummete'ni hedhemmake bonike huura kadde; diidallotinna mittechchonna gatissebaang huura ookkone filte adhdhite; yaane kinni eettene misile ganemmak kinji lumooxxe kooba kadeexxi butta duuchcha wo'me.

36 «Iitti oojjo tennetemman; ta'a tika isexxanna atee moyanjoke'n kullaannen. 37 Moyanjoo! Ati moyanjuwwiinke moyanjon; iimiki Mageni mootummatanna baallooma, hunnatanna ulfinna ati'a uwwe'eeni. 38 Manjinxa sanne, biniichakanna ci'a duuchcha anga atixxe'ni sa'isse uwween; kunnichchuwwi hoone booncho'ninna hedheexxe kaddoole atee isi konne duuchchingike galchallo assedheen; yoona ati worqetike umo ookkoneten.

39 «Ati uduma atenaa'n shiixxexxaaxxi wele mootumma mootaan; itti aandeexxi iitti sageettotike sibljinni fakkeessendeexxi, sakkaxxi mootumma butta duuchcha'n moottaan. 40 Udumixxe yanna'ni yaane duuchcha enqe bulleessammake jabake siblishsha hexxeexxi sholgaxxi mootumma moottaan; sibili duuchchingechcho enqe bulloossammashsha ise edi darre hexxemmaxxa mootummuwwa duuchcha enqitee bulloosittaan. 41 Iitti lekkuwwanna qubba gamisi faara gimisi sibilo kaddee'naa uuddeteshanni iittanni qoqqoodendeexxe mootumma kaddaan; yaane kinni faarikinna sibil makemee'naa uuddetteshshanni tinni mootumma gamisa sibliinke jabeenna affaan. 42 Iitti lekkatixxi qubba gamisi faara gamisi sibilo kaddemmashshanni tinni mootumma gamisi jabaxxe, gamisi shaqqqaxxe kaddaan. 43 Sibil faarik makemee'naa uuddetteshshanni ardikinna makemeeke kadaan; yaane kinni sibil faarik weli abixxammabaashshanni ardi mittummati mitteba hedhabaan.

44 «Tenne mootumuwwake baro'n, iimik Magen haranga baxxabaaxxa wele manni'anna saxxe uwwendabaaxxa mootumma uurrisaan; isenna wele mootummuwwa duuchcha bulleessiteexxi booso balleessitaan; yaane kinni ise umo ifikenni duuchchi woddi'a hexxaan. 45 Manjiinxi anga tuqqebaangi koobatenaa'n fottoqeexxi siblo, sageetotika siblo, birretika siblonna worqe bulleessemmake ookkone kinjixxe leellaxxi tika tenneten.

«Lumoki Mageni edi'a kaddaaxxa atee moyanjoke'n leellisheen; iitti oojjonna dhugaatixxen; tika isexinna addatendeexxen.»

46 Ookkoneechchi uduma moyanji Nabukedenetsoor Dani'eel edo albik gonbisemeexxi Daani'eeli'a sagade; isonna ulfeesseexxi tolchikinna hixaan isi'a uwwemaashsha ajaje. 47 Moyanjikinna Daani'eelii'i, «Tenne buqo yaane tika dandeetteetten, dhugaandinni ha'nok Magen magenuwwiinke Magenonna moyanjuwiinke dada duuchchike Gootta, buqo yaaneke ifisallon» hiyye. 48 Ookkoneechchi uduma moyanji Daani'eeli luumoxxe baalloomiinxe bakka'n ofo'lisheexxi heddo lumollamma uwwa isi'a uwwe; duuchchinge Baabiloonike awuraajjike galchallonna isoo asse; Baabiloonixxe duuchchiinxe beekkole hananna isoo sooreessake asse. 49 Daani'eelike qortuminni moyanji Sidiraaqii'i, Misaaqiinna Abidenaago'o duuchchinge Babiloonike awuraajike galchalluwwa asse baalloonse; Daani'eel kinni moyanjiinke mootommatike mini'ne offo'le.