1 Medoonichchi Daariyoosi moyexxe siretixxe wogga'n ani isoo gargaronna'anna isi'a faachcheffatonna'a isi bira uurre'enan.

2 «Ta'a ani ate'n kula'ennechchi dhugaaten: Isinna ane'n weli sasi moyanjuwwi Faarsi giddo moyaan; itti aanaak sholgak moyanji wele konne moyanjuwwi duuchchinaa'n sa'aake dureessa kadaan. Isi durummatixxa hunna jabeessedheexxa yanna Girkeexxe mootumma'n wele duuchchi ke'aashsha assaan. 3 Ookkoneechchi uduma lumoxxe hunnakinna fedhii ifixxishsha assaak gootti moyanji moyaan. 4 Yaane kinni isi yo'oshsha hunnamessake kadaa wodda mootumma isixxi diigende shooliini darre'ni qoodendaan; isixxe bakka'ni horet isixxe kadebaak moyanjuwwi tukkeesseman. Kaddo malee'e insa'ne giddii'ni mittikinna isishsha hunna afabaan. Tinninna kaddaachchi iiti mootumma diigende'na'a higgeenn welekee qoodendammaxxeten.

5 «Bita'ik moyanji lumooshsha jabaata; kado malee'e isik bagediinke ajajalluwwinaa'n mitti isinaa'n sa'eexxi jabaatee'na'a mootumma isixxinna jabaxxa hunna affeexxe kadda. 6 Shiixxooxxe wogguwwa uduma weli aangeexxi mitteke kanda; Bita'ik moyanji weli aaggotee ifixxa belto Middike moyanjo'n heerunsiisa; yaane kinni ise affemmaxxa hunna gophpha; isotenna kadi hunna isixxi turtaba'a; ookkone baruwwa'n ise ifixxe mootumake erganjuwwinni, ifike anninninna isee kiphammarni welti sa'issendeexxi uwwenda.

7 «Yaane kinni iseke firanaa'n mitti bakka isexxa abido'a ke'a; Middike moyanjika sannachchuwwininna lolemma; kollo insa'nexxanna enqe e'yeexxi insa'ne injifata. 8 Insa'neka magenuwwa, insa'nexxa sibiliinxa misuluwwanna insa'neka ulfaateeka birretike sibilkanna worqetika mi'uwwa booji'eexxi Gibtsee'a adhdhe me'aani; shiixxoxxe wogguwwa'anna Middike moyanjinni lolema waala. 9 Ookkoneechchi uduma Middik moyanji Bita'ike moyanjika boga lolaani; yaane kinni ifike bogibaa ille iima higaani. 10 Sooriyake moyanjixxi labbaxxi oosenna lolakee qixxeeffattaani; naaphiinxa kollo qico'n marte loliyyoti, dande'emmabaake lola'iinsha fiyaaka lumoka sannachcha bukki assitaani.

11 «Ookkoneechchi uduma Bita'ik moyanji mufet ke'eexxi Middika moyanjo lolaani; middik moyanji lumooka sannachcha bukki assoolenna midde injifatemaan. 12 Bita'ik moyanji heddo sannachcha booji'eexxa yanna hollati ifi duka; heddo kumuwwa'ni laakko'emaaka mannanna shiya; kaddo malee'e injiffachcho eettenenni hedhabaani. 13 Middik moyanji edikinenaa'n sa'aaka wele sannachcha bukki assa; heddo wogguwwa uduma loliinka miya geyaa qico'n ka'leeke jabake sannachchinni welt ille iima hige dagaan.

14 «Ookkone baro'ni heddi manni Bita'ike moyanjo'n ke'a. Tenne waleella'n leellitemmaxxi yaanuwwanna muuxendo'a atike ardi giddii'n heddi jallichchi manni ka'aani; kaddo malee'e insa'ne'a qajeeldabaani. 15 Middik moyanjinna dage buttina tullubeexxi kinjiinke dalla'ika qachcha abidaani; Bita'ik moyanjinna faachcheffataaxxa hunna afaba'a; muxxe fuleek insa'nek loliink sannachchi midde uurre dande'e lolabaan. 16 Iikki lolammaki eeyyeexxe assaani; ayyinna dande'e isoo uurre lolabaani; ookkone Eloka Boga galchaan; isonna balleessaaxxa hunna afaani. 17 Ifixxe mootumma giddo hedheeka sannachchi duuchchinni dagatee mudhdhaani; naaphiinxa mootummanna ibisatee ifixxa belto iso'ni heerunsisaan; kaddo malee'e yaadi isik qajeelabaan yookaan isi'anna woyif ulabaani. 18 Ookkoneechchi uduma abbaayyatixxe gabala'ni hedheeka boguwwibaa wirri hiyyeexxi konnerinaa'n heddo abida; yaane kinni bagediink mitti ajajalli holla isixxa isonaa'n balleessaani; hollatika isika haaso'anna iso'ninni muuxemaashsha assa. 19 Ookkoneechchi uduma ifike boga'n hexxeexxe kolluwwaba'aa ille iima higaan; yaane kinni guggufate ibaani; langaxxanna afemabaani.

20 «Isixxe bakka'inni tukke dagaakinna, isixxe mootummaka ulfinna heqisatee irbo bukka ssaaka ergaan; kaddo malee'e mufet yookaan bagedik kaddebaang heenoxxe yanna giddo shiyema.

21 «Isixxe bakka'n tukke dagaakinna mootummatika ulfinna isi'a uwwabaak tuffatemeeke manjon; isi ardi nage'ik afo'le hedhe'naanni laana dageexxi dedhiseexxi mootumma eettene abixxa. 22 Ookkoneechchi uduma isi edo hedhaak, ookkone kakotike sooreessa kadeeki gatebaang lamiing mitteba kutti hiyyaan. 23 Isinni welt weli aageechchi uduma dedhisatixxa huje huja; heenok manninni weltinna baalloomaan. 24 Duromeeke awuraajuwwi nage'ik hedhe'neenge'n dageexxi konee awuraajuwwa abixxa; isike edike annuwwik annuwwinna assebaaxxa yaanenna assaan; isi'anna qajeeldaani; mulqedhemmaachcho, booji'emaachchonna karra duuchcha ifixxe hordofeeyye'a qoodaani; kolluwwatanna miidho'a yaada abixxa; tenneenna assaak heenoxxe yanna calla'aten.

25 «Lumoka sannachcha qixxeesseexxi hunnatinna onno'ati Bita'ike moyanjo'n ke'isiisa; Bita'ik moyanjinna laakkossi hara bira sa'eeka, hunnamessa sannachcha abixxeexxi bagedo bana; yaane kinni isi'a migiremeeke yaadanaa'n kexxeexxa isi'a qajeeldabaani. 26 Moyanjiinxe qorenaa'n welt ita'ammakiir isoo balleessatee ke'aani; sannachchi isikinna kurbu assemmaan; heddi manninna bagedoke'n reyaan. 27 Godobi insa'nek fuggoxxibaa dooqeek lami moyanjuwwi mitte qore'n ito'a mitteba'a ofo'leexxi weli'anni weli dhara haaso'a; yaane kinni murendeexxi yanna geya gophpheemmaxxee insa'ne'a qajeeldaba'a. 28 Middik moyanji lumoxxa karranni ifike bogibaa ille iima higa; kaddo malee'e godobi isik fuggoxxenni eettene woyyitte kako'n hedha; ise'n hedeexxa asseechchi uduma ifike bogiba'a ille iima higaani.

29 «Eettene murendeexxe yanna'n ille iima higeexxi langaxxa ookkonee Bita'ika boga abida; kaddo malee'e eettene yanna'n kaddaaxxi yaane edi woddixxenaa'n gargar hexxeexxe kadda. 30 Qophiroosik markabuwwinni dangeexxi isoo lollaammaxxee, isinna godoba gura; hige dageexxi jabaxxe mufenni eettene woyyitte kako'n ke'aan; ille iimanna higeexxi eettene woyyitte kako waalemmakaara eloxxenni uudaan.

31 «Isik loliink sannachchi ookkonee woyyichcha galmanna dalla'a battoossatee ke'eexxi duuchchi woddika tolchanna gataashsha assa; ba'ne iyyedagaaxxa battitte yaanenna uurrisaan.✝ 32 Kako digaakara duuchcha, moyanji sobik dedhisaan; Mageno ifika ege'neek ardi duuchchi kinni jabaate isoo ifinaa'n hoyyedhaan.

33 «Yaanetee insa'ne wolaantichchik shiyemoole gubemoole, booji'emoolenna mulqemoole beekolete kadeek manni heddo manna barachchiisaan. 34 Insa'ne tenne rakko'n inbaa wodda shiixxoka gargaarsa gargaaremma; heddi manninna dharik insa'nenni welti mitteke kada. 35 Tenne beekkolenaa'n mitti mitti manni muuxamiinke bari qico'n qorqorsemo'a, luqqi hiyyo'anna ca'a hiyyo'a ibaan; tinni yaanenna kaddaaki iitti murendeexxi yanna geltaa qico'niten.

36 «Iikki moyanji eeyyeexxa assaani; isinna wele magenuwwi duuchchinaa'n ifi lummisaani; magenuwwiinge umo kadeeke Mageno'ninna hollatika afo'o fulchedhaani; iitti murendeexxi muuxema hasissammaxxee Mageniinxi aare muuxendaa qici'a isi'a qajeeldaan.✝ 37 Isinna ifike edike annuwwika magenuwwa bashshi hiyya; melaalle eetaaka magenuwwanna tuffata; wele magenuwwi iimi darrenna ifi lummisammaxxee wele magenuwwa mittichishshanna laako'aba'a. 38 Konneer irra kollo heqqaaka mageno ulfeessa; edik isik annuwwi ege'nebaake mageni'a worqe, birret sibilo, fiixxeexxa kinonna wele fiixxa uwwaara, uwwiyyot ulfeessa. 39 Kolluwwa isixxa isi'a heqinaashsha alaga mageno magenooffataaka manna la'ooffataani; galcha isixxa eeyyake duuchchi'anna lumoka ulfinna uwwiyyot lumoxxe baalloomma'n insa'nee ofo'lishaani; isi'a assineexxe yaanexxeenna boga insa'ne'a qoodaani.

40 «Ookkone muuxamiinke baro'n Bita'ik moyanji iso'n lolik ke'aan; Middik moyanji fadhadikinna sarageelluwwik heddo markabuwwinni isoo jabaxxe hunnanni lolaan; heddo boguwwanna abixxaan; lola'iinshanna fiya'n konne boguwwixxe oddonaa'n sa'aan. 41 Isinna ookkone Eloke Bogibaa e'yaani; heddo boguwwinna anga isixxe'n ibaan; kaddo malee'e Eedoomik, Mo'aabikinna Amoonik akeekisanjuwwi anga isixxenaa'n gataani. 42 Heddo boguwwanna abixxaan; Gibtseek boginna gataba'a. 43 Gibtseexxe worqexxinna birretika sbiljixxa tuulo iittanni isexxi karra duuchcha ifixxe assedhaan; Tophiyiinki, Libiyaki manninna isi'a hiremaan. 44 Yaane kinni borotenaa'ninna middii'n daggaaxxi odo isoo alalshitaan; heddo manna balleessateenna biratee jabaxxe mufenni ke'aan. 45 Moyanjummatixxa ifika dunkaanuwwa, abbaayyuwwatixxxe oddo'n hexxeexxe eettene dancha woyyitte kooba'n oltaa; kaddo malee'e muuxamake'n isinni ba'aan; ayyinna isoo gargaaraak ayyinna hedhaba'a.»