1 Moyanji Nabukedenetsoor ejjuma jaane tomme ciqile, godoba jaane ciqilexxa worqetixxa misile giissiseexxi Baabiloonike awuraaja'n Duurake diida'ni uurrise. 2 Ookkonneechchi uduma ja'laabuwwa, jalqabuwwa, boginka galchalluwwa, gorsalluwwa, miya massinammake minika sooressuwwa, hayyichchuwwa, wele seerinka muxxalluwwanna awuraaja awuraaja'n hedheeka jalqabuwwa duuchcha uurriseemmaxxe misilexxe eebbatike ayyaani'a dangaashsha ye'e. 3 Ja'laabuwwi, jalqabuwwi boginka galchalluwwi, gorsalluwwi, miya massinammake minik sooressuwwi, hayyichuwwi, wele seerink muxxalluwwinna awuraajja awuraajja'n hedheeka jalqabuwwa duuchcha moyanji Nabukedenetsoor uurriseexxe misilexxe eebbatike ayyaani'a bukki hineexxi misilet edo uurrine.

4 Ookkonneechchi uduma lallabammak qonqo gikki asseexxi hiyyee qici, «Koo arda, gosa gosakenna gargar hedheeka laagada haasottinaak duuchchi: 5 Malagatiinkanna inbiltiinka masinqotikanna kiraariinka, baganiinkanna suusu'letika iittanni sirbi duuchchika hafuura laqinaa wodda moyanji Nabukedenetsoor uurseexxe eettene worqetixxe misile'a kumbu hitine sagade. 6 Kumbu hiyye sagadabaak huun manjinna hedheexxe kaddoole ille iima goolendeexxe giirake bubenji giddo hunemaan.»

7 Tennexxe malagatinkanna inbiltiinka, masinqotikanna kiraariinka, baganiinkanna suusu'letika sirbi duuchchika hafuuranna laqee wodda iikki woddi ardi duuchchi, moottummuwwatinna gargar gargar hedheeka laagada haaso'aak manni moyanji Nabukedenetsoor uurriseexxe eettene worqetixxe misile'a kumbu hiyye sagade.

8 Eettene yanna Baabiloniki manni edi'a dageexxi Ayihudoota ku'le. 9 Insa'nenna moyanjo Nabukedenetsoori'i hinee qici, «Moyaanjo! Ati lubbo gali! 10 Moyaanjo! Ati malagatinka inbiltinka masinqotika, kiraarinka, baganinka, suusu'letikanna sirbi duuchchika hafuura laqeek duuchchi eettene worqetixxe misile'ni kumbu hine sagada hasissaan. 11 Ayyinna butta wabbi hiyye eetene worqetixxe misile'ni sagada gophoole goolendeexxe giirake bubeno'ni hunemaan. 12 Kunse Baabiloonike awuraajji giddo galchate'n uggitettek Ayhudoot Sidiraaqi, Misaaqinna Abidenaago ajaja atika mitteechcho hanqisa'neen; magenuwwa atike ergatema'neba'a ati uurrisettexxe eetene worqetixxe misilenna sagandabaan.»

13 Moyanji Nabukedenetsoorinna lumoxxe aarenni Sidiraaqi, Misaaqinna Abidenaago ye'iseen; insa'nenna moyanji edo dange. 14 Naabukedenetsoorinna insa'ne hiyyee qici, «Koo Sidiraaqi, Misaaqinna Abidenaago! Ha'no anke magenuwwa'ni ergatema gophanna uurrisennexxe misile'a sagada gopha tinni dhugaate? 15 Yoona ta'a malagatinka inbiltinka masinqotika kiraarinka, lumoka kiraara, suusu'letikanna sirbi duuchchi hafuura laqqina wodda ani uurrisennexxe eetene worqetixxe misele'a wabbi hitineexxi sagadineele eloxen: sagada gophphinoole kinni iikki woddi goolendeexxe giiratike bubeno'n hunendinaan; anga anxenaa'n ha'no'o anjira dande'aak hoone mageno?»

16 Sidiraaqi, Misaaqinna Abidenaago moyaanjoke'n hinee qici, «Moyaanjoo! Tenne yaane uudaaxxenni ifinaa'n faachcheffatatee no'o hissichcho ati'a hissa hasisabaan. 17 Moyanjoo! Goolendeexxe giirake bubeno'n hunemonnole iikki ergatemaannek Magen isenaa'n no'o anjira dande'aan; anga atixxenaa'ninna no'o gatisaan. 18 Yaane kinni Moyaanjoo! Isi no'o anjira gophoolenna midde magenuwwa atika magenoonfantabo'noxxanna uursetexxe eetene worqetixxe misile'ni sagandaabe'noxxa ege'n.»

19 Eettene yanna Naabukedenetsoor Sidiraaqi'n, Misaaqi'ninna Abidenaago'n yo'oshsha mufate'naa'a albi wele bifa idaqqe; giiratinna edi qiconaa'n caala torbaane anga eetene giira goolaashsha ajaje. 20 Sasinga mannanna usurree ha'yita'neexxe goolinxe giira'n darbinaashsha ifike loliinke manni giddii'n jajjaba manna ajaje. 21 Tennexxee kunni manni qeerraxxa seemma, bolaaluwwa umiinxa ruufaranna wele seemmuwwa oddo'winemmashshanni usuremeexxi ha'yita'neexxe goolinxe giira'n hunemme. 22 Moyanjiink ajaji hara wiinanseek kadeemmaxxe goolinxi giira jaba qicinni ha'itemmaxxe giiratik buben Sidiraaqi, Misaaqinna Abidenaago'o iyyemare giirate'n hunemmaka loliinka manna shilte. 23 Sasing kunni manninna usurememmashshanni goolendeexxe giira'n inbe.

24 Ookkonneechchi uduma moyanji Naabukedenetsoor mambe'a hiyyot offo'lebaa'n qophphi hiyye ke'eexxi, «Ussurre giira giddo hunneennak manni sase callammabaa?» hiyye qore.

Insa'neenna, «Eeti, moyanjo» hine hisine haasonne.

25 Moyanjikinna, «Kunnise usuremebaaka miidhemebaaka giira giddo mammarema'neeka shoole manna uuda'enne; sholgakkinna magenoonfantamakike belto laba'neen» hiyye.

26 Eettene yanna Naabukedenetsoor ha'yita'neexxe goolinxe giiraba'a shikki hiyyeexxi, «Koo Sidiraaqi, Misaaqinna Abidenaagoo, Lumoke Mageniinxe garboolee amme fulle! Kaba'a amme!»

Tennexxe Sidiraaqi, Misaqinna Abidanaagoo giira giddii'n fulle. 27 Galchalluwwi, ja'laabuwwi, moyetike minik mari'etik manninna dowwe insa'nexxe'n bukki hiyyeexxi insa'eneke umik ordichcho midde giira qunxu assitebaaxxa afe; oddoono insa'nexxixxi shibilli hitebaan; wiliilletik fooli midde insa'ne tuqqemmabaan.

28 Ookkonneechchi uduma Naabukedenetsoori hiyyee qici, «Iimika ifika erganjo ergeexxi anjireek Sidiraaqiki, Misaaqikinna Abidenaagooki Magen saademowwaal! Insa'ne iso'ni addatemati moyanjiinka ajaja qaxxaamurat ifika Mageno malee'e wele mageni'a ergatematenna kaddo isoo sagada gibati hedho ifixxa sa'issine uune'een. 29 Tennexxe'e iitta anjiraak weli magen hedha gopheemmaxxe Sidiraaqike Misaaqikenna Abidenaagoke Mageno'n fuggoxxenni bucuqqi hiyyaak heene gosaki ardi yookaan gargar hedheeka laagada haaso'aakir duuchchi kochchisemmee'na'a minuwwi insa'nekinna oletixxe tuulo kadaashsha ajajenne.»

30 Ookkonneechchi uduma moyanji Sidiraaqi'i, Misaaqinna Abidenaago'o Baabiloonike awuraajji giddo baaloonse.