1 Tsiyooni giddo xoo'mamik hexxineekenna,

Semaariyaxxe kooba hana mitte godobinni ofoldineekee,

Isira'eelik ardinna gargaarsakee ha'noobaa daagakee,

ha'noo gosa gosak ardike akeekisanjuwwaa ha'no'aa aannee!

2 Kaaline'a me'ee, isoonna uudde;

ookko'ninna lumoke qachchibaa Hamaati'a me'ee.

Filsixeemike qachchibaa Gaati'a aadadde dirre;

insa'neke bogiki ba'linni ha'nookenaa'ni sa'aataa?

3 Ha'noo fuggoxxa barra bayyisinaakee,

miicamik galchitina'n shiqishshina'neekee ha'no'aa aanne'ee!

4 Daana'iinixxe issoni hunjeexxe ma'na'ni diiphphina'neeke;

quphphite ha'nooxxe taqe'ni fenxee hitina'neeke,

Gedhebi giddii'ni buruusa,

godhetenaa'ni jibichcha itinaa'neke ha'no'aa aanne'ee!

5 Faarsatee elaasha giisemebaake lumok baganinni Daawwitisha sirbitinakee,

faarotike miyinni geebbino'a yortina'neekee,

6 Woyinetixxa bookanna waabake'ni ha'witina'neekee,

hara fiixeexxa shittonna issatina'neeke,

Isira'eelike arda'ni kinni gelteexxe rakkoxxee yaaddina'nebaakee ha'no'aa aannee!

7 Tennexxe ha'noo edise booji'eemmaammake manni giddo hexxinaan;

ha'nooxxi fenxee hiyyanna ha'nooxxi dayya'a gattaan.

8 Lumooki Duuchchi Woddiki Gootti,

«Isira'eelike ardixxa ifi duka jibbeenneni.

Ani insa'neka seesemeeka mootummatika minuwwa boshshedheenneni;

ookkone qachchuwwi giddo hedheeka manna duuchcha,

Naaphakee sa'issee uwwaannon» hiyyeexxi ifi'ni kakateen.

9 Mitte mini giddo tommi manji calli gatoole iikki midde reyan. 10 Ookkone reyeemmaka manna minii'ni fulche giirate'ni gubaak mitti shiqike fira kadeek dageexxi ookko mini giddo sho'omee hedheeka mitte manjo ye'eexxi, «Atinni welti gateeki weli manji hedhee?» hiyyee wodda, isinna «Mittikinna gateeki hedhebaan» hiyyeexxi hiisaan; ookkonneechchi uduma, qoreemmaki manjichchinna isoo «Duuchchi Woddike Goottika summa ganaa dandeennabo'noon sammi hiyyi!» hiyyaani.

11 Kunnise Duuchchi Woddik Gootti ajaja uwwe'een;

isi lumollama minnuwwa diigan;

shiixxaramma minuwwanna bulleesaan.

12 Fadhadi care giddo qolchaata?

Manjitaa ookko hana qottiyyoti wiilsa dande'aata?

Ha'noo kinni dhugatixxa murte fuggobaa,

qullummataxxa gummanna qaraaratibaa jijjiirtineen.

13 Ha'noo Lodobaarika qachcha lolidine injifatati gammadine'eek,

«Qarinayimika qachchanna hunnaa no'oxxenni adhdhinenneni» hitina'ni burraaqqina'neeke.*

14 Lumoki Duuchchi Woddiki Gootti Mageni hiyya'nee qici,

«Koo Isira'eelike ardaa! Ani middixxe Hamaatixxe hulanaa'ni bita'ixxe Arebaaxxe dhooqa qiconi

Ha'noo rakkisaaka arda ha'noo'ni

ke'isannon.» hiyya'neen.