1 Duuchchi Woddik Goottinna,

«Mo'aabik ardi cubbonde'ni lebee cubbo hujeemmaxxee'e,

mitte mami belo inisa'nee mura woxisannon.

Inisa'neenna Eedoomike moyanjiinxa miqe

soodo kaddaa qico'ni gube'e bululoke assannon.✝

2 Aninna Qeryootixxi kolluwwa itendaashsha,

Mo'aabi'ni giira woranno.

Mo'aabik ardi lolammake mannike caancinninna malagatinke hafuurixxe raare giddo,

lumoxxe weekkenshanni reyaan.

3 Mo'aabike bogika galchalluwwa kutti assanon;

sooressuwwa iseka duuchcha isenge moyanjinninni welti shiyannon;» hiyya'neen Duuchchi Woddik Gootti.

4 Duuchchi Woddik Goottinna hiyya'nee qici,

«Yihudiinki ardi cubbonde'ni lebee cubbo hujeemmaxxee'e,

mitte mami belo inisa'nee mura woxisannon. Inisa'ne seera anka sa'ne'eeni.

Duuchchi Woddike Goottika seeranna tuffante'een;

ajaja ankanna heqqe'nebaan;

Annuwwi inisa'neki hordofaammaki

dharichchi magenuwwi inisa'neenna dedhise'eeni.

5 Iyyerusaalemixxi kolluwwa itendo'aa,

Yihuda'ni giira worannon.»

6 Duuchchi Woddik Gootti hiyyee qici:

«Isira'eelik ardi cubbonde'ni lenbe cubbo hunjeemmaxxee'e

mitte mami belo insa'nee mura woxisannon.

Inisa'ne liqa liqqeesedhe hiissa gopheeka qullichcha manjo biretike sibljo'ni

rakkichcha hidhdheexxe kophekaa hira uwwa gopheeka hiyyeessa garbake kado'a gurgurreen.

7 Hunna afebaakanna gargaaraaka

hirbeesina'neeni;

umo ifika heeshshi assaaka shaqqake mannika manjo elobaake assinaan.

Annikinna belti laminigi mitte manjichchonni welti yabaabullaan;

tenne insa'nexxe hujenni qullichcha summa anka battoossinaan.

8 Liqa liqqeeffatee dandeete hiissiitabaaxxe hiyyeeyexxa seemma abixxine adhdhinaan;

tolcha tolchinaake booncho duuchcha'ni eettene adhdhinemmaxxa seemma buyye'nee diinphani.

Mageno insa'nekike galmi giddo,

liqa afeemmake mannanaa'ni mura wonxe adhdhineemmaxxa woyinetixxa bookka ha'winaan.

9 «Ani kinni ha'nooxxee hiyye hojja insa'nexxi biri birbrisiinsha,

hunnatinna ejerisiinsha hedheemmaka,

Amoorika manna booso inisa'nexxa ballesse birennen.

Ani isixxa gumma iimii'n,

hundi'ninna hidda isika balleessenne.✝

10 «Amoorake mannika boga qadaada ha'nooke asse ha'no'aa uwwonaa,

Gibtseeke boganaa'ni ha'noo fulcheennexxi,

shoole tomme wogga duuchcha gammoojeke boga'ni inisa'nee akeekennen.

11 Labbaxxe ha'nooxxe oossexxe oddonaa'ni mitte mitte wabeekkole,

ha'nooxxe dargageeye giddii'ni mitte mitte Naaziraawwoota* assennexxi ke'issenenni;

Koo Isira'eelike ardaa! Eegga tinni dhugaandebataa?»

Ani Duuchchi Woddik Gootti tennee haasso'eenen.✝

12 «Ha'noo kinni Naaziroota woyinetika bulibulo ha'wissine'e dedhake'ni ibisine'een;

wabeekkotanna raaga raangabaashsha hoyyitineen.

13 «Tennexxe hunnati iima midha feenneeki sarageeli isi hunda hexxeexxa yaane bulleessammashsha

aninna ha'noo bulleessanon.

14 Iikki wiinamaammak loliink manni wiinamma dande'abaa; hunnaammeeyye mannixxi hunnanna gophphaan;

lolaammakiirinna ifi anjira dande'abaani.

15 Gabee darbammaki boonchoke'ni ti'ni hiyyee uurrabaan;

iikki wiinamik lolemaammak baaje fulabaan;

iikki fadhado qolchisaakinna lubbo ifixxa anjirabaan.

16 Eettene barra iikki jabak worbi loliink manni midde

loliinka imaanna ifika hunee baajaan,»

hiyya'neeni Duuchchi Woddik Gootti.