1 Dada Duuchchik Duuchchi Woddiki Gootti wele waleela ane'ni leelishshe; kunse raxxeexxe gumma wo'miteexxa shaaqale uuddenne. 2 Duuchchi Woddiki Goottinna, «Koo Amootsi maachcho uuddaatee?» hiyye anee qore.

Aninna, «Raxxeexxi gumma shaaqalette'ni wo'mitee'naa uuddannen» hiiyye hiissennen.

Ookkonneechchi uduma Duuchchi Woddiki Gootti anee hiyyee qici, «Anke ardik Isira'eelik muuxxami geyeedheen; ta'inni udumaa ani insa'nee mararabe'noni.»

3 Dada Duuchchik Duuchchi Woddik Gootti, «Eettene barra Galmi giddiki sirbi oodhishatibaa, jijjiiremmaan; heddi manniki renshi booncho booncho'ninni ibaan; bucuqqi hiyyaachchi hedhabaan.»

4 Ha'noo rakkiyye hirbeesitina'neeki,

ookkone bogixxxa hiyyeeyye bogakenaa'ni balleessatee hassina'neek duuchchi! Tennee hiyyaannexxa laqqee!

5 Ha'noo hitina'nee qici,

«Saffarsanjo shiixxishshati,

hirakanna caala lebati,

Dhariinxee kiilonni sobati,

midha gurgudhinonnaa,

Reefi fuldaaxxe baateki ayyaan haano muuxemaa?

6 Hiyyeessa biretike sibljinni,

rakkichchakanna lame lekkaxxe kophenni hidhdhinannon;

huurakanna midde dinnetike hira'ni gurgudhinannon.»

7 Ya'iqoobi'aanna horte isixxee irko kadeek Duuchchi Woddiki Gootti hiyya'nee qici, «Insa'ne assineexxa duuchcha ijje dedhabbo'non hiyye'e ifi'ni kakate.

8 «Tenne fuggoxxe hujeexxeera butta lele'mitabaataa?

ookkone bogi giddo hedheek ardi duuchchi oodhabaataa?

Abbaayik galaan wo'me xe'yeexxi saankuramaashsha

bogi iikki duuchchi iittanni sankuraan.»

9 Dada Duuchchik Duuchchi Woddiki Gootti hiyya'nee qici,

«Eettene barra ani barra saafo'a arishsho aaggaashsha assannon;

buttatanna wa'a hiyyeek ifi hedhe'naani barranni dukkansanno.

10 Ha'nooka ayyaanuwwa oodhishshatibaa,

ha'nooxxa faaruwwanna wi'lishshatibaa jijjiirannon.

Ha'no duuchchiing yaaddotixxa seemma odo'witinaashsha,

umo ha'nookanna haaxxitinaashsha assannon.

Eettene barra mitte reyeeke ifike belti'a oo'nammashsha,

eettene yaanaka muuxamma qaraareeke assanon.

11 «Kunniseten buttate'ni solo'o ibisannoxxi yaana dagaan»

hiyya'neen Dada Duuchchik Duuchchi Woddik Gootti.

«Eettene yanna manni solo'aakinna dheebbo'waak

Duuchchi Woddike Goottika hiyyichcho laqatike solo'o malee,

indaachcho solo'watike yookaan ha'winaachcho dheebo'watikebaan.

12 Ardi Duuchchi Woddike Gootta harssiyyotee

abbayatenaa'ni abbaayatiba'a

Middakenaa'ni borotibaa doonsa kiyya hiyaan;

yaane kinni alfabaan.

13 «Eettene yaana

«Danchalammi oossitte dubariinna worba woraba dargageeyyenna,

wodiinxe dheebonaa'ni kexxeexxa gagganban.

14 Semaariyake salphine'n yookaan ‹Ashemma› hiyyenda'nexxe fakke'ni kakatakir,

yookaan, ‹Daani hedhaake atike magenxi› hiyyaakir

yookaan, ‹Hedhaake Bersaabehike magenxa› hiyye kakataakir,

langaxxa ke'naba qico'n duuchchi woddi'a inbaan.»