1 Teqo'ake qachcha'ni hexxeexxe allalisano giddii'ni mitti Amootsiten. Oziyaani Yihudake moyanjo kadeemma wodda iittanni Iyyo'aasiki belti Iyyorbi'aami Isira'eelik moyanjo kadeemma wodda, tinninna bogi giddo lele'ma kadeebaa edi darre Isira'eelxe'e uudeexxi haaso'eemak hiyyichchi konneechchinni butti'a hedheeken.✝

2 Amootsinna hiyyee qici,

«Duuchchi Woddiki Gootti Tsiyoonixxe kooba'ni hedheexxi neenqinsha ittanna'naa;

sodaachchisaaki hafuuri isikinna Iyyerusaalemi qico'ni laqiseen;

Allalisano hore bobbaalsitaammaaxxi arsonna qoorteen;

Qermeeloosixxe koobaaki hanjinninna bageen.»✝

3 Duuchchi Woddiki Gootti hiyya'nee qici,

«Demasiqoki ardi cubbonde'ni lebee cubbo hujeemmaxxee'e,

mitte mami belo inisa'nee mura woxisannon.

Inisa'nee isso afeeke siblijiinke uxxisanjinn Gele'adika arda rakkinseen.✝

4 Tennexxe moyaanjo Hazaheelike moyaatike mine'ni giirra worrannoni;

giirattinna moyanji Beenihadaadi ijaarsissemmake kinjiinke dalla'ika qachchuwwanna ittaani.

5 Demasiqoke qachchike dallaiinxe hulakka cufanuwwa duuchcha enqe birannon;

Beeti'edeeni giddo siqqo abixxeeka,

Aweenxedhoqqa'ni hedheeka ardanna Beetti edeenka akeekisanjo fugussannon.

Sooriyaki Ardinna booji'emmeexxi Qiiri hiyyemaake bogibaa me'aan»

hiyya'neen Duuchchi Woddik Gootti.

6 Duuchchi Woddiki Gootti hiyya'nee qici,

«Gaazaki ardi cubbonde'ni lebee cubbo hujeemmaxxee'e,

mitte mami belo inisa'nee mura woxisannon.

Inisa'ne bogi giddo hedheeka arda boojineexxi

Eedoomike manni'a sa'isine uune'en.✝

7 Tennexxe Gaazake qachchike dalla'a'ni giira worannoni;

kollo inisa'nexxanna gube birannoni.

8 Ashidoodi giddo hedha'neeka ardanna Asiqeloonika akeekisanjo balleesanon; Filisixeemik bogi giddo kasake'ni hedheek manji reyaa qico'ni

anga anxa Aqarooni'n diriisanno.»

hiyya'neen Duuchchi Woddik Gootti.

9 Duuchchi Woddik Goottinna hiyya'nee qici,

«Xiroosiki ardi cubbonde'ni lebee cubbo hujeemmaxxee'e,

mitte mami belo inisa'nee mura woxisannon.

Dayyuwwi inisa'nekinni welti mitteba hinge haasoneemmaxxanna diingeexxi

booji'eenaka arda Eedoomi'n sa'issinee uuneen.

10 Tennexxee Kolluwwa isexxinna itendaashsha,

Xiroosike qachchike dalla'i giira woranon.»✝

11 Duuchchi Woddik Gootti hiyya'nee qici,

«Eedoomik ardi cubbonde'ni lebee cubbo hujeemmaxxee'e,

mitte mami belo inisa'nee mura woxisannon.

Dayyuwwa inisa'neeka Isira'eelika arda wolaantichchik shorrine'een;

insa'nee abindeeechchi uduma inisa'ne'aa mararrebaan.

Inisa'nenni anfeexxi aare balleeffanito'a dandeennebaan.✝

12 Baasooranxi kollo itendaashsha

Temaank dalla'uwwa'ni giirra worannoni.

Bootsiraanixxa kolluwwanna gubannon» hiyya'neeni.

13 Duuchchi Woddik Gootti hiyya'nee qici,

«Amooniki ardi cubbonde'ni lebee cubbo hujeemmaxxee'e,

mitte mami belo inisa'nee mura woxisannon.

Inisa'ne galcha ba'lisatee ke'issineeke lola'ni;

Gele'adike boga'ni hexxa'neexxa siilinxa melaale midde godoba inisa'neka darre'eeni.✝

14 Tennexxee Raabak qachchik dalla'a'ni giira woranon; isenna kolluwwatanna ittaan; eettene loliinxa barra raarennaa hogi bira sa'aan; iikki lolinna hobonbaltetishsha wiinamaan.

15 Iseki moyanjinna hayyoole

mittenba booji'endee me'itaani»

hiyya'neen Duuchchi Woddik Gootti.