1 Ha'noo Semaariya giddo hexxina'nek Baasanke lalo

hiyyeesa miicina'nekenna rakkiyye wixixxi assitina'neeke

aro'o ha'nookanna, «Ha'winannoolcho no'aa qophpheesee!»

hitina'neexxe melaalle hiyyichcho konne laqqe.

2 Lumok Duuchchi Woddik Gootti woyyumma ifixxenn hiyye kakatee qici:

«Kunse ha'noo malixxaqoti abidendine harkisendinaaxxi

Hafe ha'nooxxi midde qulxu'metixxe malixxaqonni

adhdhendaaxxi yanna daggaan.

3 Mitti mitti ha'noong dalla'iinbaa'n hulluunqaak qo'i giddii'ni

Harmoon bogiba ha'no hunnaan»

hiyya'neen Duuchchi Woddik Gootti.

4 «Ha'noo Beeteli'a martineexxi cubbo hujje;

Geligeeli'anna martine bira saxxeexxa cubbo sasse.

Bariisa bariisa tolchuwwa ha'nooka,

sase sase wogga'ni tommitte shiqqishshe.

5 Lebele e'yiteeka buddeena galatiinke tolcha assitine shiqishshe;

Ifixxe eeyanni shiqishi'na'neke tolcha'ni kijibe

ha'noo Isira'eelik ardi insa'neni holle;

ha'noo assate'e eettineecho kaddeemmaxxee'e»

hiyya'neen Lumok Duuchchi Woddik Gootti.

6 «Ani qachcha qachchange'ni godoba ha'noka duwwi uggennen;

olla'a olla'ange'ni ittinaachcho

uwwisennen ha'no kinni anbaa higginebaan»

hiyya'neen Duuchchi Woddik Gootti.

7 «Mayetixxi yanna shiqo'a sasi agenji gattaa wodda,

ani xeen ganabaashsha assennen;

Mitte qachcha'ni gansiisennen

wele qachcha'ni kinni ganabaashsha assennen;

mittiinke fichcha'ni ganaa wodda,

weliink xeena gophe bageen.

8 Manni wode'iinka hasito qachchakenaa'ni wele qachchibaa doonsa kiyya hiyyee

kaddo malee'e ha'wine dheebo fullebaan;

ha'noo kinni anibaa higginebaan,»

hiyya'neen Duuchchi Woddik Gootti.

9 «Hiddichchuwwiinkanna woyinetika fichcha ha'nooka heddole balleessennen;

qorrikinna jabaxxe diidallonni ganennen

Awwaanessuwwikinna balasetikanna ejernsiinxa ha'nooxxa haqqe itte;

ha'noo kinni anbaa higginebaan»

hiyya'neen Duuchchi Woddik Gootti.

10 «Ani Gibtseeke boga'ni assenneshshanni

baluwwa ha'no'n ergennen

Booji'emeke ha'nooke fadhaduwwinni welti

dargageeyye ha'nooxxa wolaantichchik shiyennen.

Ani ha'nooke loolka booncho sano ha'nooxxe'ni e'yaashsha assanon;

ha'no kinni anibaa higginebaan,»

hiyya'neen Duuchchi Woddik Gootti.

11 «Soodoominna Gomora bakka inisa'nexxa balleessenshanni

ha'noo giddii'ni mitte mitte ganennen.

Ha'noo giiratenaa'ni itemebaang gatteeke itisanneshshatenn

ha'noo kinni anbaa dagginebaan»

hiyya'neen Duuchchi Woddik Gootti.✝

12 «Tennexxe koo Isira'eelike arda;

ani tenne ate'ni assaannaxxee, koo Isira'eelike arda;

Mageno ha'nookinna afendota'a ifi qophpheeffat» hiyye.

13 Koobuwwa giisaki,

diidaluwwa dadaaki,

yaada ifikanna manjokee ifisaaki,

Barra dukkanaa assaaki,

buttatixxa tulluwwa hadhaak,

summi isik lumoke Duuchchi Woddike Gootta Magenon.