1 Lumoki Duuchchi Woddiki Gootti ane'ni waleella leelishshen; tenne leella giddo moyaanjiinxa mayetixxa midha haammeke'ni'nna latemmake qorjaa'ni Duuchchi Woddiki Gootti Awwaaneessiinki haagani dademaashsha asse. 2 Awwaaneessiinki haaganinna buttate'ni latte haanjedheechcho duuchcha ite bireexxa uudeennexxi, «Lumoke Duuchchi Woddike Goottaa! Atike ardixxa balleessa balloo gattowwaal hiyyi! Ardi atiki Isira'eeli he'nookenna hunna afebaake kadeemmaxxee hoonte gata» hiyyee soodatenen.

3 Duuchchi Woddiki Gootti ardakee marareexxi, «Tinni uudetexxi waleella muuxedaashsha assabo'noo!» hiyye.

4 Lumok Duuchchi Woddiki Gootti ane'ni leelishshexxi wele waleela konneechchinni butti'a hexxeexxeni; tenne leela giddo Lumok Duuchchi Woddiki Gootti arda ifike'ni giirati muro'a qophpheefate; giirattinna abbaayyatixxa dhi'mo bassite; ookkone boganna itte. 5 Ookkonneechchi uduma ani hiyye soodatenne qici, «Ee, Lumoke Duuchchi Woddike Gootta balloo! Giira tenne uurrisi! Isira'eelk atik ardi hnunna afebaake kadeemmaxxee tenne dande'aata?»

6 Duuchchi Woddiki Goottinna ardakee maraarexxi, «Tinni muuxxendabaan» hiyye.

7 Duuchchi Woddiki Gootti wele waleelanna ane'ni leelishsheen tenne leela giddo Duuchchi Woddiki Gootti tunbiitike mikisanjinni giisemee ijaaremeeke dalla'i qarqara uure'na afeenne isinna tunbii anga abixxeemman 8 Duuchchi Woddik Goottinna, «Koo Amootsii! Uuddaatexxi yaane maachchoo?» hiyyeexxi anee qore.

Aninna, «Tumbii'i» uudaanen hiyyennexxi hiissenne.

Ookkonneechchi uduma Dada Duuchchiki Goottinna anee hiyyee qici, «Kunse ani anke Isira'eelke ardixxe oddo'ni tunbii dirriissannon; ta'inni edi'aa insa'ne'aa mararabbo'non.

9 «Yisaaqi magenoonfatammaxxi koobuwwa onake kaddaan;

Isira'eelik galmuwwinna diigemaan;

Iyyorbi'aamike arda'ni anke wolaatichchinni ke'annon.»

10 Ookkoneechchi uduma Beeti'elik qeesichchi Ameetsiyaasi Isira'eelke moyanjo Iyyorbi'aami'a ergaa hiyye ergee qici, «Amootsi Isra'eelike ardixxe oddo'ni hedhee atixxee ximmalate'ni hedheeni. Iikki ardinna haaso'a isike'ni ti'ni hiyya dande'abaan. 11 Amootsi hiyyee haaso'ee qici,

« ‹Iyyorbi'aami wolaantichchik reyaani;

Isira'eeli ardinna boga ifikenaa'ni booji'emee adhemmaan› » hiyye.

12 Ameetsiyaasinna, Amootsii'i hiyyee qici, «Koo ati waleellati me'i kabaa'ni! Yihudake bogibaanna baajettexxi ookkonna raaga raaga'ni itattanna iti. 13 Yaane kinni Beeteli moyanjiink galmanna ardiinke magenoofachchotixxe bakka kaddeemmaxxee'e konne booncho'ni langaxxa raaga raaggoxxee.»

14 Amootsinna Ameetsiyaasi'aa hiyyee qici, «Ani hore allalannokenna ode'iinxa gumma qocedhanoke malee'e raagichcho yookaan raagichchiinke beltobaan. 15 Yaane kinni Duuchchi Woddiki Gootti anee gedhebo allalaane boonchonaa'ni aadhdheexxii, ‹Martettexxi arda anke Isira'eelke raaga raagi› anee hiyye. 16 Yoonna Duuchchi Woddiki Goottika hiyyichcho laqi.

« ‹Isira'eelike arda'ni ati raaga raagoxxe;

Yisaaqixxe horte'ni lallaboxxee› hitatton.

17 «Tennexxee Duuchchi Woddik Gootti atixxee hiyya'nee qici,

« ‹Are atixxi ookkone qachchi giddo yabaabula kaddaan;

labbaxxinna meyyaxxi atixxi oose wolaantichchik reritaan.

Boga atikanna wodaroti minka'nee qoqqoodemmaan;

atinna umo atingenninni anafeeke boga'ni reritatton.

Isira'eelinna ifike boganaa'ni booji'ende adhdhendaan.› »