1 Isira'eelike arda baloo! Ha'no'aa boochchisaaneeka boochchisa laqqe:

2 «Ikkiseteni duudo dubarrichcho Isira'eelixxi ibbeeni;

langaxxa kexxo'aa dande'a gophpheemmaxxee;

Ifike boga'ni fanxaraarite'een;

isee gargaare ke'issaaka alfitebaan.»

3 Lumok Duuchchi Woddik Gootti:

«Mitte Isira'eelike qachchanaa'n kumi manni duulo duulaani;

duulokena'ni hige dagaaki kinni mitte dhibba calla higaan;

Wele qachchana'ni dhibbi manni duulo duulaani;

duulokenaani hige dagaaki kinni tomme calla kadaan.»

4 Duuchchi Woddik Gootti, Isira'eelika arda balloo! Anbaa higge;

«Hedhotinna hexxinaan;»

5 Yaane kinni Geligeela mitte gatteebag booji'enda'neen, Beetteelinnaa tolanga gattaammaxxee'e Beeteli martinoqqe'e; Geligeela'aanna e'yitinoqqe; Bersaabehinna qaxxaamurtinoqqee.

6 Ha'noo Duuchchi Woddika Gootta halse;

hedhoti hexxinaan;

Kada gophphoole isi giiratishsha Yoosefika arda biraan;

iitti giirattinna Beeteli'i ittaan; isee balleessakinna hedhabaan.

7 Ha'noo dhugaatixxa murte qaraartaaxxe yaanebaa jijjiirtinaak,

qullummatanna butti'aa darbitinaake ha'no'aa aanne'ee!

8 Torbaaane urjuwwanna Oriyoonii hujeeki,

dukkanna soodimariink ifibaa jijjiiraaki;

barra dukkanseexxi hashshate assaaki;

Abbaayyatika wode'e ye'eexxi,

buttati hana yaa'aashsha assaki

summi isikinna Duuchchi Woddike Goottan.✝

9 Isi jabaxxe kollo'ni dedhange'ni kaddaaxxa ba'ne,

kollifateemmeeke qachcha'ninna bakka balleessitaaxxe ba'ne iyyedagaan.

10 Ha'noo murtetixxe bakka'ni

ha'noo xixaaka jibbitinna;

dhugaa haaso'aakanna tuffatinaan.

11 Hiyyeeyyetanna hirbeessitineen;

midha inisa'neexxanna saandine adhdhitineen.

Boceme seesemeeke kinijinni minnuwwa ijaadhdhitineen;

ha'no kinni ookkone minnuwwi giddo hexxinabaan;

Gammachchiissaxxa woyine kaarsitineen

yaane kinni issenaa'ni afemaaka woyinetika bulibulo ha'nnona ha'witinabaan.

12 Cubbo ha'nooxxi hittatta jabaxxe kaddeexxa

balleessa ha'nooxxinna hitte qico bira saxxeexxa ani ege'nennen.

Ha'noo qullichcha miicinaa;

mattakanna adhdhitina;

murtetixxe songo'ninna hiyyeessakenaa'ni dhuggaatixxa murte hoyyexxinaan.

13 Tennexxee qalbeeffataki manji iitte wodda sammi hiyya;

yannatinna fuggitete kaddeemmaxxee.

14 Hedhoti hexxinaashsha,

eloxxa malee'e elobaaxxa hujinoqqe'e;

Ookkonechchi uduma haaso'emashanni,

Dada Duuchcha Ajajaak Duuchchi Woddik Gootti Mageni ha'noonni welti hedhaan.

15 Ha'noo fuggoxxa yaane hunidine waale; eloxxanna eeyye;

murte murraaxxe songa'ni dhugaatixxa murte dassitinoqqe'e.

Akimagaada Dada Duuchcha Ajajaak Duuchchi Woddik Gootti Mageni;

Yoosefixxe hafe'aa mararaaxxe hexxeen.

16 Tennexxee Dada Duuchcha Ajajaak Duuchchi Woddik Gootti Mageni hiyya'nee qici;

«Ora oranaa'ninna ardi duuchchi woo hiyyee oodhaan;

Weldeenna weldeennate'ni wixixxi hiyyatixxe raare kaddaan wiisaluwwi oodhishshatee

oodhishshaluwwi wi'lishshatee ye'eman.

17 Woyinetik hiddichchiinke fichchiinke booncho duuchcha'ni oodhdhishsha kaddaan;

tinni duuchcha kaddaa'neek ani oddo insa'nexxenaa'ni sa'aannaxxeeten,»

hiyya'neen Duuchchi Woddik Gootti.

18 Duuchchi Woddike Goottixxa barra hassina'neekee

ha'no'aa aanne'ee!

Duuchchi Woddike Goottixxa barra ha'noo mayee hassinna'nee

iitti barra dukkanate malee ifakebaan.

19 Tinni barra mitti manji neenqakenaa'ni baaja'naa;

Dibi hinaaki biniichchi futti hiyyammashsha,

Mine ifikibaa e'yeexxi, anga ifixxa gimoti

hana ugge'naa,

iddammake bofixxen.

20 Duuchchi Woddike Goottixxi barra ifi leellabaaxxe lumoxxe dukkanan

ifiink wolalacci hedhebaake dimma dukkanabaata?

21 «Ani ayyaanuwwa ha'nooka jibbeennen;

tuffateenen; ya'i ha'nookinna anee gammachchiisa'nebaan.

22 Ciinco'aaka tolcha ha'nookanna midhatika tolcha ani'a shiqishshinoolenna

Ani adhdhaabo'noni.

Ha'yoo horenaa'ninna mittoominka tolcha shiqishinoole;

ani ookko'a uudabo'non.✝

23 Ha'nooxxe faaroxxa raare anenaa'ni fugusse;

masinqotika meelanna laqabo'non;

24 Yaane kinni dhugaatixxi murte wode'iinsha

qullummatinna baggammabaaxxe muummeshsha duneduun.

25 «Koo Isira'eelike ardaa ballo'o! Shoole tomme wogga qiila gammoojje'ni;

tolchakanna qurbaana ani'a shiqishineemata?✝

26 Ha'noo ifi'a huccitineeka;

moyanjoke hitina'neeka saakuuti ha'noka magenuwwa,

magenoonfatine'neke magenuwwixxa sooddo

ha'nooke mangenuwwixxa urje iimi'a ke'isitine dulkexxineen.

27 Tennexxe Demasiqo wido shorrendinaashsha assannoni»

hiyya'neeni Dada Duuchcha Ajajaak Duuchchi Woddik Gootti Mageni.