1 Dada Duuchchik Gootti tolchimalchi bira uurre'na afenne,

«Madirekuwwa linqi linqi hitaashsha

utuphuwwiniinxa bokkuwwa gani,

Ookkone ardike umo'ni konneechchuwwa butuchchi;

gateeka arda ani wolaantichchik shiyannon

Insa'ne giddii'ni mitti manjinna baqataak hehdebaan

baajoolenna fulaak hedhebaan.

2 Dhi'mo bale qoltine butti'aa me'ineelenna,

anga anxi ookko'ni insa'nee fulchitaan;

Iimi'aa fulloolenna,

ookko'ni insa'nee dirrisannon.

3 Qermeeloosixxe xungo'ni sho'omoolenna,

adame hasee ookko'ni insa'nee dirrisannon;

Abidannon;

dhi'mo abbaayya giddo anenaa'ni sho'omoolenna,

ookko'o bofi insa'nee iddaashsha ajajannon;

4 Naaphpha inisa'neke'ni booji'emme oofemme eme'inoolenna,

ookko'o insa'nee shinnaashsha wolaantichcha ajajannon.

Eloxeete kaddebang elobaaxee

ille anxa insa'ne'ni uggannon.»

5 Dada Duuchcha ajajaka Duuchchi Woddika Gootta

Butta tuqqabaan,

buttatinna baqqaani;

Ise giddo hedhaachchi duuchchi oodhaan

buttate'ni hedheechchi duuchchi Abbayike wode'ishsha ke'aan;

Gibtseeke galaansha yaa'ani.

6 Mine ifika iimate'ni ijaadhaaki,

boosotanna buttate'ni assaak,

Abbaayyatika wode'e ajajaaki ye'aake

buttinnaa duuchcha'ni dhangalaasaak,

suummi isiki Duuchchi Woddike Goottan.

7 «Ha'noo Isira'eelik ardi,

ha'noo ani'aa Tophiyiinke ardishshaten»

hiyya'neen Duuchchi Woddik Gootti

«Isira'eelika arda Gibtsee'ni,

ittanni Filisixxeemika ardanna Qeerixxesii'ni,

Sooriyaka ardanna Qiirii'ni fulchebo'notaa?

8 «Kunnse Duuchchi Woddiki Gootti Magenixxi illuwwa,

cubbaleete mootumma'ni hana hexxeen;

Isenna buttatenaa'ni kutti assee balleessannoni;

kaddo malee Ya'iqoobixxa horte duuchcha hara kutti asse

Balleesse birabo'non»

hiyya'neen Duuchchi Woddik Gootti.

9 «Kunnise ajaja uwwannon

midha diddiqate'ni diddisinammashsha,

Isira'eelika mine,

Gosa gosake ardi duuchchixxe oddo'ni iittanni assannon;

yaane kinni mitte gumma qixxa buttate'ni ibbabaan.

10 Ardiinxe oddo'ni hedheexxi

‹fuggoxxi yaane no'oo geltabaan yookaani no'oo affabaan› hiyyaakkeeri'aa,

Cubbaleeyye duuchchi,

‹wolaantichchik rertaan.› »

11 «Eettene barra ibbeeka,

ookkonee Daawwitika duunkaana ke'issannon.

Enqeshsha isixxa qammalchannon,

diigemeeka haaronsanno,

qara hedhemmashshanni, assennexxi ijaarannoni.

12 Tennexxee Eedoomike bogi giddo gatemaka arda,

summi ankinni ye'emeeka arda duuchcha dhaalaan,»

hiyya'neen tenne assaaki Duuchchi Woddiki Gootti.✝

13 Duuchchi Woddiki Gootti hiyya'nee qici:

«Kunnise midha ha'mammak manni haa'me birebaangi,

wiisallichchi keekkatebang dhaqabbaan,

golqo kaasammakinna kaalse birebaang,

woyinetixxa gumma miicammakiri dhaqqabbaaxxi barra daggaan.

Haaroxxe woyinki bulbul koobuwwatenaa'ni coccobbaan

tulluchchuwwa duuchchanaa'ni dunemaan.

14 Shorremeeka arda anka Isira'eeli

wirri asse bogi inisa'nekibaa iyyedaganon.

Insa'nenna diigememmaka qachchuwwa qammalchine ookkoo he'naani;

woyine karsineexxi woyinetika bulibulonna ha'winaan;

gargari hedheeka hiddichchuwwa kaarsneexxi gumma indaan.

15 Isra'eelika arda insa'negge boga'ni kaasannon;

insa'ne'aa uwwennake boganaa'ni langaxxa

goshemme me'inabaan,»

hiyya'nen Duuchchi Woddik Gootti Mageni.