1 Duuchchi Woddiki Gootti hiyya’nee qici: «Anee kadhatebaakeri’aa ifi leellishenne;

anee halsebaakeri’aanna insa’ne’aa afemenne;

Summa anka ye’ebaake ardi’a

‹Kunnise ani, kunnise ani› hiyyenne.✝65:1 Rom. 10:20.

2 Xaqartichchi ardi’a

eloke kadebaake oruwwa’n me’abaakeri’a

Qalbe ifixxixxa gaabbeera hordofakeeri’a

barra duuchcha anga anxa diriirsenne;

duuchchi wodda ani edo anee mufachchiisaake arduwwi’a,✝65:2 Rom. 10:21.

3 Kunni ardi hiddichchuwwiinke fichchi giddo tolcha tolcha’neek

faariinke miyuwwi hana hixaana guba’neeke

duuchchi wodda anee mufachchiisa’neeke ardan.

4 Iittanni insa’nee hirreessuwwixxe oddo’ni ofola’neeki,

hashsha hashsha qoonne bakka’n galaakiir,

Booyetika maalla itaakiir,

odoolcho ifixxe’n batto’eke maalika la’a wonshe ugga’neekeeran.

5 ‹Gamake’ni; ane’n maxxandoxxe;

anibaa shiqqoxxe; ani ati irra woyyichchaken› hiyye mannan!

Iitta hedheek manni anxe sano’n wiliilletishsha

barra duuchcha ha’yitaammaxxee giirashshaten.

6 «Kunniseten balleessa insa’neexxik hiri ani edo borreesseme hedheen;

ani Sammi hiyyabo’noni; yaane kinni huje insa’neexxishshan hira isi’a uwwannon;

anga insa’neexxika hira insa’ne’a uwwannon.

7 Ha’nooxxa cubbonna ha’nooke annuwwixxa cubboka hira uwwannon,»

hiyya’neen Duuchchi Woddiki Gootti.

«Insa’ne koobati hana ciincessatika tolcha shiqinshemmaxxee

koobuwwate’ni hana yowwinemmaxxee,

Insa’ne saffaremange saffarsanjo’ni insa’ne’a saffarendaan;

edixxe insa’neexxe hujexxe’e anga insa’neexxik hira alfinaan.»

8 Duuchchi Woddiki Gootti hiyya’nee qici:

«Woyinetiki bulbuli woyinetixxe roddeeni giissendammashsha,

mannikinna hiyyee qici, ‹Ise giddo eloxxi yaane hexxemmaxxee

hedheni ballesitinoqqe› hinammashshanni,

Aninna anke erganjuwwixxee hiyye iittanni assannon

insa’nee madadiinga balleessabo’non

9 Ya’iqoobixxe sanne kadeekara,

kooba anxa dhalaakara Yihudake boganaa’ni iyyedaganoni;

Ani fi’lenneki ardi boga ookkone abixxaan;

erganjuwwi ankinna ookko hedhaan.

10 Ane’e jabeesse halsaak anke ardi’a

Saarooni anke gedhebik bobbaan;

Akoorixxe dhooqa hori anki dheeda booncho kadaan.✝65:10 Iya. 7:24-25.

11 «Yaane kinni Duuchchi Woddika Gootta waaldineek ha’no’a

woyyitte anxa kooba deetineek manni’a,

Qoobboken hiyyemeeke fakkeke boonchi’a qophpheessitineeke,

hixaken hiyyendeexxe fakke’a makemeeka woyinet bulbulo sottake’ni wonshitineeke;

12 Ha’no ye’enne wodda hee hiyya gophphinemmaxxee’e

ha’no’ni haaso’enne wodda laqa gophphinemmaxxee’e,

Ani edo fuggoxxa yaane assitinemmaxxee’e

battoossitaaxxa yaane ha’no fi’litinemmaxxee’e,

Ha’no wolaantichchakee sa’isse uwwannon;

duuchchiing gorra’ematee gulufatinaan.»

13 Tennexxee dada duuchchik Duuchchi Woddiki Gootti hiyya’nee qici:

«Erganjuwwi anki ittanni:

ha’no kinni solo’witinaan:

Erganjuwwi anki ha’waan:

ha’no kinni dheebo’witinaan:

Erganjuwwi anki gammadaan:

ha’no kinni salphatinaan.

14 Erganjuwwi anki:

giddixxe qalbenaa’ni burqa’nee gammadinni faarsaani:

Ha’no kinni:

qalbe ha’nooxxe yaaddotenaa’ni kexxeexxa ooxxinaan:

irri ha’nok enqeme’naa woo hitinaan.

15 Summa ha’nokanna,

filemeek anki ardi badinotik asso’a waaldinan:

Duuchchi Woddiki Gootti Mageni ha’no’o shiyan:

erganjuwwa anke kinn wele summa uwwaan.

16 Tennexxe konne boga’ni eeba ye’aak,

dhugaatik Magenike summinni biifoommaan:

Ookkone boga’ni kakataak,

dhugaatik Magenike summinni kakataan:

Saxxeexxi yaanuwwa dedhende’en

ille anxenaa’ni sho’ome’een.

17 Kunnise ani,

haaro haaroxxa iimuwwanna haaroxxa butta dadanon:

Saxxeexxi yaanuwwa duuchcha dedhendaan:

qalbefataak hedhebaan.✝65:17 Isa. 66:22; 2 Phex. 3:13; Wal. 21:1.

18 Yaane kinni dadenke’ni,

gammadde: duuchchi woddi’a ililisse.

Ani Iyyerusaalemii gammashshotee’e,

arda isekanna ilileettettee’e dadannon.

19 Ani Iyyerusaalemii’ni gammadannon:

arda ankenna ililisannon:

Oodhishshatikinna raaretik hafuuri laqemabaan.✝65:19 Wal. 21:4.

20 «Ta’anni elqi’a ookko’o,

heenoxxe yanna’a calla hedhoti hixxaaxxi oose,

yookaan wogga godditebaaxxi geedhe hexxabaan:

Dhibba wogga geyeek manji reyoole,

kayyanni reyeeshsha uudemaan:

Mitti manji dhibba wogga geyebaangi reyoole,

qoomemeeshsha laako’emaan.

21 Manni mine ijaadhdhan: giddonna hedhaan:

woyinetanna kaalsaan: gummatanna itaan.

22 Insa’nenna ta’anni edi’a welekee’e galdumiinka mine ijaarrabaan:

yookaan weli itaashsha kalsinabaan:

Anke ardixxi wogga,

haqichchiinxe woggashsha qeerrexxaan:

Ani insa’nee fi’leennek,

eloonne huccineexxe hujjenni qeerraxxe yanna’a gammandaan.

23 Elo insa’neexxi butta gattabaan;

qooma rertaaxxi oose ilendabaan;

Insa’nenna sanne insa’neexxi,

Duuchchi Woddik Gootti eebbiseke arda kandaan.

24 Insa’ne anee soodaantebaa edi darre insa’ne’a hiissannon:

haasonne birrebaangi laqannon.

25 Yayyenna gedhebiinx beltanna mitteba bobbaattaan;

neenqi laliinsha badda’a dheedaan:

bofi buttina arraaphphaan:

Woyyitte anxe kooba hana,

fuggooxxi yaane insa’nee geltabaan: bala daggabaan,»

hiyya’neki Duuchchi Woddike Goottan.✝65:25 Isa. 11:6-9.