14 Kaha Muzimbu Uacili ou ua Mumuene vaka uambulula ha mavu oshe, kupua ngue vukaleho ku mafuti oshe, ambahoni mamanusuilo akeja.

29 "Hanima ya tuyando ha matangua aje litangua likazivala, kaha ngonde kuikatu ceke, na vintanga ntanga vikaua kuhuma muilu, kaha vinzili via melu vikaninganga. 30 Ambahoni kukasholoka cimueso ca Muna Muntu muilu, kaha miyati yoshe ya ha mavu ikalila, kaha vakamona Muna Muntu eja mu mashelua a muilu na nzili na vumpau vuakama. 31 Kaha akatuma tungelo vendi na mutambi ua tolombita, kaha vakakungulula vantu vendi vahanguile kuhuma ku vimbango viuana, kuhuma ku maputukilo a mavu kuheta naku mamanusuilo."

42 Zangameni muomu kumukazivuka litangua lije Muene yeni akeja. 43 Vuno honi zivukeni eci, nga liavenia njivo akazivuka ntsimbu muka ya vutsiki muizi akeja, kaha nga akavandamena, nakumona nguendi njivo yendi keti vaituve. 44 Nankuma neni naua munapande kulivuahesela, muomu Muna Muntu akeja ha ntsimbu ije kumuzivuka."

20 valongeseni kuononoka viuma vioshe vije vinjinamishiki, kaha taleni, njikakala neni kutuala ku mamanusuilo a mavu."

32 "Vuno honi naumo uahi azivuka litangua cipue ntsimbu, cipue vene tungelo va muilu, cipue Muana, vuno honi Tate lika.

1 Vuno honi ivuisisa eci, mu matangua akumanusuilo kukakala vintsimbu viakukaluua. 2 Muomu vantu vakapua vaka kulizanga vakevo vavenia, vakazanga vimbongo, vakalihalesa, vaka lijundula, vakapua vaka kasauntu, vakahona kuononoka visemi viavo, vakahona kutsantsela, vaka kuhona kulela, 3 vaka keniuka, vakahona cikeketima, vakapua vakaleho va makuli, vakapua vaka cipululu, vakahona kulihilula, vakazinda viacili, 4 vaka lu uangania, vaka lupozoka, vaka shula nakulihalesa, vaka zanga senga kupulakana kuzanga Njambi, 5 vaka kakateya viuma via vunjambi vuno honi vakaviana nzili yavio. Litengeni ku vantu ava.

17 Njambi ahandeka nguendi, ‘Eci cikeco njikalinga mu matangua a mamanusuilo

njiketila Cimbembesi uange hali muntu na muntu.

Vana veni va vamala nava va vampuevo vakambulula vunanguizi,

na vakuenje veni vakamona vimona,

na vakulukazi veni vakalota vinjozi.

18 Mu matangua aje njiketila Cimbembesi uange,

cipue hali vangamba vange, va vamala nava va vampuevo

kaha vakambulula vunanguizi.

19 Njikalinga vikomoueso muilu

na vimueso hano ha mavu,

kukakala maninga, na tuhia, na vuisi vuakama.

20 Litangua likazivala vuii,

na ngonde ikavenga ngengu ngue maninga,

ntsimbu kanda litangua liakama lia vumpau vua Muene lihete.

21 Kaha uoshe akasana lizina lia Muene akovoka.’

15 Evi tumilongesa hano vinapu vilongesa via Muene linga yetu vaje vacili nakuyoya ha litangua lije Muene akeja kutukatuama kulutue lua vaje vanatsi. 16 Kukakala mutambi ua lizi liakama liakushika, lizi lia kangelo uakama, nakuohia ca tolombita ya Njambi, kaha Muene ikeye vavenia akashuluka kuhuma muilu. Kaha vaje vatsile mukutsiliela kuli Kilistu vaka sangukila ku muono ha kulivanga, 17 ambahoni yetu vaje tucilinakuyoya ha ntsimbu ije vakatukunguluila hamo navo mu mashelua nakuliuana na Muene havukambuila. Kaha tukakala hamo na Muene ntsimbu yoshe ya yaye. 18 Nankuma, likoleseni umo namukuavo na mezi aua.

6 Nankuma, kutuapandele kukosa tulo ngue veka, tunapande kutona nakulihilula. 7 Ikapu ntsimbu ya vutsiki omo vantu vakosa tulo, naua ikapu ntsimbu ya vutsiki omo vantu vakapende. 8 Vuno honi yetu tuakundama ku mutania, kaha tunapande kulihilula. Tunapande kuzala lutsilielo na cizango ngue ntelo ya hantulo, nakuzala kutsiliela ca kuovoka cetu ngue tepa. 9 Njambi katuhanguile kuyandela vutenu vuendi, vuno honi linga tukatambule kuovoka kuhitila muli Muene uetu Yesu Kilistu,

34 "Zangameni! Keti mushoshomue cikuma mitima yeni ku via viuano, na viakulia, na via kunua viakupendesa na kulinienga ha viuma vije via ha mavu. Nga muvilinga litangua lije lika miniangumuna ngue mu ukapiluka muheto. 35 Litangua lije likeja ku vantu voshe vali hano ha mavu. 36 Livuaheseleni na kulombela ntsimbu yoshe linga mukakale na nzili yakuhiana vioshe vije vikalingiua nakuimana ku mesho a Muna Muntu."

8 Vuno honi vamuanetu keti muecele vusunga vumo, ngeci kuli Muene litangua limo liapua miaka likulukazi, kaha miaka likulukazi yapua ngue litangua limo kuli Muene. 9 Muene kekusimbula ha cikulaheso cendi ngue vamo mu vaka singaniekelamo, vuno honi uapua ua kusimpa hali yeni kekutonda cipue umo linga akanonge, vuno honi akatondo voshe vatenguluke.

10 Vuno honi litangua lia Muene likeja ngue muizi, ambahoni melu a kahita na cililimo cakama, kaha na viuma via muilu vioshe vika sangunuka na tuhia, kaha mavu na vipangi viliho vaka viuemeka. 11 Muomu viuma vioshe evi vika sangunuka, nkuma mukapua vantu va cifua muka? Munapande kuyoya vuyoye vua kulela na vunjambi, 12 kuvandamena na kuzambuisa kuija ca litangua lia Njambi, muomu melu a kanonga na kusangunuka, na viuma vioshe vika sangunuka na tuhia! 13 Vuno honi kuya ha cikulaheso cendi tuli nakuvandamena melu a maha na mavu a maha muje vusunga mukemo muvuakala.

51 Taleni, njilinakumileka vushueka, tuva voshe kutukatsi, vuno honi tuva voshe vakatuhimpula. 52 Mukantsimbu lika ngue muje mulikakemuna lisho, ha tolombita ya mamanusuilo. Muomu tolombita ikohia, kaha vatsi vaka vasangula, kuakuhona kunonga naua, kaha vaka tuhimpula.

1 Ambahoni njamuene lilu lia liha na mavu a maha. Muomu lilu liakulivanga na mavu a kulivanga vinahiti, na cisali kucakeleko naua. 2 Kaha njamuene nganda yakulela, Yelusalema yaiha, ije ili nakuija kuhuma muilu kuli Njambi, ije inalivuahesela ngue shombolua uje nalipesa pesela yaliendi. 3 Kaha njevuile lizi litambeka kuhuma ha litanda ngualio, "Taleni, mbalaka ya Njambi ili hamo na vantu. Akakala hamo navo, kaha vakapua vantu vendi, na Njambi vavenia akakala hamo navo. 4 Akahunda masozi oshe ku mesho avo, kaha kutsa kucikakalako naua, cipue vusiua, cipue kulila, cipue kuvua kuvavala, muomu viuma vioshe via laja vinahiti."