14 Mbui Yedi ya useuta wa Muungu inda ibiikiwe mwe inusi yose, ili wantu wose waimanye nee kisikiizi chendahocheze.

29 "Maa misi iyo za suuba zendaho zemboke, Muungu endaadihitue zuwa kuwa kiza na mweenge nayo khaina ilavye mng’ao na ntoondo zendazigwe kulawa uwanga, viyaviya endaazisingise nguvu za uwanga. 30 Aho wenda uoneke ntangio ya Mwana wa Mntu uwanga kwa Muungu na wantu wose mwe inusi wenda watoe bwaimbo, wenda wamwone Mwana wa Mntu akeza uwanga ya maangwi ya uwanga kwa Muungu kwa udaho na ukuu mwingi. 31 Nae endaawaagiiye wandima wa uwanga kwa Muungu uku watoa gunda divumado muno, nao wendawawaike hamwe wekusagulwao ni Muungu kulawa phande zose nne za inusi, kulawa kisikizi iki cha inusi adi kisikizi kituhu cha inusu.

42 Ekauweni, kwaviya khammanya msi endahoeze Zumbe yenu. 43 Iya mmanye mbui inu, inga mwenye nyumba ati nee kamanya msi mbavi endahoabue, nee akacheeza, wala khekuwa aibadie nyumba yakwe itulwe. 44 Viyaviya nanywi mwekae meso, kwaviya Mwana wa Mntu endaeze saa mwesayokuikauwiya.

20 Wahinyeni kutoza miagiiyo yangu nikuwekhayo. Na miye ni hamwe na nywie misi yose, adi kisingi cha kisikiizi."

32 Akini khahana mntu amanyae msi na saa hata wandima wa uwanga kwa Muungu, na Mwana khamanya, iya Tate ikedu ne amanyae.

1 Akini umanye mbui inu, mwe misi za kisiikizi kwendakuwe na kisingi cha suuba. 2 Wantu wendawawe wekundisa wenye na wenye kukunda hea na wetapao na wenye kibui na wenye kudumua na wesaokutegeeza wavyazi wao na wesaokuwa na ntogoo na wesaokuikwa kwaajii ya ndima ya Muungu, 3 wendawaawiiye wantu wesaokuwa na ukundiso na wesaokuekea na wasongeezi na wesaokuikindia mioyo yao na wakai waemeao dodose dekuwado dedi, 4 wendawawe wahitukaji na wenye mbifya na wekumemao kibui na wendawakundise mbui zao wenye kusima kumkundisa Muungu. 5 Wantu awo kwa chongoi wendawaooneke inga wantu wamtegeezao Muungu, akini wenda waemee udaho wakwe, ekaa hae na wantu inga awo.

17 Zumbe agombeka, "Mwe misi za kisikizi,

Nendaniwekhe Muye wangu wantu wose.

Wana wenu wa kigosi na wakivyee wendawawambe wantu Uwoni wangu,

Wabwanga wenu wendawaonyeshwe vintu na Muungu

Na wadaa wenu wendawaote sozi.

18 Naho hata wandima wangu wa kigosi na wakivyee,

Nendaniwekhe Muye wangu misi izo,

Nao wendawabiikie uwoni wangu.

19 Nendanigosoe vihii uwanga

Na utangio asi mwe inusi,

Kundakuwe na phome na moto na mosi mzito.

20 Zua dendadigewe kiza,

Na mweenge wendauwe mwekhundu inga phome

Kabla ya kulawiiya uda msi mkuu na Ukuu wa Zumbe.

21 Aho mntu yoyose endaeadetange zina da Zumbe, endaaoholwe."

15 Inu tiwambiayo ni hinyo da Zumbe, kuwa swie tekuwao wagima, ambao tendatiwe tisigaa kisingi Zumbe endahoeze haika khatina tiwaongoee wada wekuuyao kae na nyuma kumuona Zumbe. 16 Kwamana Zumbe Yesu mwenye endaaseee kulawa uwanga kwa Muungu nakulavya mwiko kwa mgutio mkuu hamwe na mgutio wa mndima mkuu wa uwanga kwa Muungu na mgutio wa gunda da Muungu na wowo wada wekuuyao na nyuma wakawa wamzumiiya Klistu wendawawe wa bosi kuyuyuswa. 17 Naho swie tekuwao wagima, tekusigaao tendatidoigwe hamwe nao wowo mwe mazunde na kumhokea Zumbe uwanga na ivyo tendatiwe hamwe na Zumbe kae na kae. 18 Isasa geaneni moyo kwa mbui izi.

6 Iya tisekugona usisiza inga watuhu, takundigwa kucheeza na kuwa tayali na kuidaha mioyo yetu. 7 Wantu wagonao wagona na kio na wakolwao, wakolwa na kio. 8 Akini swie ni wantu wa musi takundigwa kweika tayali kwa kuvaa uzumizi na ukundiso inga vazi da chuma da khondo da kwekinga kifua na kauwio detu da uohozi dituinde inga khofia da chuma da khondo. 9 Kwaviya Muungu khekutisagua ili kudagamizwe kwa maya yakwe iya tiupate uohozi kwembokea kwa Zumbe yetu Yesu Klistu,

34 "Muwe meso, mioyo yenu isekweza ikatozwa na mbui za makwasukwasu, ukozi na ndima za ugima. Ama khivyo, msi uda undauwezee vuupu. 35 Kwaviya undaumyezee inga mtego wantu wose wekaao mwe inusi yose. 36 Muwe meso kisingi chose, na vikani misi yose ili Mungu awaambize kuvuka yose yendayoyalawiiye mdahe kuwa na udaho wa kwemboka kwesio suuba mwe mbui izi zose yendayoyalawiiye, na kugooka hemeso ya Mwana wa Mntu."

8 Akini wambuya wangu, msekujaa kintu kimwe kuwa hemeso ya Zumbe msi umwe ni inga myaka elufu na myaka elufu ni inga msi umwe. 9 Zumbe khacheewa kugenyeza yada ekuikiayo kiaga inga wantu watuhu wamamakhanyavyo kuusu kucheewa. Yee ana uzizimizi kwaajii yenu, mana khakunda katu yumwe age, iya kuwavuta wose wadahe kueka mavigaviga.

10 Msi wa Zumbe wendaweze inga mbavi. Msi uwo mbingu zendazage kwa msindo mkuu na viumbe vyeumo umo vyendavidagamie kwa moto, na inusi yendaiuswe hamwe na kia kintu cheumo ndani yakwe. 11 Kwa viya vintu vyose vyendavibanangwe, nywie mwakundigwa muwe wantu wa viivihi? Mwakundigwa kwekaisa wekaisi wekuikwao kwaajii ya Muungu na kwa kumtongea Muungu, 12 mkahufiizia msi uda wa Muungu na kuigosoa yeze kinyio. Kwaajii msi uwo si zendazidagamizwe kwa moto na kubanangwa, na viumbe vyeumo uwanga vyendavilolomoke kwa kizuguto. 13 Akini inga ekutiikiavyo kiaga, tahafiiza uwanga kwa Muungu kuhya na si mhya hada ambaho wantu wagosoa du mbui zia zimkundisazo Muungu.

51 Tegeezani nawamba mbui yekufiswayo, swie wose khatina tiuye na nyuma, akini wose tendatihitulwe, 52 vuu puu, kugubika na kugubua meso mwe kisingi gunda da kisikiizi dendahodikeme, wekuuyao na nyuma wendawayuyuswe na wendawawe na mii yesayo kuuya na nyuma vituhu, na swie tendatihitulwe.

1 Naho nee naona uwanga kwa Muungu kuhya na inusi mhya. Uwanga uko kwa Muungu kwa bosi na inusi ya bosi yaga, khavikuonekana vituhu, nayo mazimshindo khaikuoneka vituhu. 2 Nee naona mzi wa Muungu mwenye, Yelusalemu mhya, ukaseeya kulawa uko uwanga kwa Muungu, uikwa vitana inga mvyee ekuhambwavyo vitana kwaajii ya muumewe. 3 Nikategeeza mgutio mkuu kulawa he kigoda cha useuta ukagombeka, "Isasa Muungu ekaa gatigati yao, naho endaekae nawo na kuwatenda wantu wakwe nawo wendawatende Muungu yao. 4 Uyo endaawahanguse mesozi yawo yose kwaviya ufe khauko vituhu wala usungu wala maumevu wala ndio, kwaviya mbui za kae zemboka."