Graça

8 Kedanemene nnuide kenlum gade ngaugia ne kelilu, nah aide nnuikatei nnui ta gade ma; cide Tinggwang mta mapeu, 9 batadung gade ma, cine migede ngang daulak.

4 Dede Tinggwang pe keku kedi ziemne anuide ngaugia süt eh pa anuide hungla, 5 cine anui kemaudung gade tsaidi liede, pa anuide peu Khrista de ngngwa ring dailu—ngaugia gade nnuide kelilu—

23 Kedanemene mina pelane kemau tei dida nah Tinggwang kendube dwade dui dida, 24 nah pe ngaugia mta kepeu Khrista Jisu da kebam rikelu dene penuide tei masanglu.

15 Dede Tinggwang mapeu au Adam kemau teikedi kenzwage ma. Kedanemene mige hezai gikah kegai ziemne kekieege tsaidi liecai, Tinggwang ngaugia de daihia gede kieeki ziebi mi hange, Jisu Khrista, ngaugia mapeu de, mi kekieege ziemne kepui teilu kera!

21 Aide teikegai au, kemau ketsai reu di kedinzwa, anui Rampaube Jisu Khrista gade Tinggwang ngaugia de makesang gade peu kelungta teilung reu kengkieng teu lalu kerane.

14 Cine kemau depeu nnui reu diso. Kedanemene nnui hezaibe kangga bam ma, dede ngaugia kangga.

Makesangbe kilamedung

15 Iciucai dainzwalai? Anui hezaibe kangga mene, ngaugia kangga la kedine kemau teizie ni? Peu madaude cinzwadi helo.

9 Pa anuide kelilu nah anuide kemci gage qu gailu da—anui batadung rehi gade ma, dede pe mariem nah pe ngaugia rehi gade, pa ndaa raitu gade Khrista Jisu dade pe ngaugia anuide peuda,

11 Kedanemene Tinggwang mina pelane de kelilu kera ziemne pe ngaugia keulia dida. 12 Ngaugia cide anuide ledeu beu, iciu eh renetlam la kemakpe nah kideube hengindung gidi eh anui kideu aika mriak nah masang, nah renet zai ga lunghlu kerane,

Mci lu

13 Cine nnui kecet mteilwe bamlu, Mriaklu, nnui keregui ngaugia gage kai cangsiak lu cide Jisu Khrista de liagai kecudau nnuide peuzie.

10 Dede nnui kakge keherei gai lude, ngaugia pelane Tinggwang nnuide Khrista gade pe kelungta kendu gage qugai kelube ne nnuide teimmi, tei ntip nah teingkieng beuzie.

8 RAMPAUBE au mide ngaunggia nah mide ku la;

pa au pelung tie; nah pa au samkak kelu kesamsang le pui.*

6 Ma keyi nah samkakkelu kesamsang a teilung pelane suila mui zie;

nah Ih RAMPAUBE ki ga a teilung kelungta lungh dizie.

17 Peu Rampaube anui Tinggwang zai keyi de anui gu kelube tei lulo;

anui badung le teikegai lungh yilu;

kesang, anui badung le teikegai lungh yilu.

A rabe RAMPAUBE de kwabam

1 Ih keherei kwaki gade ncu qugai, Oh RAMPAUBO.

2 Rampaube, a kwa kingnei gailo;

ngaugia ziemne a nggia mra kebamde

kingnei teune gailo.

24 "RAMPAUBE de peu nnui samlam beulu nah nnui ma pielu.

25 RAMPAUBE de peu nnui dade pe zaiyi nah nnuide ngaunggia beulu.

26 RAMPAUBE de peu pe suiyi eh nnui de pielu nah nnuide lungciep peulu."’

18 Dede RAMPAUBE au nnuide hung eh kwabam, cine pa au nnuide ngaugia keulia kera mtei pwabam.

Kedanemene RAMPAUBE au kemzui Tinggwang; pecu kwa kebamme samlam pungtu.

21 Rampaube Jisu ngaugia de peu kemcime da la kelube tei lulo. Amen.

25 Anui Rampaube Jisu Khrista ngaugia depeu nnui rabe de ngngwala kelube tei lulo. Amen.

16 Anui kuu eh ngaugia Tinggwang hegwangbam ga tetgai cugo, iciu eh anui ngaugia ngaulu kerane nah ngaugia peeilu eh anui teu maikesia tingdau nghalu kerane.

24 Dede Ih a ta nah Rampaube Jisu acu teilo kebeu zierangta, cide Tinggwang ngaugia samliakeyi zierang sünne eh ranglo kebeude tei canglu kera gwale, Ih akatei de a teilung au magede melie cetla.

16 Tinggwang kideube de hungzu kecune, pe Na kepumlibe de pa kaibeu, iciu eh pecu nlum kelu keheibe de kap eh gah dilak dede kelungta kering ngaulu kerane.

14 Nnui mina nnui dage teimaukedi maugi beucai, tinggim ga kebam nnui Pei de nnui teimau kedi maugi beuzie.

13 Pe mau kebai kedibe de yipet gailak,

dede pe mau pet kelube nah cidungde gi kelube de au ngaugia keulia zie.✝

Kahkegwang ngyi ziemne kerengei

1 Hezekiah Israel nah Judah pelane ga samgwame langgai, nah Ephraim nah Manasseh dage de Jerusalem ga RAMPAUBE ki ga gwang maisia lie laisiu raugai, RAMPAUBE Israel Tinggwang de twa eh kahkegwang ngyi hengyi kerane.* 2 Kedanemene hegwangpei, pe muiteumedung, nah Jerusalem ga hemaa pelane, keina bekei gage kahkegwangngyi de hengyi kera kesamdau kelune. 3 Penui tingdane hengyi kela tingdau hengyi luma, kedanemene cingkume kekieege hengyi de ziemne penuide teimcilu ma nah minadung Jerusalem ga ngkwalu kemakne. 4 Riem kelu aide hegwangpei nah hemaa pelane penui suilu. 5 Cine penui Israel pelane ga, Beersheba namdi gade Dan namdi kecang, Jerusalem gade RAMPAUBE, Israel Tinggwang de twa eh kahkegwangngyi de hengyi kera ziemne minadung gwang maisia lie kecu sahgai kera samteilu. Kedanemene penui hengyi de hezai laisiukwak gage raupwa kela de nzwa mina kiee süt eh mneilu ta kedine. 6 Cine hegwangpei aja gade samgwamedung hegwangpei nah pe muiteumedung dade laisiudung teu eh Israel nah Judah pelane ga miedi. Penui rangdi, "Nnui Israelmedung, RAMPAUBE, Abraham, Isaac nah Israel Tinggwang da nreu cailigwang lulo, iciu lude pa nnui bangh kelumedung Assyria gwangdung ba gade pak kelume da cailigwang dailu zie. 7 Nnui paume mede nnui siname RAMPAUBE, penui paume Tinggwang sam gikah kedime nzwa diso, penuide au nnui kengau de nzwa kehing ge tei di. 8 Nnui paume nzwa nnui helungtak diso; meliene, nnui katei nnuide RAMPAUBE de peulu nah pe kemci ni ga, pa kelunghta teimci pwa kebam ga gwanglu, nah RAMPAUBE nnui Tinggwang de recalu, iciulude pe rata de nnui dade mbailu zie. 9 Kedanemene nnui RAMPAUBE da cailigwang dai lucai, nnui caireiswacing nah nnui namedung nnuide lang pwa hebaangme ge tei kedime dwa gade ngaugia ngau luzie, nah penui aipau deu ga cailigwang dai luzie. Kedanemene RAMPAUBE nnui Tinggwang au pezai yi nah ngaunggia la, nah nnui pe da cailigwanglu cai, pa nnui dade nreu tet dilak."

10 Cine samgwame namdi ket cai ket eh Ephraim nah Manasseh cuikui ga, nah Zebulun deu ga kecang kahgwang, dede Ephraim, Manasseh, nah keda tingpeule leuhme Hezekiah samgwame de nuidi. 11 Iciuliede, Asher leuhme, naimiak kenlütle Manasseh nah Zebulun leuhme kangge penuide tei henalu eh Jerusalem ga gwanglu. 12 Tinggwang Judah gade heta tei gai, peu penuide lung ge tei eh hegwangpei Hezekiah nah muiteume aja de RAMPAUBE sam gade teilu kerane.

13 Mina kekieege, hemaa maadi, Cehikaikemak Tangku Ngyi hengyi kerane keina bekei Jerusalem ga ngkwalu.* 14 Penui cuhlu delwe Jerusalem ga recabamdung kebam de nah perim kehengui keru recabamdung pelane keu gidi; penui cidungde Kidron reuceuna gage kelien gaidi. 15 Pecai penui keina bekei ziangreiehmdai benai Kahkegwang ngyi meuründung teitsetlu. Cingkume nah Levime ngngamdi, cine penui penuide teimcilu delwe keru recadung RAMPAUBE kiga pwa gwanglu. 16 Penui, Tinggwang minabe Moses zaidung de mzai eh, penui mzi ga penui sap ga saplu. Cingkume Levime ba gade penui ngaukelu hejai de kezingai. 17 Kedanemene hemaa ga mina kekieege penuikatei de teimcilu kemakme kebamne. Ciziemne Levime mci kemakme leune nah penui ratakdung RAMPAUBE dage teimci gailu kemakme ziemne Kahkegwang meuründung gilu.✝ 18 Kedanemene mina kekieege, Ephraim, Manasseh, Issachar nah Zebulun leuh gade kekieege, penuide teimci mene bam, dede penui raupwa kebam zai de gikah di eh Kahkegwang taktyei tyeilu. Kedanemene Hezekiah penui ziemne kiebeu eh ranggai, "Peu pezai keyi RAMPAUBE de nnui pelane mau gibeu lo, 19 RAMPAUBE Tinggwang, penui paume Tinggwang de helung kai eh peei kelame de, renet zai gade penuide teimcilu meliede." 20 Cine RAMPAUBE Hezekiah sam kingneilu nah minadung de teingkei beu. 21 Israelme Jerusalem ga kebammedung Cehikaikemak Tangku Ngyi de penui sui yisüt eh lang henane hengyilu. Levime nah cingkumedung, langnai ge cai langnai ge RAMPAUBE de twa eh leibungdung kwa nah RAMPAUBE dage lei teigai. 22 Hezekiah Levime pelane RAMPAUBE de kereca lamlui kecime dage sam rang kecungsüt gai. Cine penui hengyi kecu ting lang henane kecang matyei, kekangbau reca ratakdung teigai, nah RAMPAUBE, penui paume Tinggwang dage penui mau petgai.

23 Hemaabe pelane cidau lang henane hengyi sidai kera kesamteilu, nah penui penui sui yisüt eh hengyilu. 24 Kedanemene Judah gwangpei Hezekiah ketumseu cang ge nah meurün cang hena hemaabe de pwapeu; nah muiteumedung hemaabe de ketumseu cang ge nah meurün, nah hemeu cangkerei kaibeu. Cingkume kekieege penuide teimcilu. 25 Judahme ngkwa kelu pelane, cingkume nah Levime, nah Israel gade gwang kelume pelane, Israelme deu gade sangme gwang kecume nah Judah ga kelunghme de si eh, pelane penui sui yisüt lu. 26 Cine Jerusalem ga suiyi le puidi, kedanemene, Israel gwangpei David napei Solomon tingdau gwale Jerusalem ga cikenzwa tei mede kecune. 27 Pecai cingkume, nah Levime, cuhlu eh minadung de samlam beu. Penui rang kegai kwa siulu, nah Tinggwang pe kemci ni gade penui kekie luulu.