1 "Ma aidung de Ih nnui dage ranggai iciu eh nnui kau di melu kerane. 2 Penuide synagoguedung gade gwa mpet dizie. Dede pe bamdakkak gwang lada nnuide teitset kecu keheibe de pa Tinggwang gwa tei lalie kecu cet kera ting. 3 Penui ma aidung de tei zie kedanemene penui Peibe mede acu de ci kemakne. 4 Dede Ih nnui dage ma aidungde ranglia dida iciu eh penui ting kegwang dau, nnui nsung luzie penui ha Ih nnui de rang kebeu de. Dede Ih nnui dage ma aidungde keraidau rang ma, kedanemene Ih nnuide ngngwa kelane.

5 Dede cu au Ih acu lang kegaibe da mie zieda, iciude nnui migede, "Nang daiga mie launo?" de eh acu keteu ma. 6 Dede Ih nnui dage ma aidungde rangkegai ziemne, nnui nlung suisiet le pui bam dida. 7 Dede kesangbe Ih nnui dage rangla, Ih tetkedi au nnui ziemne yiki. Kedanemene Ih tet kemakcai, Helungtaukemlabe nnuida gwanglak kecune, dede Ih tet dicai, Ih pecu nnui dage langgai beuzie. 8 Pa gwang sangne, Helungtaukemlabe ne kideu be kemau ha, nah makesang ha, nah tutiak ha maula kedi rangmci liazie, 9 kemau ha, kedanemene penui acu nlum kemakne; 10 nah makesang ha, kedanemene Ih au Peibe da gwang dizie nah nnui acu ngausi tadi zie; 11 nah tutiak ha, kedanemene aipau kideu reu kengkieng teu kelabe de tiakdi delu.✝ 12 Ih nnui dage ma kekiee ge rangsi kera bam reu, dede nnui cu cidungde pungpa dida. 13 Dede pa, Kesang Rabe, gwang keludau, pa nnuide kesangbe leune saulia zie, kedanemene pa pekatei pe dade rang laklu. Dede pa siukelu leune rangzie, nah pa nnui dage gwang keladungde rangzie kecune. 14 Pa acu teindu beuzie, kedanemene pa agu de keulu eh pa nnui de rangbeu zielu. 15 Peibe kebam be leune agu lie. Ciziemne, Ih rangkelade Rabe au agu keulu delwe nnui dage pa cide ranglia beuzie. 16 Matiemene nnui acu ngau sita dizie da, nah matie kemakne nnui acu ngaudai zie."

17 Iciuge ledeukelume kangge hangge ge dade rangdi, "Pa anui da rang kebam de dai no? Matiemene nnui acu ngau sita dizie nah matiemene nnui acu ngau daizie," nah "Ih Peibe da gwang kera ziemne?" 18 Ciziemne penui rangdi, "Pa kerang aide dai no, ‘Matiemene’? Pa dai rang zeu bi anui au ci meda." 19 Jisu penui pe dade keteu neu kebam ngaulu, nah pa penui dade rangdi "Ih rang kegai, ‘Matiemene nnui acu ngau sita dizie’, nah ‘Matiemene nnui acu ngau dai zie’? Aide ziemne nnui katei nnui kakga de keteu lani? 20 Ih nnui dage rangsiakte liazie nnui hap nah heei zie, dede kideube au pesuiyi dizie. Nnui sui kesia ne puidi zie, dede nnui suisiet de lipwa suiyi ge tei dizie. 21 Mipui ge kemna dau pa rei la kedanemene pe bamdakkak gwang bam kedine, dede pa henana gede mna lu ge, pa pe rei de nsung si la ma kedanemene mige de mna pwa kideu gage kai kelu pe suiyi dene.✝ 22 Cu cine nnui lungrei bam, dede Ih nnui de dau dai zie, nah nnui nlung suiyi le pui dizie, nah migede nnui dade suiyi süt teudi gailak. 23 Cipau tingba benai* nnui magede acu keteu lak. Ih nnui dage rangsiakte liazie, makeheibe de Peibe dade a zi gade nnui kie cai, pa nnuide cide peu zie. 24 Cu kecang nnui a zi gade mage de kie mereu. Kielu, nah nnui ngaulu zie, ciu eh nnui suiyibe cangsiaklu kerane.

25 Ih ma aidungde nnui dage sam regwadung teu eh ranggai, dede pe bamdakkak ge gwang lada Ih sam regwadung teu nnuide rang silak da, dede meliene ncigi eh Peibe ha nnui dage rang lia zie. 26 Cipau tingba benai nnui a zi gade kie zie nah cide Ih Peibe dade nnui ziemne kie zielie rang ma, 27 kedanemene Peibe pekatei de nnuide hungla nnuide acu hung kela ziemne nah cinzwa eh nnui Ih Peibe dade gwang lie kecu nlumkelu ziemne. 28 Ih Peibe dade gwang, nah Ih kideube ga gwang lie. Ih kideube de pwet dai di eh Ih au Peibe da gwang dizie." 29 Pa ledeukelumedung rangdi, "Pielo, cu au nang ncigi eh rangzeu nah nang sam regwa gade rangsi mene. 30 Cu au nang ma pelane ci kela anui cibam dida, nah migede ncu ma keteu maisia ma. Aide ziemne, anui au nang Tinggwang dade gwang lie kecu nlumla." 31 Jisu penuide keligai, "Nnui cu au nlumlu deni? 32 Pielo, pe bamdakkak be gwang lada, nah gwang bam dida, nnuide teizang di kera, migege kecu pe ki riep gwang di kera, nah nnui acu gidi zie. Ciciu de Ih a katei dima kedanemene Peibe acu ngngwa kelane.✝ 33 Ih ma aidungde nnui dage rang gaila iciu eh nnui a dade lungciep bamlu kerane. Kideu gade nnui keherei zie, dede kuulu, Ih kideube reu ngkieng luda".