1 Cu Jisu pa John swade ledeukelume kiee nah duipum teibeu kiee gwa kebam Phariseeme siukelu ci keludau 2 (Jisu pekatei au duipum tei meliede, dede pe caisuimedung ne tei bam), 3 pa Judea deu pütdi delwe Galilee ga cailigwang daidi. 4 Dede pa Samaria deu gade tetkah gwang maisia di. 5 Cine pa Samaria ga Jacob ne pe na Joseph de kepeube deu ge taiga Sychar lie kecu nam ga gwanglu. 6 Cu Jacob tekwa cika bam. Jisu Pe beu gade leu la kedine, pa tekwa tai ga ntumbam. Cide tingna tingding dau ge. 7 Samariame pui ge dui twak kera gwanglu, nah Jisu pe dage rangdi, "Acu dui sak kera kesa peulo," 8 Pe caisuimedung namceu ga taktyei lui kera mie kedine. 9 Pecai Samariame pui pe dage rangdi, "Dainzwa delwe, nang, Jewme gele, a dade, Samariame pui ge dade dui sak kera kiebam no?" Kedanemene Jewme Samariame de ngngwa magede teila kemakne. 10 Jisu pecu keligai nah rangdi, "Nang Tinggwang mapeu de nah n dade, ‘Acu dui sak kera peu lo,’ de rang kebambe de cau bi ci liecai, nang pe dade kie zie nage, nah pa ncu keringdui pwapeu zie nage." 11 Mipuibe pedade rangdi, "Kedibo, nang duibung ge de gah nah tekwa de cukbam. Cine keringdui de nang daiga de ngaulu zie no? 12 Anui pei Jacob, anuide tekwa kepeube, nah tekwa cipaude gade pekatei de sak da, pe namedung nah pe kauhau de kesak nzwa, nang pe swade diki lie lani?" 13 Jisu keligai eh pe dage rangdi, "Keheibe de dui aide gade sak kelube hereu dai dizie, 14 dede keheibe de Ih pecu dui pwapeu zielie kela gade saklu cai madau gede hereu dailak. Meliene, Ih pecu pwapeu zielie kela dui cide au peda duilet ge tei dizie, cide lwapwa kelungta kering duilet ge dizie." 15 Mipuibe pedade rangdi, "Kedibo, dui aide acu peulo iciu eh Ih madaude hereu dai melu kerane nah aika gwang eh dui twak dai melu kerane." 16 Jisu pedade rangdi, "Miecu, n nahpei de qulu, delwe aika cailigwanglo." 17 Mipuibe keligai nah pedade rangdi, "Ih a nahpei gede gah lie." Jisu pecu keligai, "Nang petaulie, ‘Ih a nahpei gah,’ de eh kerang de, 18 kedanemene nang n nahpei hang mengei bam dida, nah nang cu ngngwa kebamde au n nahpei ma. Nang kerang de au kesangda." 19 Mipuibe pe dade rangdi, "Kedibo, nang au caihakecime ge kecu Ih ci luda. 20 Anui peimedung lamlwa aipaude gade recala, dede nnui minadung Jerusalem gade reca lie rangla."✝ 21 Jisu pe dade rangdi, "Acu nlumlu, mipui bo, nnui Peibe de lamlwatu aide gade mede Jerusalem gade reca tadi kera pe bamdakkak gwangzeu da. 22 Nnui ci kemakbe de nnui reca. Anui ci kelabe de reca, kedanemene, kelikelu au Jewme dade lu.✝ 23 Iciuliede, bamdapkak gwangzeu da, nah cu aika bam dida, kesang tei eh reca kelamedung Peibe de rabe nah kesang gade reca dizie, kedanemene Peibe de mina cinzwa pecu reca kelamedung de peei lalu. 24 Tinggwang au Rabe, nah minadung pecu reca kelame rabe nah kesangbe gade reca maisia." 25 Mipuibe pedade rangdi, "Messiah au gwangla kecu Ih cibam (Khrista lie qu kelabe de). Pa kegwang dau, pa anuide maleune ranglia beuzie." 26 Jisu pe dade rangdi, "Ih pa da, ncu mpau kebambe de."

27 Cipau tingdau pe caisuime cailigwang lu. Cu penui pa mipui gede mpau kebam ne penui swa gahdi, dede migede, "Nang dai luuneu lano?" mede, "Nang daitei pecu kempau bamno?" de eh rangma. 28 Cine mipuibe pe duibung pütdi, nah namceu ga caili gwang di, nah minadung dage ranggai, 29 "Gwang pie lulo, Ih tei kedidung leune acu ranglia ciak kebeube peide. Pa Khristabe lubui deni?" 30 Penui namceu pütdi delwe peda gwanglu. 31 Cipau tingdau, ledeukelumedung pecu, "Keledeubo, matyei lulo," de eh kecung bam. 32 Dede pa penui dade rangdi, "Nnui ci kemakpe Ih taktyei tyei kera bam." 33 Cine ledeukelumedung hangge ge dade rangdi, "Kangge pecu magede tyei kera teugwang beuni?" 34 Jisu penui dade rangdi, "A ketyeipok au acu lang kegaibe lungning Ih tei kera nah pe bata teicang kerade da. 35 Nnui rang meluini, ‘Kei mdai bam si reu nah pecai luhlüt ting gwang zie? de eh. Pielo, Ih au nnui dage rangbam, nnui ngangcuh eh luhdung pielo, cidungde meu pwa rumlu kebui bamdi delu! 36 Luhlüt kelame ziehidung ngau lula nah matsi kelungta kering ziemne hekwa lula, iciu eh ling kegaibe de nah rum kegaibe de suiyi ngngwa mzi nsamlu kerane. 37 Kedanemene sam rang kela aide kesang lie, ‘Mige ling gaibam, nah mi kedage rum bam.’✝ 38 Ih nnuide nnui bata teigai kemak gage rum lulo langgai dida. Kedame ne bata teigai da, nah nnui penui bata tei kegai ga lüt dida."

39 Namdi cika Samariame mina kekiee ge pecu nlumlu, mipuibe de, "Ih tei kedi leune pa acu ranglia siakte da," de eh zierang tei kegai de pau kebeu ziemne. 40 Cine Samariamedung peda gwang kelu dau, penui pe dade penui da bam lulo kiedi, ge pa cika langnane bamdi. 41 Mina kekieege nlum si lu pe sam de ziemne. 42 Penui mipuibe dade rangdi, "Nang rang kegai de ziemne anui nlum kelube ma, kedanemene anui anuikatei de pe siulu da, nah anui ci luda mina aide kideube de Kelikelube kesang lie kecu."

43 Cipau langnane cai, pa cikade Galilee deu gage tetgaidi. 44 Kedanemene Jisu pekatei de caihakecibe ge au pekatei pe deudi ga kerüt ngaula melie kecu ranggai delu. 45 Cine pa Galilee ga gwang kelu dau, Galileeme pecu ngngwa lu. Jerusalem ga hengyi dau pa tei kegai leune penui ngaulu, kedanemene penui de hengyi cide ga mie kecu ziemne.

46 Cu pa Galilee ga Cana deu ga gwang dailu, pa dui le zau tei kegaibe nam ga. Cika mige hegwangki ga heta ketei kedime ge pe napei Capernaum ga nra bam. 47 Pa Jisu Judea gade Galilee ga gwang kebam siu luge, pa Jisu da mie delwe pecu gwang eh pe napei de tei hemi beulo kiedi, kedanemene pa tsailai eh kebamne. 48 Pecai Jisu pedade rangdi, "Nnui marehidung nah miswakegahdung ngau kemaktane nnui nlum lak."✝ 49 Kedibe de pedade rangdi, "Kedibo, a na tsai di kemak dwa ge hung beulo." 50 Jisu pedade rangdi, "Miecu. N na ring luzie." Mipei de Jisu pe dage rang kegai sam de nlumlu, nah pa tetdi. 51 Dede pa tet nghungla kezeu dau, pe kilamedung pecu redaulwe pe na ringbam liede pecu paubeu. 52 Cine pa penui dade daipau tingdau pa yi gwanglu dino keteu di. Cine penui pecu keligai, "Nziene bam ge tingdau kenra de pe dade gahdi." 53 Ge pe pei cipau tingsiak dau Jisu pe dade, "N na ring luzie," de rang kebeu de nsunglu. Cine pa nah pe kilungme pelane nlumlu. 54 Jisu Judea gade Galilee mpet kelu cai miswakegah bata tei kegai aide pe kenabe da.