1 Aidungde cai, Jisu Galilee duidi lulegim Tiberias duidi lie eh de qukela ga miedi. 2 Cidau mina maadi ge pecai sui ladi kedanemene penui pa teeineei kelame dage marehidung tei kebam ngau kelune*. 3 Jisu lamlwa ga nghang nah pa cika pe caisuimedung de ngngwa ntum lu. 4 (Cu kahkegwang, Jewme ngyi ting de, nnadi). 5 Jisu mina maadi ge peda gwangla kedi pa ngau luge, pa Philip dage rangdi, "Dai gade anui tangku luilai aidungde de peu tyeilu kera?" 6 (Dede Jisu Philip de kedakpie kerane aide ranggai, kedanemene Philip daipai tei laubi pa ci kebamne.) 7 Philip pe sam keligai, "Penui ziemne tangku denarii* haina mi liede cam zie, hangge ge dage kecamna ge peu gwang zie liede." 8 Pe caisuime hangge, Simon Peter sinabe Andrew, Jisu dade rangdi, 9 "Aika mipeina ge da barley tangku mengei nah heka kena lalie, dede mina kekiee kakte ainade daige zieno?" 10 Jisu ranggai, "Minadung de peu ntum bamlu." (Cu heni cika au tsehei kekiee ge bam.) Cine mipeidung ntum lu, pumpei cang mengei kenzwa ge. 11 Pecai Jisu tangkudung keulu eh Tinggwang de hetwa peukelu cai, pa cide ntum kebammedung de peugai. Pa heka de cinzwa peugai, penui tyei keneu kiee ge. 12 Minadung nggei luge, pa ledeukelumedung dage ranggai, "Bang keludung de keu hekwalu, iciu eh magede peu ngkapdi melu kerane." 13 Cine penui cidungde keu hekwalu nah barley tangku mengei tyei kelume ne tyeibangh kelu gade hebie kereiekena teipui lu. 14 Cidau, minadung marehi aide pa tei kegai ngau luge, penui rangdi, "Aide caihakecibe kesangbe da, kideu ga gwang lai eh kebambe de."✝ 15 Penui kemei tei eh pecu tuilwe pecu peu hegwang teidi kera gwang lai zeu lie kecu Jisu cilu ge, pa tet nreudai eh lamlwa ga pekatei nghang di.

16 Tinghegi gwang luge, Pe caisuimedung jaaidi ga hungdi. 17 Penui liem ge ga lütlu, nah jaaidi tetkah eh Capernaum nam gage tet gaidi. Cidau tingmuidi, dede Jisu penuida gwanglu mene ladi. 18 Tingkai cisüt ge guibam, nah jaaidi de nswak bam di. 19 Penui liem taupwa stadia ngkaiemengei mede camrei* ge mie dige, penui Jisu dui reuga tet kela nah liem ga gwang mna kezeu ngau lu, nah penui ngngi di. 20 Dede pa penui dage ranggai, "Aide Ih lie! Ngngi di so." 21 Ge penui pecu liem gage ngngwa gailu neu di, nah zette eh penui gwang zielie kela deu ga liem gwang cang lu.

22 Pecai benai, mina maadi jaaidi lulegim sap kebammedung liem ket gwale keda gede bam kemak nah Jisu pe caisuimedung de ngngwa liem dega nlüt kemak, dede pe caisuimedung pecu ngngwa mene tet kedi ngaulu. 23 Dede, liemdung Tiberias gade Rampaube ne hetwa peu kegai cai penui tangku ketyei ni taiga gwanglu. 24 Ciziemne hemaabe Jisu de nah pe caisuimedung de cika bam kemak ci luge, penui penui katei ne liemdung ga nlütlu delwe Jisu de peei eh Capernaum ga miedi.

25 Penui duidi lulegim ga pecu ngaukelu cai, penui pe dage rangdi, "Keledeubo, nang daidau aika gwanglu no?" 26 Jisu penuide keli eh ranggai, "Ih nnui dage rangsiakte liazie, nnui acu peeila, nnui marehidung ngau kecune ma, dede nnui tangkudung kesa tyeilu nah nggei kelu ziemne. 27 Gahdi kela ketyeipuk ziemne heta tei so, dede Mina Nabe nnuide peu zielie kela taktyeipuk kelungta kering gage liacang lu kebui de ziemne teilu, kedanemene Peibe Tinggwang ne pedage pe giak dapti delu." 28 Pecai penui pedade rangdi, "Anui daipai tei maisia no, iciu eh anui Tinggwang tadung tei lu kerane?" 29 Jisu penui sam keligai eh penui dade rangdi, "Tinggwang ta au aide da: Cide nnui pa lang kegaibe de nlumlu kera deda." 30 Cine penui pe dage rangdi, "Iciucai nang marehi daipai teilia lai no, iciu eh anui ngau eh ncu nlumlu kerane? Nang daipai tei zie no? 31 Anui peime hetaideu ga manna tyei eh gwang, cide Kesanglaisiu ga rauteu kela nzwa, ‘Pa penuide tangku tyei kera tinggim gade peu.’"✝ 32 Ge Jisu penui sam keligai, "Ih nnui dage rangsiakte liazie, Moses ne tangku cide nnuide tinggim gade peu ma, dede a pei ne tangku kesangbe nnuide tinggim gade peu bam. 33 Kedanemene Tinggwang gu tangku au tinggim gade kehungbe nah cide kideube de kering pwapeu la." 34 Cine penui pe dade rangdi, "Kedibo, anuide tangku aide peu muilo." 35 Jisu penui dage rangdi, "Ih au kering tangkube da;* caudungge a da gwanglu dibi pa mzeu dilak, nah acu nlum kelube madaude hereu dai dilak. 36 Dede Ih nnuide rangbeu da nnui acu ngau kesangda, nah nnui nlum lak. 37 Mileune de Peibe acu kepeube a da gwang zie, nah a da gwang kelume de Ih kelien gidi lakzing. 38 Kedanemene Ih tinggim gade hung bam, a lungning be tei kera ziemne ma, dede acu lang kegaibe lungning tei kera ziemne. 39 Acu lang kegaibe pe lungning au aide da, iciu eh pa acu pwa kepeu pelane hangge dede Ih teinggah dilak, dede pecu kamtube tingba benai teucuh beu zie. 40 Kedanemene aide Peibe lungning da, mileune de Nabe de ngaulwe pecu nlum kelube kelungta kering ngaulu zie, nah Ih pecu kamtube tingba benai teucuh luzie."

41 Ge Jewmedung, "Ih tinggim gade hung kelu tangkube da," de pa rang kegai ziemne pecu ncam di. 42 Cine penui kakde rangdi, "Aide Jisu Joseph napei, anui pe pei nah pe pui de ci kebam de meni? Iciu eh dainzwa pa cu, ‘Ih tinggim gade hung kelabe da’ de ranglubui no?" 43 Jisu penui dage keligai nah rangdi, "Nnui kakte ncam kebam de mtaklu. 44 Migede a da gwang gailak Peibe acu lang kegaibe ne pecu teu teugwang beu kemaktane, nah Ih pecu kamtube tingba benai teucuh luzie. 45 Kesanglaisiu ga rau kenzeu, ‘Nah Tinggwang ne mileune de ledeu beuzie.’ Mileune Peibe dade siu nah ci kelube a da gwang zie.✝ 46 Migede Peibe de ngau ma, Tinggwang dade kegwangbe rünne gwale, pa Peibe de ngau da. 47 Ih nnui dage rangsiakte liazie, nlum kelube kelungta kering bam dida. 48 Ih au kering tangkube da. 49 Nnui paume renaamkang gade manna tyei da, delwe penui tsai dida. 50 Tangku aide tinggim gade kehungbe, iciu eh mige cide keceuna ge tyei lu delwe tsai dilak. 51 Ih tinggim gade kegwang ringkela tangkube da. Keheibe de tangku aide ketyeime kelungta ring luzie. Ih kideube ringlukera ziemne peulai kezeu tangkube au a pumteihbe da."

52 Ge Jewmedung penui kakte kesamlim cuhdi, "Dainzwa eh aipau pei de pe pumteih tyei kera peu zielie zeu no de rangdi?" 53 Ge Jisu penui dade rangdi, "Ih nnui dage rangsiakte liazie, nnui mina Nabe teih tyeilu kemaktane nah pe jai sak kemaktane, kering nnuida bam gailak. 54 A teih tyei nah a jai sak kelube kelungta kering bam dida, nah Ih pecu kamtube nai teucuh beuzie. 55 Kedanemene, a teih au taktyei kesangbe da, nah a jai au sakkela kesangbe da. 56 A teih tyei nah a jai sak kelube a da bam, nah Ih pe da bam. 57 Ringkela Peibe acu lang kegai nzwa, nah Ih Peibe ziemne ring kebam nzwa, cine a cu tyei kelume, pa de a ziemne ringlu zie. 58 Tangku aide tinggim gade nghung kebambe, paumedung tyeilwe tsai kedibe de ma. Tangku aide tyei kelume kelungta ring luzie." 59 Jisu Capernaum ga ledeu kebam dau synagogue (ngqwaki) gade pa ma aidungde rangdi.

60 Ge pe caisuimedung aide siu kelume kekiee ge rangdi, "Keledeu sam aide whung zu; caune aide luulubui no?" 61 Jisu, pe caisuimedung aide ncam kedi pa pekatei ci kedine, penui dade rangdi, "Sam aide ne nnuide tei ngkung dini? 62 Iciucai dainzwa lai magade nnui Mina Nabe ndaa kebam ga nghang daidi eh ngau liecai?✝ 63 Kering peu kelabe au Rabe; pumteihbe au magede kemmi gah. Ih nnui dage rang kegai samdung de au Rabe lie, nah cidungde au keringria lie. 64 Dede nnui kakga nlum kemakme midungge bamreu." Kedanemene Jisu au raitu gade caugamme pecu nlum lakbi nah caube ne pecu tuigai beu ziebi cibam. 65 Cine pa rangdi, "aide ziemne, Ih nnui dage rangla migede a da gwang gailak Peibe ne gwang kera pecu peu mecai."

66 Aide ziemne, pe caisuimedung kekiee ge caisimdi, nah pecu ngngwa tetsi tadi. 67 Ge Jisu kereiekenabau dade rangdi, "Nnuide tetdi neu lani?" 68 Simon Peter pecu keligai, "Rampaubo, anui cau dage tet gailai? N da kelungta kering samdung la, 69 nah anui nang au Tinggwang dade kegwang Kemcibe lie kecu nlum nah cibam dida." 70 Jisu penui dade rangdi, "Ih ne nnui de kedet lu meluini, kereiekena bau, nah nnui kakte mi hangge herakesiabe da?" 71 Pa Simon Iscariot napei Judas ha rangbam, kedanemene kereiekenabau kakde, Jisu de tuih gaibeu kerabe de pa da.