1 "Ih nnui dage rangsiakte liazie, meurünki ga kirieki gade lüt mene keda lampui gade nrakah kelabe au keregame nah sütketyeime delie. 2 Dede cau kirieki gade lüt labi cipaube au meurün kekwabe delie. 3 Kirieki kekwabe pe ziemne ngkei beula. Meuründung pe kwa siu lula, nah pa pe meuründung zi riep qula nah penuide nzang mpet beula. 4 Pa pe meurün hau peciakne de ngngwa mpet luge, pa penui dwa rai mie, nah meuründung pe caisui la, kedanemene penui pe kwa cila. 5 Dede penui cikemakme cai sui dilak, dede pe dade penui pak mdei di zie, kedanemene penui cikemakme kwa ci lamah." 6 Jisu samgwa aide penui dage rang, dede penui cilu tadi cide dai bi kecu pa penui dage rang kebam de.

7 Ge Jisu penui dage rang dai eh, "Ih nnui dage rangsiakte liazie, Ih au meurün kirieki be da. 8 A dwa gwang kecu leune keregame nah sütketyeime da, dede meuründung penui kwa kingnei ma. 9 Ih au heriekibe lie. Keheibe de a dade lütlu cai, pecu kelilu zie, nah pa nlütlu zie nah mpet eh ceheideu ngau luzie.✝ 10 Keregabe rega kera nah teitset kera nah ngkap kera ziemne gwale gwang lamah. Ih gwang kebam au penui kering ngaulu kerane nah peu ngaukieelu kerane. 11 Ih au meurün kekwa keyibe. Meurün kekwa keyibe meurün ziemne pe teilung kaibeu la. 12 Dede pezie liteu kela kilabe au meurün kekwabe ma nah meuründung de pegu ma. Pa heneu kegwang ngaulu ge meuründung de gihdi eh pak dila, nah heneu de penuide tui nah penuide gwa zangradi. 13 Pa pak tetdila kedanemene pa au pezie liteu kela kilabe kecune nah pa meuründung de lungpang lamah. 14 Ih au meurün kekwa keyibe, nah Ih agu cila, nah agu acu cila. 15 Cinzwa, Peibe acu cila, nah Ih Peibe de ci, nah Ih meuründung ziemne a teilung kaibeu la. 16 Ih meurün kedabedung de bamreu aipau meurün ki ga bam kemakbe. Ih penui de de ngngwa gwang maisia, nah penui a kwa siu luzie, iciu eh meurün hau ket nah meurün kekwabe de ket lu kerane. 17 Aide ziemne Peibe acu hung la: Ih a teilung kaibeu iciu eh Ih cide ludai lu kerane. 18 Migede a dade cide keuteu di gailak, dede Ih akatei cide kaibeu di zeu. Ih cide kaibeu kera kengkieng a da bam, nah Ih cide keuteu dai kera de kengkieng a da bam. Ih aja aide a Pei dade ngau luda."

19 Sam aidung de ziemne Jewme kak gade pangpop dai di. 20 Kedanemene mi kekieege rangdi, "Pa herakesia de ngngwa la dida nah mie dida. Daitei nnui pecu kingnei lano?" 21 Mikedame rangdi, "Sam aidung de au herakesia ngngwa kelame sam ma. Herakesiabe au miakcietme miak tei mrak gailak, pa teilu buini?"

22 Cidau Jerusalem ga Teikemci Hengyi ting di. Cide tingtiak ting, 23 nah Jisu tet nlüt mpet bam kerecaki ga Solomon kigu ga. 24 Cidau Jewme pecu twagwalu eh pe dage rangdi, "Dai tiege nang anui de peu ci mcilu mene bam zie no? Nang Khrista de liecai, anui de ndulia lo." 25 Jisu penuide keligai, "Ih nnui dage ranglia da, dede nnui nlum ma. Ih a Pei zi gade batadung tei keladung, aide a zierang delie. 26 Dede nnui nlumlu ma, kedanemene nnui a meurün kemak ne. 27 A meuründung a kwa siu lula; Ih penui de ci, nah penui a caisui la. 28 Ih penui de kelungta kering pwapeu, nah penui madau de tsai lak, nah mige ne de penui keheibe de a ba gade sütteu di gailak. 29 A Pei, penuide acu pwa kepeube, ma keda pelane swade diki, nah penuide migede Peibe ba gade sütteu di gailak. 30 Ih nah Peibe au ket." 31 Cidau Jewmedung tangtsudung keucuh dai eh pecu sam zielie di. 32 Jisu penuide sam keligai, "Ih nnui dage bata keyi kekiee Peibe dade keulia da. Bata cidung gade daide ziemne nnui acu sam zielie zeuno?" 33 Jewme pe sam keligai, "Bata keyi ge ziemne anui ncu sam zielie bam ma, dede Tinggwang de rangmsia kela ziemne, nah kedanemene nang, mina, nkatei ncu Tinggwang lie kelane."✝ 34 Jisu penui sam keligai, "Nnui zai gage rau nzeu meluini, ‘Ih ranggai, "Nnui au rabedung"’?✝ 35 Magade Tinggwang sam penui dage kegwangme de pa rabedung lie qu lacai (kesanglaisiu au gikah di gailak), 36 Peibe ne keuntsam kedibe nah kideu gage langkegaibe dage, ‘Nang au Tinggwang de rangmsia la dida,’ de eh nnui rangla ni, kedanemene Ih ranggai, ‘Ih au Tinggwang Nabe lie’? 37 Ih magade a Pei ta tei melie cai, acu nlum so. 38 Dede magade Ih cidungde tei bam liecai, nnui acu nlum melie de, batadung nlumlu lo iciu de Peibe a da la lie kecu nah Ih Peibe da la lie kecu nnui ci lubui nah cisiakte luzie." 39 Ciziemne penui pecu nim kera tei dai, dede pa penui deu gwale ge tetgai di.

40 Cine pa Jordan reu gwale ge tetgai daidi John keraidau mide duipum ketei bam gage, nah pa cika bamdi. 41 Mina kekiee ge Jisu da gwang nah penui rangdi, "John au marehi gede tei ma kesang, dede John aipau pei de ha rang kegai ma pelane kesangda." 42 Ge mina kekiee cika de pecu nlumlu.