1 Ciziemne, kahkegwang ngyi dwa lang herokne benai, Jisu Bethany ga gwanglu, Jisu ketsai gade kwak mring cu kelu Lazarus kebam nam ga. 2 Cine penui pecu tingmui taktyei mteibeu, nah Martha ne ma rengei bam, dede Lazarus au Jisu de ngngwa taktyeibam ga kebam mi hangge. 3 Pecai Mary maca perim kehengui litra ge* pemi hungsüt kecu nard le tei kelube keugwang, cide lepwa Jisu pi keniaklu, delwe pe tamle pe pi neu. Ge maca perim kehengui le kilung puidi. 4 Dede Judas Iscariot, pa ledeukelu hangge, pecu tuigai beu kerabe rangdi, 5 "Daitei eh marim kehengui ca aide denarii haicum* gade zwa pwa kegahme de peudi meno?" 6 Cidau pa cide rang kegai, pa kegahme de ku kebamne ma, dede pa keregame ge kecune. Pe da rangkangbung de la nah cika kai kebeude gade pa regalu kera ziemne. 7 Ciziemne Jisu rangdi "Pecu pütdi lu. Pa au acu kekung benai ziemne aide kai kenzeu. 8 Kedanemene kegahme au nnuide ngngwa bam muizie. Dede nnui au acu ngngwa bam muilak lu."✝

9 Ge Jewme mi kekiee ge Jisu cika bamlie kecu cilu, nah penui gwang, Jisu ziemne rünne ma, dede Lazarus de de pie kera ziemne, ketsai gade Jisu ne kwak nring kecube de. 10 Dede cingku kedimedung gwang ncütlwe Lazarus de de teitsetdi zielie eh riem cuhdi; 11 kedanemene pe ziemne Jewme kekiee ge tetdi nah Jisu de nlum kedine.

12 Cipau cia benai mina maadi ge hengyi ga gwang. Jisu Jerusalem ga gwang zeulie kecu penui siulu ge, 13 penui laira bang kiakdung keulu nah pecu redau zielie tet pet delwe sahbak eh "Hosanna! Rampaube zi teu kegwangbe samlam pungtu lie, Israelme gwangpei," dedi.✝ 14 Dede Jisu gadana ge ngaulu eh pereu ga bamlu; kesanglaisiu ga rauteu kelanzwa, 15 "Ngngi helo, Zion napui; pielo, n gwangpei gwang zeulie, gada nage reu ga bam eh."✝ 16 Pa ledeukelumedung keraidau aidungde cilu tadi; dede Jisu de kendu ga teucuh luge, pe ha aidungde raupwa kebam nsunglu delwe penui ma aidungde pe dage tei kegai nsunglu. 17 Cidau mina maabe cu pa Lazarus de herau gade qu mpetlu nah ketsai gade kwak mring keludau penuide pecu ngngwa la delie de eh pe zierang teigai. 18 Aipau kie de ziemne de mina maabe pecu redau kerane mie pet, kedanemene pa marehi aide tei kegai penuide siu kecu ziemne. 19 Phariseemedung ciziemne penui kak gade rangdi, "Ainie, nnui magede teilu bam meda; pielo, kideube pecai suila dida."

20 Cidau reca zielie eh hengyi ga kehangme kakga Greekme kangge dela. 21 Ciziemne mina aipaudungde Galilee deu ga kebam Bethsaidame Philip da gwang pecu keteu eh, "Kedibo, anui Jisu de ngauneu lalie," dedi. 22 Philip mie Andrew dage rangbeu; Andrew Philip de nzang mie, delwe penai Jisu dage rangbeu. 23 Dede Jisu penaide keligai eh penai dade rangdi, "Mina Nabe de tei ndu kera bamdakkak be gwang dida. 24 Ih nnui dage rangsiakte liazie, ciu pumge kideu ga cakmie nah tsaigai mecai, pekatei bamla; dede cide tsaigai cai, cide petsi buisüt lubui. 25 Mi keheibe de pe teilung ku kelame cide tei nggah dizie; dede mi keheibe de kideu aika pe teilung ku kemakme kelungta kering gage kailu zie. 26 Keheibede a gwa teicai, pecu peu acai suilu; nah Ih daiga bambi, cika a gwa keteime de bam luzie. Keheibe de a gwa teicai, Peibe pecu herüt peuzie. 27 Cu au Ih a lung keherei dida nah Ih daipai ranglai? ‘A pei, bamdakkak aika de acu kelibeu lo’? Dede Ih aipau kie de ziemne Ih bamdakkak aika gwang delu. 28 A pei, n zi de peu hetwa punglu." Ge tinggim gade makwa ge gwang eh rangdi, "Cide Ih tei ndu dida nah Ih cide tei ndu dai beuzie." 29 Ge cika kesap maabe cide siu keludau tingceu zeuda de eh rangdi. Mi kedame, "Tinggimgwame ge pecu mpau da," dedi. 30 Jisu keligai nah rangdi, "Makwa aide a ziemne ma, dede nnui ziemne gwang lei. 31 Cu au kideu aide tutiak zieda: Cu au kideu aika kengkieng keteube de* kelien gidi zieda. 32 Kideu aika de acu teucuh keludau, mina pelane de ada teugwang dizie." 33 Dede pa daipai tsit tsai ziebi de kecu ranglia kera ziemne pa sam aide ranglie. 34 Ge mina maabe pecu keligai, "Anui hezaibe gade Khrista kelungta bamzie de eh siu da. Nang dainzwa eh, ‘Mina Nabe de teu ncuhlu maisia’? de eh rang zeuno? Mina Nabe aide cauno?✝" 35 Ge Jisu penui dade rangdi, "Kebaa de tingkakke swa nnuide ngngwa bamsi lakta. Kebaa nnui da kebamdau ge tet lulo, iciu eh kemuibe de peu nnui dwa rai di melu kerane. Cau kemui ga tet la bi pa daiga tet gailai eh zeubi ci lamah. 36 Nnui da kebaa kebam dauge, kebaabe de nlum lulo iciu eh nnui kebaa be name teilu kera ziemne"

Jisu ma aidungde ranggai nah cipaucai tet lamna di nah penui dade mbai di.

37 Jisu penui dwagade marehi kekiee ge teigai lie de, penui pecu nlumlu tadi 38 iciu eh Isaiah caihakecibe sam kerang de tei canglu kerane, pa kerang de:

"Rampaubo, caudung anui pwalia kegai de nlum no,

nah Rampaube pe ba pwa caudung de liano?"✝

39 Aipau kie de ziemne penui nlum gailak di, kedanemene Isaiah de rangsi gai,

40 "Pa penui miak tei cietdi, nah penui nlung tei tak dida;

meliecai penui miakle ngau nah penui nlungbe le cilu zie,

nah nreu gwang lu kera,

nah Ih penuide teingkeibeu lu kera.✝"

41 Isaiah ma aidungde rangdi kedanemene pa Jisu kendu ngau nah pe ha ranggai kecune. 42 Dede cinzwa liede, Jewme reu kedime kekiee ge Jisu de nlumlu; dede Phariseeme ziemne, penui rangmeidi iciu eh synagogue gade peu penui puikam teidi melu kerane. 43 Kedanemene Tinggwang ne ketwa swade mina twabe penui suiyi ki kedi ziemne.

44 Pecai Jisu marang sahbak eh rangdi, "Acu nlum kelame, acu rünne nlum ma dede acu langkegaibe de de nlum la, 45 nah acu ngau kelume acu langkegaibe de de ngau luda. 46 Mina keheibede acu nlum kelume depeu kemui ga bam tadi kera ziemne Ih kebaabe tei eh kideu aika gwanglie. 47 Mina keheibede a samdung siulu delwe nlumlu mecai, Ih pecu tiak lak; kedanemene Ih kideube de tiak zielie eh gwang ma, dede kideube de kelilu zielie eh gwang. 48 Acu mlai kecume nah a samdung mzaila kemakme, pecu tiak kerame ge bam. Ih rang kegai samde ne kamtu benai pecu tiak zie. 49 Kedanemene Ih akatei marang petmah, dede A pei acu langkegaibe Ih daipai rang maisia bi nah Ih daipai rangzie bi de kecu pa ne pe sam kaibeu. 50 Pe sam kai kebeu cide au kelungta kering samlie kecu Ih cibam, cine cide Ih rangla, Peibe ne a dage rang kebeude nzwa, Ih de rang lalei."