1 *Jisu Olivedung Deutu ga gwang di. 2 Pecai tingcang nuge pa kerecaki ga gwangdai, nah mina pelane gwanglu; pa ntumlu nah penui de ledeu. 3 Laisiukecime nah Phariseemedung mipui gede ngngwa gwang kemmha ta tei kebam tuilu eh. Penui pecu sum gage kailu. 4 Pecai penui pe dage rang, "Keledeubo, aipau puide mmha la eh tuilu dilie. 5 Cu hezaibe gade, mina ci kenzwame de tangtsu le samlo de Moses aja kaibeu; nang dai rangzie no pecu be?"✝ 6 Penui sam aide rang kebam penui hetak teipwa pecu mmaulu kerane tei, dede Jisu keukeimie kideu gade pe zurang le marau bamdi. 7 Penui pe dage ma keteu bam dige, pa cuhlu nah penui dage rang, "Nnui kak gade mige caube da kemau gahbi, peu pecu raitube tei eh pe dage tangtsu samgai lo."✝ 8 Pa ntum mie dailu, nah kideu gage pe zurang le marau bam daidi. 9 Penui cide siu luge, kecingtube ne mdeulwe, penui hangge cai hangge tet kapdi. Kekamle Jisu katei di, sumga kebambe pui de ngngwa eh. 10 Jisu cuhlu nah pe dage rang, "Mipoi, ncu kemmau medung daiga bamno? Migede ncu mmau meda ni?" 11 Ge mipuibe rang eh, "Migede gah da, Rampaubo." Jisu rang eh, "Ih de ncu mmau meda. Tetcu nah kemau teisi talo."]

12 Ge Jisu penui dage rangdai eh ranggai, "Ih kideu kebaabe delie; caugamme a caisuilu dibi pa kemui ga tetla lak dede kebaa keringbe ngaulu zie."✝ 13 Phariseemedung pe dage rang, "Nang nkatei n zierang tei lala; n zierang au kesang ma." 14 Jisu sam keligai nah penui dage rang, "Ih magade akatei azierang teila liede, a zierang au kesang. Kedanemene Ih daiga de gwangla bi* nah Ih daiga ge tetkai labi Ih cila, dede nnui au Ih daiga de gwang bi mede Ih daiga tetkai ziebi cima. 15 Nnui au pumteihbe gade mide tiak lala; Ih au migede de tiak lama. 16 Magade Ih tiak liecai, iciuliede, Ih tiak kelade au kesang kedanemene Ih au akatei ma, dede Ih Peibe acu lang kegaibe da la. 17 Mina hangna zierang au kesang kecu nnui zai gade cide rauteu la da. 18 Ih akatei a zierang tei kelabe, nah Peibe acu lang kegaibe a zierang teila."✝ 19 Ciziemne penui pe dage rang, "N pei daiga lano?" Jisu sam keligai, "Nnui acu de nah a Pei de de cima; magade nnui acu ci cai, nnui a Pei dede cilu zie nage." 20 Jisu kerecaki gade mide ledeu kecudau hema kehekwa kibung gade sam aidungde rang, nah migede pecu tui ma kedanemene pe bamdakkak gwang mereu kecune.

21 Cine pa rang dai penui dage, "Ih tetdi zie, nah nnui acu peei zie nah nnui mau gade tsaidi zie. Ih daiga gwangdi bi, nnui gwang gai lak." 22 Ge Jewme rangdi, "Pa pekatei pecu teitset lak, pa teizie ni? Cine pa rangzeu ni, ‘Ih daiga gwangdi bi nnui gwang gai lak’?" 23 Cine Jisu penui dage rang, "Nnui au nkangle de gwang; Ih au nreule de gwang. Nnui au aipau kideube gu; Ih au aipau kideube gu au ma. 24 Ciziemne, Ih nnui dage rangkecu nnui nnui mau gade tsai zie. Ih Delie kecu nnui nlumlu kemaktane, nnui nnui mau gade tsai zie." 25 Ciziemne penui pe dage rang, "Nang cau no?" Jisu penui dage rang, "Raitu gade Ih nnui dage rang kebam de delie. 26 Ih nnui ha ma kekieege rang kera nah tiak kera bam. Iciuliede, acu lang kegaibe pa au kesangbe; nah Ih pe dade siu keludung, Ih aidungde kideube dage rangla." 27 Pa Peibe ha penui dage rangzeu lie kecu penui cilu tadi. 28 Cidau Jisu penui dage rang, "Nnui Mina Nabe de pwacu kecudau, cidau Ih de Ih lie kecu, nah Ih akatei a ziemne magede tei kemak nnui ci luzie. Dede Peibe acu ledeu kebeu siakte, Ih aidungde rangla. 29 Acu langkegaibe a da la, nah pa acu pütdi eh peu akatei dima, kedanemene Ih pa pesui kelabe tei mui lala." 30 Jisu aidungde rang kebam dau, mina kekieege pecu nlumlu.

31 Cidau Jisu Jewme pecu nlum kelumedung dage rang eh, "Nnui a samga bam lu liecai, nnui a caisuimedung kesangda; 32 nah nnui kesangbe cilu zie, nah kesangbe ne nnui de lungmpet beuzie." 33 Penui pecu keli eh, "Anui Abraham leuhme nah madaude anui mi baang gede teima; nang dainzwa, ‘Nnuide lungmpet beuzie,’ de rang lulai?" 34 Jisu penui sam keligai, "Ih nnui dage rangsiakte liazie, mileune de cauge kemau tei labi cipaume kemau baang teila. 35 Dede kilabe au kilung ga kelungta bam lamah; pe na be kelungta bamla.✝ 36 Ciziemne, Nabe nnuide lungmpet beudi cai, nnui au mpet kesang dizie. 37 Nnui Abraham leuhme lie kecu Ih ci, dede nnui acu teitsetdi kera peei lala kedanemene a sam nnui da pebam gah. 38 Ih a Pei de ngngwa eh dai ngau labi Ih rangla; ciziemne nnui de nnui peime dade dai siu lubi tei lala." 39 Penui pe sam keligai nah pe dage rang, "Anui pei au Abraham." Jisu penui dage rang, "Magade nnui Abraham namedung cai, Abraham tei kela tadung nnui teizie. 40 Dede, cu au nnui acu teitset kera peei la dida, nnui dage Tinggwang dade siu kelu teu kesangbe ranglia kebeube de. Abraham au ainzwa tei ma. 41 Nnui nnui peime batadung teila." Ge penui pe dage, "Anui de hekakna tei eh mna luma; anui pei au ket: Cide Tinggwang."

42 Jisu penui dage rang, "Magade Tinggwang nnui pei liecai, nnui acu hung luzie, kedanemene Ih Tinggwang dade gwang nah Ih aika bam; kedanemene Ih akatei a ziemne gwang bamma, dede pa ne langgai. 43 Daitei nnui a samdung cilu meno? Aide pekie nnui a samdung siulu kemakne. 44 Nnui nnui peime dade kegwangbe, cide herakesiabe, nah nnui nnui pei suiyi tei neu lala. Pa au raitu gade mide teiketsetme nah pa kesangbe ga sapla ma kedanemene pe da kesangbe kette gah. Pa kenret kerang dau, pa pe luilung gade cide rang lala, kedanemene pa au kenretme ge nah pa kenret peibe da.✝ 45 Dede, Ih kesangbe rang kegai ziemne, nnui acu nlum lamah. 46 Nnui kakga cauge acu kemau ndam lu laino? Ih kesangbe rangcai, daitei nnui acu nlum mei no? 47 Caugamme Tinggwang dade gwangbi* Tinggwang sam siulu la; aide ziemne nnui siulu meda, kedanemene nnui Tinggwang dade gwang kemakne."

48 Ge Jewme reu kedime pesam keligai nah pe dage rang, "Anui kesangbe rang meni n da herakesiabe la nah nang Samariame lie kecu?" 49 Jisu sam keligai, "Ih a da herakesiabe gede gah, dede Ih a Pei de rütla, nah nnui acu rüt lamah. 50 Dede Ih a kendu de peei lamah; peei kela nah tiak kela mige bam. 51 Ih nnui dage rangsiakte liazie, mikeheibe de a sam kai nzeu lucai, pa ketsai madau gede ngaulak lie." 52 Jewme pe dage rang eh, "Cu anui ciluda n da herakesia lalie kecu. Abraham nah caihakecimedung tsaidi da; dede nang rang eh, ‘Mikeheibe a sam kainzeu lucai, pa ketsai madau gede nsi lak.’ 53 Nang au anui pei Abraham tsai kedibe swade diki ma, nang dini? Caihakecimedung de tsai dida. Nang nkatei ncule caulie lano?" 54 Jisu sam keligai, "Magade Ih akatei acu tei mdu lacai, a kendu au magede ma; a Pei ne acu teindu la, pa au nnui Tinggwang lie nnui rangla kecube de. 55 Nnui pecu cilu ma, dede Ih pecu cila. Magade Ih rang cai, ‘Ih pecu cima de,’ Ih de nnui nzwa da, kenretme ge. Iciuliede, Ih pecu ci nah Ih pesamdung kai nzeu lala. 56 Nnui pau Abraham a tingba de ngau kera nlwa la, nah pa cide ngaulu nah pesui yilu." 57 Ciziemne Jewme pe dage rang eh, "Nang mmi riakngei de mereu, nah nang Abraham de ngau deni?" 58 Jisu penui dage rang eh, "Ih nnui dage rangsiakte liazie, Abraham dwa de, Ih DE la dida." 59 Ge penui tangtsu keucu pecu sam kera teidi, dede Jisu mbaidi nah kerecaki gwale mpetdi.