1 Jisu sam aidungde rang cang kedi cai, Jisu pa ledeukelume de ngngwa Kidron Langkam lule tu tet petdi, cika hegurie ge kebam ga Jisu nah pa ledeukelume lütdi. 2 Cu Judas, pecu tuigai beu lai eh kebambe, liede cipau ni de cibam, kedanemene Jisu pa ledeukelume de cika pia kekiee ge ngngwa mie kecune. 3 Cidau Judas, reugwame maa ge nah cingku kedime nah Phariseeme gade kedime kangge de teuswa delwe, mitaubungdung, nah heleidung, nah hereunetdung teu eh cika miedi. 4 Cidau Jisu, pe dage teigai kebam ma pelane pa cibam eh, tet pet delwe penuide keteu, "Nnui caude peei lano?" 5 Penui pecu keligai, "Nazarethme Jisu." Jisu penui dade rangdi, "Ih delie." Dede Judas, pecu tui gai kebeu be, liede reugwame de ngngwa sap bam. 6 Cine pa penui dade, "Ih delie," de rang kecudau, penui caisim mpetdi nah hangdeu ga kaumiedi. 7 Ge pa penuide keteu dai, "Nnui caude peei lano?" Penui rang dai di, "Nazarethme Jisu delie." 8 Jisu keligai, "Ih delie kecu Ih nnuide rang beu da. Cine nnui acu peei la cai, peu a caisuime de tet dilu." 9 Aide au pa kerang sam de teicanglu kerane: "Nang acu peu kebeu aidungde, Ih penui hangge de de teinggah dima." 10 Cidau Simon Peter, kingtie ge kebambe, cide zütlu delwe cingku kedibe kilabe de bi nah pe kwen zetle dangtüt di. Kilabe zi au Malchus. 11 Ciziemne Jisu Peter dade rangdi, "Kingtie de pebung gage kaidai dilo. Peibe acu pwa kepeu piak de, Ih cide sak tadi zieni?"

12 Cine reugwamedung maa nah kedibe, nah Jewme gade kedimedung, Jisu de tuilu delwe pecu kaangdi. 13 Pecai penui Annas da pecu ngngwa mie raitu, kedanemene pa au Caiaphas pau, cipau kum de cingku kedibe tei kebambe. 14 Cu Caiaphas ne Jewmedung de minadung ziemne mina hangge tsai kecu be yiki zie lie de ledeu kebeube de da.✝

15 Dede Simon Peter Jisu caisui di, nah ledeukelu kedage liede. Cu ledeukelube cipaude cingku kedibe de cibam, nah pa Jisu de ngngwa cingku kedibe kigu ga lütlu; 16 dede Peter au kikam hegwale ga sap bam. Ciu eh ledeukelu kedabe de, cingku kedibe de ci kebambe de, hegwale pet delwe kikam kekwa pui de resiu gai delwe pa Peter de ngngwa nlütlu. 17 Pecai kila pui, kikam kekwabe de, Peter dade rangdi, "Nang de mina aipaude ne ledeukelume ge meni?" Pa rangdi, "Ih au ma." 18 Cu kilamedung nah kedimedung cika sapbam, nah nkung kecu ziemne, penui regeu mi teilu, nah penuikatei penuide tei lumbam. Dede Peter de penuide ngngwabam, cika sap delwe pecu tei lumbam.

19 Cidau cingku kedibe Jisu de pa ledeukelume ha nah pe keledeu ha keteugai. 20 Jisu pecu keligai, "Ih kideube dage mdudie eh rangbeu dida. Ih synagogue ga nah kerecaki ga Jewme pelane gwang ngkwa kebam ga ledeu bam muila. Ih ngkim eh magede rang ma*. 21 Nang daitei acu keteu no? Ih dai rang bi penui siu kelume dade keteu lu. Pielo, mina aidungde Ih dai rang bi cibam." 22 Cu Jisu aide rang kedi dau, kedime hangge cika sap eh Jisu de kepeu nah rangdi, "Nang cinzwa cingku kedibe de sam keli kerabe ni?" 23 Jisu pecu keligai, "Ih marang maudi lie cai, kemau ha de zierang teilo, dede petau lie cai, nang daitei acu kepeu no?" 24 Pecai Annas pecu kaanglu delwe cingku kedibe Caiaphas dage langgaidi.

25 Cu Simon Peter sap delwe pecu teilum bam. Ge minadung pe dade rangdi, "Nang ledeukelu nang de hangge de meni?" Pa cide mlaidi delwe rangdi, "Ih au ma." 26 Cingku kedibe kilame hangge, Peter pekwen dang mpet kedibe kibaume ge, ma ranggai, "Nang pecu hegurie ga ngngwa la eh Ih ngau meni?" 27 Ge Peter mlai daidi, nah zette nrui kwadi.

28 Pecai penui Caiaphas dade Jisu de deuceudibe ki gage ngngwa gaidi. Dede cide au tingcang nuge, nah penui deuceudibe ki ga nlüt ma iciu eh penuide tei heradi melu kerane dede Kahkegwang taktyei de tyeilu kerane. 29 Cine Pilate penui da tetpet delwe ranggai, "Nnui mina aide reuga daipai kemmau teugwang lano?" 30 Penui keligai nah pe dade rangdi, "Mina aipau de kesia keteime melie cai, anui nda ge pecu kaigai beu lak nage." 31 Ciziemne Pilate penui dade rangdi, "Nnuikatei pecu ngngwalu, nah nnui gu hezaibe rehi gade pecu tiak lulo." Jewmedung pecu rangdi, "Migede de ketsai gage kai kera cide au anui zai melie." 32 Penui aide ranggai iciu eh Jisu Pa rang kebeu sam de tei canglu kerane pa daipai tsit gade tsai ziebi keulia kerane.

33 Pecai Pilate deuceudi kidung ga nlüt dailu delwe Jisu de qugai nah pa pecu rang eh, "Nang Jewme Gwangpei deni*?" 34 Jisu keligai, "Nang aide nkatei rang zeu ni, mi kedame n dage a ha rangbeu no?" 35 Pilate keligai, "Ih au Jewme ge ma, Ih ni? Nkatei n leuhme nah cingku kedime ne ncu ada ge kaibeu. Nang daipai teidi dino?" 36 Jisu keligai, "A hegwangram au aipau kideu gu ma. A hegwangram aipau kideu gu lie cai, a kilame regi zie iciu eh acu Jewme ba gage kaidi melu kerane. Dede cu a hegwangram au aika ma." 37 Ge Pilate pe dade rangdi, "Iciu cai nang hegwangpei ge ni?" Jisu keligai, "Ih hegwangpei ge lie eh nang rangzeu. Aipau kiede ziemne acu mna lu, nah aipau kiede ziemne Ih kideube ga gwanglu, iciu eh Ih kesangbe zierang tei lu kerane. Mileune kesangbe ga kelame a kwa de kingneila."✝ 38 Pilate pe dade rangdi, "Kesangbe dai no?" Pa aide rang kedi dau, pa mpet dai Jewme da nah penui da rangdi, "Ih aipau mina da kemau ngau luma. 39 Dede Kahkegwang ngyi ga Ih nnuide mina hangge de lungmpet peu kera nnui hezai bamla. Cine nnui acu peu Jewme Gwangpei de nnui dage lungmpet neu ni?" 40 Ge penui sahbak dai eh rangdi, "Aipau mina de ma, dede Barabbas." Barabbas au sütketyeime ge.