1 Aipau cai Jewme hengyi ge bam, nah Jisu Jerusalem ga hangdi. 2 Cu Jerusalem ga meurünna kirieki taiga, tekwa ge bam, cide Hebrewme let gade Bethesda* de qu la, nah cika kigu lim kelu mengei bam. 3 Mina kekiee ge teeineime, miakcitme, keswame mede kemnoime cika zeu bamla.* 4 [Kedanemene Rampaube tinggimgwame ge peting ge tei eh nghung tekwa dui tei kenuak gai lala nah dui kenuak kebam dau keheibe de dui ga tetlüt kelube pa teei eh reei kebam mateei keheibe gade yi lula]. 5 Cu mige mmi camreieheset ge mateeila kedi kauge bam. 6 Jisu pa cika zeu kebam ngau luge, nah pa peting ketie ge cika bam kedi pa ci kelu cai, pa pe dade rangdi, "Nang yi lu neuni?" 7 Teei kebambe de pecu keligai, "Kedibo, Ih au migede a taiga gah, cide dui kenuak kegai dau, pa acu tekwa gage kaigai beulu kerane. Dede Ih lüt kezeu dau, kedame ge a dwa ga lüt dila." 8 Jisu pedade rangdi, "Cuhlu, n zeu pwalu, delwe tetlu." 9 Zette mipei cide yilu, nah pa pe zeu pwa culwe tetdi.

Cu cipau nai de au Sabbath nai. 10 Cine Jewme reu kedimedung yi kelube pei dade rangdi, "Henai au Sabbath nah n zeu pwa kera ncu hezai peu ma."✝ 11 Dede pa penuide keligai, "Acu tei hemi kebeube, pa a dade ranggai, ‘N nzeu keulwe tet lulo,’" de eh. 12 Penui pe dade keteu gai, "N dade, ‘Keu ncuhlu delwe tet lulo,’ de eh kerabe peide cau no?" 13 Iciude, yi kelube pei cide caubi cilu ma kedanemene Jisu ngkimkak eh tet kedine, kedanemene heni dega mina maadi ge kebamne. 14 Cipaucai, Jisu pecu kerecaki ga bam eh ngaulu nah pe dade rangdi, "Pielo, nang yingkei luda! Kemau teisi ta lulo, iciu eh ma aiswa siaki kecube n da gwang di melu kerane." 15 Mipei de tetdi nah Jewme reu kedimedung dage pecu teingkei kebeube Jisu lie de eh pau beu.

16 Cu ma aidungde ziemne Jewme reu kedime Jisu de teitset kera mmau cuhdi, kedanemene pa Sabbath zai gikah kedi ziemne. 17 Dede Jisu penuide keligai, "A Pei au cude matei bam, nah Ih de ma teibam lie." 18 Ma aide ziemne, Jewme reu kedime pecu teitset kera peei kidi kedanemene pa Sabbath de gihleu kegai rünne ma, dede Tinggwang dede pe Pei lie qu eh pekatei pecu Tinggwang nsam tei kedine.

19 Cine Jisu penui sam keligai nah penui dade rangdi, "Ih nnui dage rangsiakte liazie, Nabe pekatei rünne magede teigai lak, Peibe tei kebamde ngau kelube rünne gwale, kedanemene, Peibe teikela leune, Nabe de cidungde tei kelane. 20 Kedanemene, Peibe Nabe de hungla* nah pa pekatei tei kela pelane pwa pecu liala, nah pa pecu ma aidung de swa diki kecube liagai zie, iciu eh nnui swagah dilu kerane. 21 Kedanemene Peibe ketsaime de kwakcuh nah penuide kering peu kela nzwa, cinzwa eh Nabe de kering pwa pa peu keneube de pwa peula. 22 Kedanemene Peibe de migede de tiak lamah, dede tiak kera pelane pa Nabe de pwapeu dida 23 iciu eh mileune de Nabe de rütlu kerane penui Peibe de rüt kela nzwa eh. Mige Nabe de rütla kemakme pecu lang kegaibe Peibe de de rütla ma. 24 Ih nnui dage rangsiakte liazie, keheibe de a sam siulu eh acu lang kegaibe de nlumlu cai pa kelungta kering ngaulu da nah tutiak bam ga gwang dilak, dede pa ketsai gade kaa pet kering ga bam dida. 25 Ih nnui dage rangsiakte liazie, ketsaimedung Tinggwang Nabe kwa siu kera ting gwangla dida nah cude gwangbam dida, nah siu kelume ring luzie. 26 Kedanemene Peibe peda kering kebam kesiakge pa Nabe dede peda kering bam kera pwapeu dida, 27 nah pa Nabe de tutiak tei kera kengkieng pwapeu dida, kedanemene pa au Mina Nabe kecune. 28 Aide ziemne nnui swa gah diso, kedanemene heraudung ga kebamme leune de pe kwa siu kera peting ge gwang zeu delu 29 nah mpet zie. Keyi keteime kering gage ringcuh gaizie, nah kesia keteime tutiak gage ringcuh gaizie.✝

30 Ih akatei magede tei gailak. Ih siukelu nzwa, Ih tiak la, nah Ih tiak kelade masang kedanemene Ih au akatei asuibe tei lamah dede acu lang kegaibe suibe teila.

31 Ih magade akatei a ha zierang teizie cai, a zierang cide kesangbe melubui. 32 A ha zierang tei kelabe mikedage bam, nah a ha zierang pa tei kela de au kesang lie kecu Ih ci. 33 Nnui John dage langgai da, nah pa kesangbe zierang tei beu da. 34 Cu Ih zierang ngau kebam de au mina dade ma. Dede Ih ma aidung kerang au peu nnuide kelilu kera ziemne. 35 John au mitaubung ge heu nah baa kebam ge nah nnui tingkakke ziemne pe kebaa gade nnui suiyi eh bam neu di. 36 Iciude zierang ada kebam de au John da kebam swade diki, kedanemene Peibe acu teilo heta pwapeu kebeu de Ih cidungde teicang lu maisia, nah Ih tei kebam heta aide, Peibe acu langgai lie kecu a zierang teila. 37 Peibe acu lang kegaibe pa pekatei de a zierang tei da. Nnui madaude pe kwa de siu ma, mede pe rehi de ngau ma. 38 Nnui pe samdung nnui da bamsi meda, kedanemene pa lang kegaibe de nnui nlumlu kemakne. 39 Nnui kesanglaisiudung peei la kedanemene nnui cidung gade kelungta kering ngaulu lalie kecu cet la, nah kesanglaisiudung aidungde ne a zierang teila, 40 nah nnui ada gwang neu tadi iciu eh nnui kering ngaulu kera. 41 Ih mina dade hetwa ngau la ma, 42 dede Ih nnui de ci, Tinggwang kehung nnui da la kemak de. 43 Ih a Pei zi teu eh gwangla, nah nnui acu ngngwa luma. Mige pekatei pezi gade* gwang zie liecai, nnui pecu luu luzie. 44 Nnui dainzwa nlumlu lai, nnui hangge ge dade hetwa luulu kelamedung dede ket rünne kecube Tinggwang dade kegwang hetwa de peeila kemak cai? 45 Ih ne Peibe dwagade nnuide mmau zielie kecu cet selo. Nnuide mmau kecube au nnui keregui kaipwa kenzeube Moses lie. 46 Kedanemene magade nnui Moses de nlumcai, nnui acude nlumlu kerabe nage, kedanemene pa a ha Kesanglaisiu gage raugai kecune.✝ 47 Dede nnui pa raukegai dungde nlum mecai, dainzwa eh nnui a samdung nlum lulai?"