1 Langcumne cai,* Galilee deu ga Cana namceu ga meunui ge bam, nah Jisu pui cika bam. 2 Jisu nah pe caisuime de de meunui cikage qu gai pwabam. 3 Zau cang dige, Jisu pui pe dage rangdi, "Penui zau gah da."* 4 Dede Jisu pe dade rangdi, "Mipoi, cide anai ziemne daipai teilukera ge no? A ting gwangcang mereu lie." 5 Ge pepui kilamedung dage rangdi, "Pa nnui dage rang kebeu leune, teilu." 6 Cidau cika Jewme renet zai gade hui kemci ta ziemne tangtsu duibung herok dungpwa bam, cidung de ket ga gallon ngkai mecai camrei bam lula. 7 Jisu penui dade rangdi, "Duibungdung gage dui kaipui lu." Cine penui cidungde pemung kecang tei puilu. 8 Pecai pa kilamedung dage rangbeu, "Cu kesa twaklu delwe taktyeingyi mpaube de cide pwa peu lulo." Iciu eh penui cinzwa teigai. 9 Cidau taktyeingyi mpaube zau mmi kedi dui cide msi kegai dau, (cu pa au cide dai gade gwang cilu ma, dede kilamedung dui ketwakme au cibam), taktyeingyi mpaube lakciube de qugai 10 delwe pedade rangdi, "Minaleune zau keyibe kaibeu rai lala nah penui sak mie kedi caine zau kelabe kaibeu la. Dede nang au cu kecang de zau keyibe kainzeu pwa bamreu." 11 Aipau miswakegah ta raitube de Jisu Galilee Cana namceu gade teigai, nah pa pe kendu pwa liagai, nah pe caisuime pecu nlumlu.

12 Aipau cai Jisu, nah pe pui, nah pe sinamedung, nah pe caisuime Capernaum ga hungdi nah cika penui tingbazie kie kemak ge bamdi.

13 Cu Jewme gu kahkegwang ngyi ting gwang mnadi, cine Jisu Jerusalem ga hangdi. 14 Pa kerecaki ga hetum nah meurünna nah ruipuinedung zwa kebamme de ngaulu, nah rangkang rehiak kelame cika ntum bam. 15 Cine pa kedap ria ge teilu delwe kerecaki gade penui pelane de gwa mpetdi, meurünna nah hetum de si delwe. Pa rangkang rehiak kebamme rangkanggeudung tei zangra di nah penui gu rehiakbamdung kwak ngkumdi. 16 Ruipuine zwa kebamme dage, pa rangdi, "Ma aidung de aikade keu tetdi lulo. Apei ki lepwa litakni teita dilu." 17 Pa ne ledeukelume, "Ih n ki ziemne nrisüt kegai dene acu teinggah dizie," de eh raupwa kebam de nsunglu.✝ 18 Iciu ge kengkieng teu kebam Jewme reu kedimedung pe sam keligai nah rangdi, "Nang aide tei kebamde ziemne, nang daipai rehi ge anuide liagai zieno?" 19 Ge Jisu penui sam keligai eh rangdi, "Kerecaki aide tei msiadi lulo, nah langcumne gage Ih cide teu ncuh dai dizie." 20 Ge kengkieng teu kela Jewme reu kedimedung rangdi, "Kerecaki aide mmi riakdai herok gage teilu, nah nang aide langcumne gage kwak ncu dailu zie lieni?" 21 Dede, pa au pe pum recaki ha rangbam. 22 Ciziemne, pecu ketsai gade kwak cuh kedi cai, pe caisuimedung pa aide de rang kenzeu de nsunglu, nah penui kesanglaisiu de nah Jisu kerang aide nlumlu.

23 Cu pa Jerusalem ga Kahkegwang Ngyi ga kela dau, pa marehidung tei kegai ngau luge mina kekie pezi gade nlumlu. 24 Dede Jisu penuide nlumlu tadi kedanemene pa penui pelane de ci ciak kebamne. 25 Migede de peu peda mina zierang tei maisia ma, kedanemene mina lungga dai bam bi kecu pa au ci kecune.