1 Jisu kahgwang keladau, pa mipeige mnakelu gade miakciet kedige de ngau. 2 Ge pe caisuimedung pecu keteu eh rangdi, "Keledeubo, cau mau no, mipei aide mi mede pe puipei no, iciu eh pa miakciet eh mna kecu?" 3 Jisu sam keligai, "Mipei aipaude dema mede pe peipui mau kedi ziemne ma, dede ciciu eh pe dade Tinggwang batadung de mide lialu kerane. 4 Tingba kebam dauge anui acu lang kegaibe gu batadung tei maisia. Tingmui gwang di zeu da migede heta tei gailak dizie. 5 Ih kideu ga kebam dau, Ih kideu gu kebaabe delie."✝ 6 Jisu aidungde rang kedi cai, pa pemcai nsui gai kideu gage nah ncai le tangdei henet lu, nah tangdei cide pecu pwa keniak gai, pe miak gage. 7 Pecai pa pe dage rang, "Tetcu lo, Siloam rejai gade hui lulo," ("Langgai" kecu gage rang nzeu). Cine mipei be tetdi, nah huilu, nah mangau eh caili gwang.✝ 8 Ge pe kidamedung nah pedwa pecu hatyei la eh ngau kelamedung rang eh, "Mina aipau de ntum delwe hatyei bam kela de meni?" 9 Midungge rang eh, "Aide pa da." Kedame rang eh, "Melie, pa kenzwa kauge lie." Dede pa rang eh cu, "Ih au pa da." 10 Ge penui pecu keteugai, "Dainzwa nmiak ngkei lu di no?" 11 Ge pa sam keligai, "Mige Jisu lie kecu kauge ne tangdei teilu nah a miak gage keniakgai nah a dage rang, ‘Siloam ga miecu nah hui lulo.’ Cine Ih mie nah huilu, nah Ih mangau dailu." 12 Penui pe dage rang, "Pa daiga bam no?" Pa sam keli pwa, "Ih au ci meda."

13 Penui miakciet kelabe pei de ngngwa Phariseemedung da gwang. 14 Cu cide au Sabbath tingba benai Jisu tangdei teilu nah pe miak ngkeibeu kecudau. 15 Ge Phariseemedung de dai nzwa pa mangau dailu dibi pecu keteu dai. Pa penui dage rang, "Pa a miak gage tangdei kaigai, nah Ih cide huilu, nah cu Ih mangau lu." 16 Ge Phariseeme mikangge rang eh, "Mina aide Tinggwang dade gwang ma, kedanemene pa Sabbath mnei meda." Kedamedung rang eh, "Dainzwa mi kemau mege marehi cinkezwa teilu lai?" Iciu eh penui kak gade mzi pangdi. 17 Cine penui miakcietbe pei dade keteu dai eh, "Nang pecu le cau lie lano, pa mmiak ngkei beu kecune?" Miakcietbe rangdi, "Pa au caihakecime ge." 18 Cu kecangde Jewme reu kedime pe hade nlum ma pa pe miakciet lie kecu nah pa mangau daikelu, penui mangaudai kelube pe pui pe pei de quteugwang kemakta. 19 Penui puipei dade keteu, rang eh, "Aide nnai na deni, pa au pemiakciet eh mnalu dilie nnai rang kelabe de? Dainzwa pa cu mangaulu dino?" 20 Cine pe puipei sam keligai nah rangdi, "Anai cilie aide au anai na nah pa pe miakciet eh mnalu kecu. 21 Dede pa dainzwa cu mangau lu dibi, anai ci ma, nah caune pemiak ngkei beu bi, anai ci ma. Pe dade keteu lulo, pa ngkieng kedime ge dida. Pa pekatei pe ziemne ranglu buida." 22 Pe puipei aidungde rangdi, kedanemene penai Jewmedung de hing kedine. Kedanemene Jewmedung kesuizwa lwe mina keheibe de pecu Khristabe delie kerangbe de synagogue gade gwadi zielie bam kedine. 23 Aide ziemne, pe puipei rangdi, "Pa kengkiengme dida, pe dade keteu lulo." 24 Cine pekenabe de penui miakcietbe pei de qu nah pe dage rangdi, "Tinggwang de hetwa peulo. Anui cilie mina aide kemaume ge lie kecu." 25 Ge cipau pei de keligai, "Pa au kemaume mi mebi Ih au ci melie. Ma ket Ih ci lie; Ih a miakciet kecu, nah cu Ih mangau luda." 26 Ge penui pe dage rang, "Pa ncu daige tei no? Pa dainzwa mmiak ngkei beu no?" 27 Pa penui sam keligai, "Ih nnui dage ranglia beu dida, nah nnui kingneilu ma! Daitei nnui siu dai neu lareu no? Nnui pe caisuime teilu neu la ni, nnui tei eh ni?" 28 Ge penui pecu kesiu eh, "Nang au pe caisuime ge, dede anui au Moses caisuimedung. 29 Anui ci lie Tinggwang Moses de mpau kecu, dede mi aide dai gade gwang bi kecu anui au cima." 30 Mipeibe sam keligai nah penui dage rang, "Cu aide au miswa kegah ta ge, pa dai gade gwang bi kecu nnui ci kemak, dede pa a miak ngkeibeu. 31 Tinggwang kemaume kwa kingnei la kemak cide anui ci, dede magade mige pecu reca nah pe lungning tei cai, pa pecu kingnei la.✝ 32 Kideube mdeu kelu gade madaude siu ma mina keheibede pe miakciet eh mna kelume miak ngkeikelu. 33 Magade mina aide Tinggwang dade gwang mecai, pa magede tei gailak." 34 Penui keli gai nah pe dage rang eh, "Ncu au mau cangsiak cu gage mna lu, nah nang anui de ledeu lani?" Iciu eh penui pecu kelien mpetdi.

35 Penui pecu synagogue gade gwa kedi Jisu cide siu lu. Ge Jisu pecu ngaulu nah rang eh, "Nang Mina Nabe de nlum lani?" 36 Pa sam keli nah rang eh, "Nah pa cau no, Rampaubo, iciu eh Ih pecu nlumlu kerane?" 37 Jisu pe dage rang, "Nang pecu ngau da kesang, nah pa ncu ngngwa mpau kebambe deda." 38 Ge minabe rang eh, "Rampaubo, Ih nlum lie" nah pa pecu reca di. 39 Jisu rang eh, "Tutiak tei kera ziemne Ih kideu aide ga gwang iciu eh ngau mene kelame ngaulu kerane nah ngau kebamme miakcietdi kerane." 40 Phariseeme pecu ngngwa kelame kangge aidungde siulu ge pe dade keteu, "Anui au miakciet ma, anui ciet ni?" 41 Jisu penui dage rang eh, "Nnui miakciet liecai, nnui kemau bamlak nage, dede cu nnui rang eh, ‘Anui mangau bam,’ cine nnui mau bamreu."