1 "Nnui lung keherei diso.* Nnui Tinggwang de nlumlu, acu de nlum bamlu. 2 Apei ki ga kibungdung kekiee ge bam. Dede Iciu melie cai au, Ih nnui dage ranggai beu dizie nage, Kedanemene Ih au nnui ziemne heni ge mtei beulai eh bam. 3 Ih mie eh nnui ziemne heni ge mtei lude, Ih cailigwang daizie nah akatei nnuide ngngwa luzie, iciu eh nnuide Ih kebam ga bam luzie. 4 Ih daiga tetgai ziebi nnui lampuibe cibam." 5 Thomas Jisu dage rangdi, "Rampaubo, nang daiga tetgai ziebi anui ci ma, anui dainzwa eh lampuibe cilu laino?" 6 Jisu pe dage rangdi, "Ih au lampuibe, nah kesangbe, nah keringbe; a dade kemak cai migede Peibe da gwang gailak. 7 Nnui acu ci lie cai, a Pei de de cilu zie nage. Cu gade nnui pecu cilu nah pecu ngaude luda." 8 Philip Jisu dade rangdi, "Rampaubo, peibe de pwa anuide lialo; nah iciu cai anui ziemne nnung cang dizie." 9 Jisu pe dade rangdi, "Philip, Ih peting ketie ge nnuide ngngwa bamde nang acu ci mereu lieni? Mina keheibe de acu kengaume Peibe dede ngau dida. Nang dainzwa eh, ‘Anuide Peibe de pwalia lo, de rang lano’? 10 Ih au Peibe lung ga bam nah Peibe a lung ga bamkecu nang nlumla meni? Ih nnui dage sam rang keladung de akatei adade rang melie, dede Peibe a lung ga kebam ne pekatei pe ta teibam. 11 Acu nlum lulo Ih au Peibe lung ga, nah Peibe a lung ga kebam de, meliecai batadung tei kela ziemne nlum lulo. 12 Ih nnui dage rangsiakte liazie, mina keheibede de acu nlum kelume, Ih tei keladung, pa de teizie; nah pa cidung swade diki kecu tadung teizie; kedanemene Ih au Peibe da gwang di lai eh bam di delu. 13 Nnui a zi gade makeheibe de kie kegai, Ih aide tei beuzie, iciu eh Nabe dade Peibe zi tei ndu luzie. 14 Nnui a zi gade makeheibe a dade kiecai, Ih cide tei beuzie.

15 Nnui acu hung liecai, nnui a sam kai kebeudung mzai luzie, 16 nah Ih Peibe dade kie zie; iciude pa kelungta nnuide ngngwala luzie nah pa Helungtaukemlabe kedage nnuide peuzie, 17 kesang Rabe. Cide kideube pecu luulu gailak kedanemene pecu ngaula kemak ne mede pecu cikemakne. Dede nnui pecu cibam, kedanemene pa nnuide ngngwalung la nah nnui lungga bam zie. 18 Ih nnuide nggiana nzwa pütdi lak; Ih nnui da gwang daizie. 19 Dede tingkakke ge kideube acu ngau sita dizie, dede nnui acu ngau bam. Ih ring kela ziemne, nnuide ring luzie. 20 Cipau benai nnui Ih au Apei lungga kebam, nah nnui de a lungga kebam, nah Ih au nnui lungga kebam cilu zie. 21 Keheibe de a sam kai kebeudung nah cidungde mzai kelame, acu ku kelame da, nah acu hung kelame Apei ne hung zie, nah Ih cipaume de hung zie nah Ih akatei acu pwa cipaume de lia zie." 22 Judas (Iscariot kemakpe de) Jisu dade rangdi, "Rampaubo, nang daitei eh nkatei ncu pwa kideube de lia mene anui de lia beu zielie zeuno?" 23 Jisu keligai nah pe dade rangdi, "Mikeheibe de acu hungla liecai, pa a sam mzai zie. Apei cipaume de hung zie, nah anui peda gwang dizie, nah pecu ngngwa lungh dizie. 24 Mina keheibede acu hungla kemakme a samdung mzai lama. Nnui siu kelabe sam de a dade melie dede acu lang kegaibe Peibe dade gwang.

25 Ih nnuide ngngwa kebam dau, Ih ma aidungde nnui dage ranglia dida. 26 Ciuliede, Helungtaukemlabe, Kemci Rabe Peibe a zi gade langgai beuzie lie kela, pa ma pelane nnuide ledeu beuzie, nah pa ma pelane Ih nnui da rang kebeudungde nnuide peu nsung dai luzie. 27 Ih lungciep kaipwa nnuide peuzie,* Ih a lungciep nnuide peu zie. Kideube kepeu nzwa Ih nnuide peu lama. Nnui lung be de peu keherei diso, nah ngngi diso. 28 Ih nnui dade kerang nnui siulu da, ‘Ih tetdi zie, nah Ih nnui da gwang dai zie.’ Nnui acu hungla liecai, Ih au Peibe da gwang dilai kezeu ziemne nnui suiyi luzie nage; kedanemene Peibe au a swa diki kecune. 29 Cu Ih nnui da cide gwang cangdi kemakne ranggai dida iciu eh, cide gwang kegai dau, nnui nlumlu zie. 30 Ih nnuide ngngwa marang tie si lakta, kedanemene kideu aide reu kedibe gwangla delu. Pa ada magede gah, 31 dede kideube de peu Ih Peibe de hung kela ci luzie, nah Peibe acu sam kaikebeu nzwa, Ih cinzwa tei kela ci luzie. Anui cuh lugo nah aide gade tet cuhgo."