1 Kendeu gade* Sambe la, nah Sambe Tinggwang de ngngwa la, nah Sambe au Tinggwang da. 2 Pa au kendeu gade Tinggwang de ngngwa la. 3 Maleune de pe dade teilu, nah teikelube pecu si mene teikelu kette gah. 4 Keringria peda la, nah keringria au mina kebaabe. 5 Kebaabe kemui ga baa la, nah kemuibe peswa ngkienglu tadi. 6 Tinggwang ne langkegai mige bam, pezi au John. 7 Pa kebaabe ha ranglia kerane zierang tei eh gwang, ciu eh peciakne pe dade nlumlu kerane. 8 John au kebaabe ma, dede kebaabe ha zierang tei kerane pa gwang. 9 Kebaa kesangbe, mina pelane de kebaa peu kelabe, kideu ga gwangla dida. 10 Pa au kideu ga lungh, nah pe dade kideube teilu, dede kideube pecu cilu tadi. 11 Pa pekatei pe gume da gwang, nah pekatei pe gume pecu luulu tadi. 12 Dede pecu luu kelu leude, pe zi de nlum kelume, pa Tinggwang name teilu kebui mzeu peu. 13 Aidungde hejai gade lunghgwang ma, mede pumteih lungning gade ma, mede mina lungning gade ma, dede Tinggwang dade. 14 Sambe mina mmi lwe anui kakga lungh. Anui pe kendu ngauda, pumlibe kendude ngaugia nah makesang le kepui tei eh Peibe dade kegwang de.✝ 15 John pe zierang tei nah sah eh ranggai, "Aipaude Ih rang kebambe deda, ‘Pa a cai ga gwang kelabe au a swa diki, kedanemene pa au a dwa de la kedine.’" 16 Kedanemene pe kepui de gade anui pelane ngaugia cia ngaugia de ngau luda. 17 Kedanemene hezai au Moses dade kaibeu. Ngaugia nah kesangbe Jisu Khrista dade gwang. 18 Migede madaude Tinggwang de ngau ma. Kepumlibe nah Tinggwang, Peibe taiga kebambe, pane pecu ndulia gaibeu.

19 "Nang cauno?" de eh keteu kera Jerusalem gade Jewme reu kedimedung pe dage cingkumedung nah Levimedung de langkegai dau, John zierang aide da. 20 Pa kesangbe ranggai, nah pa mlai dima, dede kesangbe ranggai, "Ih au Khristabe ma." 21 Cine penui pecu keteu, "Iciu cai nang cauno? Nang Elijah ni?" Pa rang eh, "Ih au ma." Penui rang eh, "Nang caihakeci ni?" Pa keligai, "Ma." 22 Pecai penui pe dade rangdi, "Nang cau no? Ciciu de anuide lang kegaime dage anui samli peulu kerane. Nkatei ncu de caulie rangla no?" 23 Pa rangdi,

"Ih au makwa ge, hetaideu gade sah kelade da:

‘Rampaube lampui de tei mzui lulo,’

Kesanglaisiu ga Isaiah caihakecibe kerang nzwa."✝ 24 Cu langkegaime kesade au Phariseeme ne langgai, 25 nah penui pecu keteu nah pedade rangdi, "Nang Khrista ma mede Elijah de ma mede caihakecime ge de mecai, nang daitei mide duipum tei lano?" 26 John penui sam keli eh ranggai, "Ih au dui le duipum tei. Dede nnui kakga nnui ci kemak mige sap. 27 Pa au a caiga gwang kelabe deda, cipaude picum ria de Ih au hiaklu dui." 28 Ma aidungde John mide duipum ketei Jordan reukung keda lambie Bethany gade teigwang.

29 Pecai benai John Jisu peda gwang kela ngaulu eh rangdi, "Pielo, luga Tinggwang Meurünna* lada, kideube mau keugi kerabe de! 30 Aipau deda Ih, ‘A caiga mige gwangla pa au aswa diki, kedanemene pa a dwaga la kedine,’ de eh kerang de. 31 Ih pecu cima, dede Ih dui le duipum tei gwang kecu au pecu Israelme dage lialu kerane." 32 John pe zierang tei eh ranggai, "Ih Kemci Rabe tinggim gade tamhau ge nzwa hungkela ngau nah cide pereu ga bamdi. 33 Ih pecu cilu tadi, dede acu dui le mide duipum teilo langgai kebeube, pa a dage rangdi, ‘Caube reuga nang Rabe hung kela nah peda bam kedi ngau bi, pa au Kemci Rabe gade mide duipum tei kebambe deda.’ 34 Ih ngau deda nah zierang tei gaila aipaude au Tinggwang Nabe lie kecu."✝

35 Pecia benai, John pe caisuime hangna de ngngwa sap bam daige, 36 nah penui Jisu tet gwang kela ngaulu, ge John rangdi, "Pielo, Tinggwang Meurünnabe!" 37 Pane ledeukelume hangna pa aide kerang siulu nah penai Jisu caisuidi. 38 Pecai Jisu nreu gwang ge penai pe caisui kela ngaulu nah penai dage rangdi, "Nnai dai luneu lano?" Cine penai pecu keli eh, "Rabbi (cide pwakedi kelu kiecai, keledeubo), nang daiga bam no?" 39 Pa penai dage rangdi, "Gwang eh pielo." Cine penai gwang eh pa kebam bam de ngaulu. Cipaunai penai pecu ngngwa bamdi, kedanemene cidau tinghegi bam mdaikenzwa ge kedi ziemne. 40 Penai hangge John makerang siulu delwe Jisu caisui kedibe au Andrew, Simon Peter sinabe. 41 Pa keraibe pe sinabe Simon de ngaulu delwe pedage rangdi, "Anui Messiah de ngau luda" (cide pwakedi kelu kiecai Khrista)✝ 42 Pa pecu Jisu da ngngwa gwang beu, nah Jisu pecu piegai delwe rangdi, "Nang au John napei Simon. Ncu Cephas* qu zie." (Cide pwakedi kedi cai Peter)

43 Pecai benai, Jisu Galilee deuceu ga miegai neudi, nah pa Philip de ngaulu eh pe dage rangdi, "Acai suilu." 44 Cu Philip au Bethsaida namceu gade gwang, Andrew penai Peter nzwa. 45 Philip Nathaniel de ngaulu delwe pedage rangdi, "Moses nah caihakecimedung pe ha hezai gage rauteu kelabe de, anui pecu ngau luda: Jisu Joseph napei, Nazareth gade kegwangbe."✝ 46 Dede Nathaniel pedade rangdi, "Nazareth gade makeyi gede pet lubui ni?" Philip pe dade rangdi, "Gwang eh pielo." 47 Jisu Nathaniel peda gwang kela ngaulu delwe pe ha ranggai, "Pielo, Israelme kesang ge, peda au kenret gede gah!" 48 Nathaniel pedade rangdi, "Nang dainzwa acu cilu no?" Jisu keli gai nah pedade rangdi, "Philip ncu qulu kemak dwa, nang tangzüttsi bang kangga kebamdau, Ih ncu ngau da." 49 Nathaniel pecu keligai, "Keledeubo, nang au Tinggwang Nabe da! Nang au Israelme Gwangpei da!" 50 Jisu keligai eh pe dage rangdi, "Ih n dage, ‘Ih ncu tangzüttsi bang kang gade ngauda,’ de eh kerangde ziemne, nang nlumlu dini? Nang aiswade diki kecudung ngau zie."✝ 51 Pecai pa pedade rangdi, "Ih nnui dage rangsiakte liazie, nnui tinggimdung ngkei kedi, nah Tinggwang gwamedung Mina Nabe reuga nghang nghung kebam ngau zie."✝