1 Jisu ma aidungde rang cang kedi cai pe miak Tinggim ga ngang cuh piegai eh, Pa rangdi, "Apei, bamdapkak gwang bam dida, n Na de kendu peugai lo iciude Nabe de ncu kendu peulu kerane, 2 nang pecu mina pelane reu kengkieng peukedi nzwa iciu eh nang pecu peudi leune de, pa penuide kelungta kering peulu kerane. 3 Aide au kelungta kering: Kesang Tinggwang ket rünne kecu, nah nang pecu lang kegai, Jisu Khrista, penui ncu cilu de. 4 Ih ncu kideu reu gage ndulia gaida. Nang acu teilo kepeu ta de Ih teicang luda. 5 Peibo, cu, ncu ngngwa kebam gade n kendu pwa acu tei ndu gailo kideu tei kemak dwa de Ih ncu ngngwa eh kebam de.

6 Nang kideu gade acu pwa kepeume dage Ih n zi ranglia dida. Penui au n gu, nah nang penui de acu peu, nah penui n sam mzai luda. 7 Penui cu au nang acu kepeu leune n dade gwang lie kecu ci luda, 8 kedanemene nang acu pwa kepeu samdung de Ih penui de peu dida. Penui cide luu luda nah Ih n dade gwang kesang kecu ci luda, nah penui nang ne acu lang kegai de nlum luda. 9 Ih penui ziemne kiela. Ih kideube ziemne kie ma dede nang acu pwa kepeume ziemne, kedanemene penui au n gu. 10 A gu kebam pelane n gu, nah n gu de a gu, nah cidung gade acu teindu lula. 11 Ih au nda gwang lauda Ih au kideu ga bam si lakta, dede mina aidungde kideu ga bam reu. Kemci Peibo, n zi gade penui de kai kwak bam lulo nang acu kepeu de, ciu eh anai ket kecu nzwa penui ngngwa ket teilu zie. 12 Ih penuide ngngwa kebam dau, Ih penui de n zi gade kwak eh kaipwa bamlu, nang acu kepeume zi de. Ih penuide gum teula luda, nah penui hangge de gah dima, ngkapdi kerabe nabe gwale iciu eh kesanglaisiudung tei canglu kerane.✝ 13 Dede Ih cu au nda gwangdi lauda, dede Ih au kideu gade aidung de rang gailie iciu eh a suiyibe penui da bam canglu kerane. 14 Ih penuide n sambe peu dida, nah kideu be penuide ngkau dida kedanemene penui au kideu be gu kemakne, Ih de kideube gu kemak nzwa eh. 15 Ih n dade kideube gade penuide keu tet dilo eh kie ma, dede penuide kesiabe gade peu kwak lulo n dade kiela. 16 Ih au kideube gu kemak nzwa, penui de kideube gu ma 17 Kesang gade penuide tei mcilu. N sam au kesang. 18 Nang acu kideube gage lang kegai nzwa eh, cine Ih penuide kideube gage lang gai dida. 19 Kedanemene penui ziemne Ih akatei acu teimci luda, iciu eh penui katei penuide kesangbe gage teimci gailu.

20 Dede Ih penui ziemne rünne kie ma, dede penui sam ziemne acu nlumlu kerame ziemne de kiela 21 ciu eh penui pelane ket teilu kera, nang, Peibe, ada kebam, nah Ih nda kebam nzwa, ciu eh penui de peu anai lung ga bamlu, ciciu eh kideube de peu nang acu lang kegai nlumlu kerane. 22 Kendu nang acu kepeude, Ih penui dage de peu dida, ciciu eh penui ket teilu kerane, anai ket kecu nzwa: 23 Ih penui da bam, nah nang ada bam, ciciu eh penui gwang ngngwa ket teicang siaklu kerane, ciciu eh kideube nang acu langgai lie kecu, nah nang acu keku nzwa penuide de ku kela cilu zie. 24 Peibo, nang penuide acu peu da, Ih penui de peu Ih kebam ga acu ngngwa bam luneu, a kendu ngaulu kerane, nang acu kepeude kedanemene nang kideube damgai kemak dwade acu hung ladi delu.✝ 25 Makesang Peibo, kideube ncu ci ma, dede Ih ncu cibam, nah aidungde nangne acu langgai lie kecu ci bam. 26 Ih penui dage n zi peu ci gaida, nah Ih cide peu ci bi zie ciu eh nang acu ku kebam de penui da lalu zie, nah Ih de penui da bam luzie."