1 Iciu eh Kahkegwang Ngyi dwa, Jisu kideu aika de tetpwa Peibe da gwang di kera pe bamdakkak gwang kedi cilu. Pa kideu ga kebam dau pegumedung de hung eh gwang, nah pa penuide penli kecang de hung gwanglu. 2 Iciu eh tinghegi matyei kebam dau, herakesiabe Jisu de tui gaibeu kera Simon napei Judas Iscariot nlung gage kaibeu beudi. 3 Nah pa Peibe ne ma pekiene pwa pe ba gage kaibeu kedi nah pa Tinggwang dade gwang delwe Tinggwang da nligwang daidi kera cilu. 4 Matyei kebam gade pa cuhlwe pai hegwa de gaudi. Ge pa baneupai keulu delwe pekia kanglu. 5 Pa pecai dui ruipwa hekwak ge gage kailu eh ledeukelume pi hui* cuhdi, delwe pa pe kia kang teukela pai dele neu cangdi. 6 Pecai jüja pa Simon Peter da gwang ge Peter pe dage rangdi, "Rampaubo, nang a pi hui launi?" 7 Jisu pe sam keligai eh pe dage rangdi, "Ih tei kebam aide nang cu ci lakreu, dede pecaine nang aide ci luzie." 8 Peter pe dage rangdi, "Ncu peu madau gede a pi huilak." Jisu pecu keligai, "Ih ncu hui mecai, nang ada de nqwa magede gah." 9 Simon Peter pe dade rangdi, "Rampaubo, a pi rünne meliene, aba de nah a peu de silo." 10 Jisu pe dade rangdi "Duipia kedime madu mede, pepi gwale huisi mede yida, dede pa au mci cang dida; nah nang au mci dida, dede mina pelane ma." 11 Kedanemene Jisu caune pecu tui gai zie bi ci kebamne, cine pa rangdi, "Nnui pelane mci ma."

12 Iciu eh Jisu penui pi huilu ge pe pai keu balu eh ntum mie bam daidi, pa penui dade rang eh, "Nnui Ih nnui ziemne tei kegai de cilu demi?. 13 Nnui acu ‘Keledeubo’ nah ‘Rampaubo’ de eh qula, cide nnui rang siakte lada, Ih au aide delu. 14 Iciu eh Ih nnui Rampaube nah keledeube eh, nnui pi huilu lie cai, nnuide hangge ge pi hui kerabe nsam lie. 15 Kedanemene Ih nnuide puisau tei lia beu dida iciu eh Ih nnui ziemne tei kegai nzwa nnuide teilu maisia. 16 Ih nnui dage rangsiakte liazie, kilabe au pe mpaube swa dimah, mede langkegaime pecu lang kegaibe swade dimah. 17 Magade nnui ma aidungde cilu eh cidungde teila liecai nnui samlam pungtu delie.

18 "Ih nnui pelane ha rang bam ma, Ih kedet kelume de Ih ci bam, dede iciu eh kesanglaisiu de tei canglu kerane ziemne; ‘Acu ngngwa tangku ketyeibe pe pi hwapwa acu caidi.’✝ 19 Ma cide tei gwang di kemak dwa Ih nnui dage nrai aide cu ranggai la iciu eh cide kegwang dau, nnui Ih lie kecu nlumlu kerane.✝ 20 Ih nnui dage rangsiakte liazie, Ih langkegai keheibe de ngngwa kelume, acu ngngwa lula, nah acu ngngwa kelume, acu langkegaibe de de ngngwa lula."

21 Jisu aide rang kecu dau, pa rabe gade pelung keherei sütdi. Pa zierang tei nah rangdi, "Ih nnui dage rangsiakte liazie, nnui hangge ne acu tuigai beuzie." 22 Ledeukelumedung hangge ge de kerepie bam di, pa caube de rang zeubi penui swa ga bamdi. 23 Dede pa ne ledeukelume hange, Jisu pecu hung kelabe, Jisu mbie ga taktyeibam ga ngngei bam. 24 Ciziemne Simon Peter maciem tei gai ledeukelube aide dage, "Pa caube ha cide rang bam bi pecu keteu gailo." 25 Cine pa nreu dai gwang Jisu mbie ga ngngeilu delwe pe dage rangdi, "Rampaubo, cide cauno?" 26 Jisu keligai, "Ih tangku mpunglu eh pecu pwa kepeube de da." Iciu eh pa tangku cide mpunglu eh keupwa Simon Iscariot napei Judas depeu. 27 Ge pa tangku tyei kelu cai, Satan pe lung ga lütdi, ciziemne Jisu pe dage rangdi, "Nang tei kerabe cide tei zette lulo." 28 Taktyei bamga ngngei kebamme pa dai tei aide pecu rangbi cu migede cima. 29 Kedanemene kangge cet kecu, Judas au rangkangbung keteube kecune, Jisu pe dage rangdi, "Hengyi de ziemne anui teu maikesia lui kerane," mede pa kegahme de mage peu maisia kecune. 30 Pecai Judas tangku keulu siakke, pa hegwale zette mpetdi. Cidau tingmui di.

31 Ciziemne, Judas tetdi ge, Jisu rang eh, "Cu au Mina Nabe kendu keulia zeu da, nah pedade Tinggwang kendu keulia zeu da. 32 Tinggwang pe dade pecu tei ndu luzie, nah pa pecu tei ndu zette luzie. 33 Henamedung, Ih tingkakge swa nnuide ngngwa bam si lakta. Nnui acu peei zie, nah Ih Jewme dage rang kebeu nzwa, ‘Nnui Ih kegwang ga gwang gailak.’ Ih cu nnui dage aide rangla. 34 Ih nnui hangge ge de hung lulo eh samkak keheci ge peula; Ih nnuide hungkela nzwa, cine nnuide hangge ge hunglu maisia. 35 Nnui hangge ge de hung lucai, aide gade mina pelane nnui a caisuime lie kecu cilu zie."

36 Simon Peter pe dade rangdi, "Rampaubo, nang daiga miedi lai zeuno?" Jisu pecu keligai, "Ih kemie ga, cu nang a caisui mie gailak, dede cipau cai nang a caisui luzie." 37 Peter pe dade rangdi, "Rampaubo, daitei Ih cu n caisui gailak no? Ih n ziemne a teilung de kaibeu zie." 38 Jisu keligai, "Nang a ziemne n teilung kaibeu zie lieni? Ih n dage rangsiakte liazie, nang acu piacum mlai kemak dwa nrui kwalak zing."