1 Gileadme pei Jephthah au reugwa kengkiengme ge, dede pa au kemmha pui ge napei. Gilead nau ne Jephthah de mnalu. 2 Gilead nau ne pe napeidung de de mna lu. Gilead nau napeidung ngkiengcuh luge, penui Jephthah de gwa mpet di eh pedage rangdi, "Nang au anui pei ki gade hema gumlak nang au mipui kedage na kecune." 3 Cine Jephthah pe sinamedung dade pakdi nah pa Tob deuga lunghdi. Malam cikemakmedung Jephthah de twagwa eh ngngwa lungh bamla nah penui pecu nzang eh lunggwang.

4 Matie mene Ammon namedung Israel de ngngwa keregi. 5 Ammon namedung Israel de ngngwa keregi kecudau, Gilead ga hangkiamedung Tob deu gade Jephthah de qu kera miedi. 6 Pecai penui Jephthah dage rangdi, "Gwanglu iciude nang anui ziemne muiteube tei luzie iciu eh anui Ammon namedung de renia lu kerane." 7 Dede Jephthah au Gilead hangkiamedung dage sam keligai, "Nnui nnuikatei de acu ngkau eh meni nnui a pei ki gade acu gwa mpet di meni? Nnui daitei cu ada gwangla no nnui keherei kebam dau?" 8 Pecai Gilead ga hangkiamedung Jephthah dage rangdi, "Cide ziemne, anui cu nda caili nreu gwang lada; cine anuide nzang gwang nah Ammon namedung de ngngwa renia lo, iciu de nang Gilead ga lungh kebam anui pelane ziemne muibe tei luzie." 9 Jephthah au Gilead hangkiamedung dage rangdi, "Magade nnui acu ngngwa cailigwang Ammon namedung de renia ziecai, nah RAMPAUBE penuide pwa a ba gage kai beu cai, Ih nnui muiteu tei kesang luzie ni?" 10 Pecai Gilead hangkiamedung Jephthah dage rangdi. "RAMPAUBE ne anui kakge zierangbe zie, n samde nzwa anui cinzwa teizie!" 11 Cine Jephthah au Gilead hangkiamedung de nzang mie di, nah minadung pecu teu penui reu kedibe nah muiteube teilu. Jephthah pe samdung pelane Mizpah gade RAMPAUBE dwade ranggai.

12 Pecai Jephthah samgwamedung de langpwa Ammon namedung gwangpei dage, ranggai, "Daipai tei dino anai kakga ngngwa kesia, nang adeu tangsa eh acu renia lura gwang kela ai?" 13 Ammonme gwangpei Jephthah samgwamedung dage sam keligai, "Kedanemene Israel au Egypt tetkah nghang keladau a deu tui teukedi, Arnon Reuki gade nghang Jabbok Reuki, nah Jordan Reuki kecangde. Cu kezuyi eh cidungde keu heli beulo." 14 Pecai Jephthah au Ammon namedung gwangpei dage samgwamedung langgai dai, 15 nah pa pe dage rangdi, "Jephthah rangla: Israel au Moab deu mede Ammon namedung deu luma. 16 Ciciuliede penui Egypt deu gade nghang keladau, Israel hetaideu kahgwang Reed Jaaidi kecang delwe Kadesh ga gwanglu. 17 Israel samgwamedung de langpwa Edom gwangpei dage kekai dau, ranggai, ‘Kehereide peu anuide n deu kahgwang lo’ dege Edom gwangpei kiengnei tadi. Pa cinzwa Moab gwangpei dage de langgai, dede pa de peu tetkah ma. Cine Israel Kadesh ga bamdi. 18 Pecai pa hetaideu kahgwang nah Edom deu nah Moab deu gade nreu tetdi, nah pa tingnaimiak kepet deule miedi Moab deu de ziemne. Penui Arnon tu kedale ramzeuki teilu, dede penui Moab deu lungki lwetma, Arnon au Moab raiga kebamne. 19 Israel samgwamedung de langpwa Heshbon ga Amoritme gwangpei Sihon dage kai. Israel pedage rangdi, ‘Kehereide, peu anuide n deu gade kahpwa a bam ga gwanglo.’ 20 Dede Sihon au Israel pe deu ga tetkah gwang kera de penuide nlum ma. Cine Sihon pe minadung pelane de teuhekwalwe Jahaz ga penui ramzeuki teilu, delwe pa Israel de ngngwa regi. 21 Pecai RAMPAUBE, Israel Tinggwang, Sihon nah pe minadung pelane de Israel ba gage kai beudi nah penui cidungde de ngamlu. Iciu eh Israel ne Amoritme deu pelane cipau cuikui ga lungh kebam pelane luulu. 22 Penui Amoritme deugumrai ga kebam pelane gumlu, Arnon gade Jabbok kecang, nah hetaideu gade Jordan kecang. 23 Ciziemne RAMPAUBE, Israel Tinggwang pe mina Israel kebam gade Amoritme de gwa mpet di delu nang cide gum kesang tei luzie ni? 24 Nang n rabe, Chemosh*, ncu cide gumlu kera tei beucai cide gum lulak ni? Cine anui Tinggwang RAMPAUBE anui dwa gage gwa mpet gai kebeube, anui cide gum luzie. 25 Cu nang Balak, Zippor napei Moab gwangpei swade yiki ni? Pa Israel de ngngwa mnung lu ni, mede pa madaude penuide ngngwa hereu tei ni? 26 Israel mmi hai cum Heshbon nah pe renamdung, nah Aroer nah pe renamdung, nah Arnon reukung namdidung pelane ga kelung dau, daitei nang cipau tingdau gumlu dailu meno? 27 N dage Ih kemau teigai ma, dede nang au acu ngngwa acu hereu tei eh kemau teila. RAMPAUBE, tutiakbe, henai Israel namedung nah Ammon namedung kakga tiak zie." 28 Dede Ammon namedung gwangpei Jephthah pedage samdung pa lang kegaide kiengnei ma.

29 Pecai RAMPAUBE Rabe Jephthah reuga gwanglu, nah pa Gilead penai Manasseh kahgwang, nah pa Gilead ga Mizpah kahgwang, nah Gilead ga Mizpah gade pa Ammon namedung da tetkah gwang. 30 Jephthah RAMPAUBE dage sampet lu nah rangdi "Magade nang Ammon namedung de a ba gage kai kesang beucai, 31 ciucai Ih Ammonme dade a lung nciep eh cailigwang keladau, a ki kikamdung gade acu redau zielie kepet keheibede, RAMPAUBE gu zie, nah Ih pecu keru ratak pelane tei beuzie." 32 Cine Jephthah Ammon namedung de penuide regi kera miedi, nah RAMPAUBE penuide pwa pe ba gage kaibeu. 33 Ge pa penuide Aroer gade Minnith de twagwa kebam namdidung ngkai ge, nah Abel Keramin kecang gwaketang, nah daptset süt di. Cine Ammon namedung de Israel namedung ne ngamdi.✝

34 Jephthah Mizpah deukui, pe ki ga gwanglu, nah ainie, pe napui pecu redau kera tambourine kwa nah helim lim eh gwanglu. Ciciuliede pa au pumli nage; pa cide gwale pa pe na mipei mede mipui bam ma. 35 Pa pecu ngau luge pa pe painidung hietdi delwe pa rangdi, "Aiya, a napoi! Kesang, nang acu peu a sui sia eh keutaksu dida, nah nang au acu peu a lung tei teei kelame ma ga hangge dida! Kedanemene Ih au RAMPAUBE dage a sampet dida, nah Ih cailidi dau lakta." 36 Pecai pa pedage rangdi, "A pei, nang RAMPAUBE dage n sam pet dida. Nang n sampet kelude nzwa a dage teigai lulo, RAMPAUBE n ziemne tei kebeu de nzwa: n ziemne hekum pei beuda, n ngauraumedung, Ammonme de ngam kelu gade." 37 Pa pe pei dade rangdi, "A ziemne aide tei beulo. Acu kei na ge lungmpet gailo. Iciude Ih lamlwatudung rwalu kerane Ih nah a zangmedung Ih relei kemci teila di kerade ziemne haplu kerane." 38 Pa keligai, "Miecu." Pecai pa pecu kei na ziemne langgi di. Pa nah pe zangmedung lamlwatudung ga miedi nah hapdi kedanemene pa madaude mmeu lakde kecu ziemne. 39 Kei na cang kedicai pa pe pei da caili gwanglu, nah pa pe ziemne sampet kelude, pa pe sampet de tei canglu. Pa relei mci ge, nah cide Israel ga renamzai di. 40 Mmi ramsang Israel releime Gilead mepei Jephthah napui de nsungkegai ta tei kerane lang mdaine miela.