1 Ehud tsai kedicai, Israel namedung RAMPAUBE dwade mau lie kecube tei daidi. 2 Cine RAMPAUBE penui de Canaan gwangpei, Jabin ba gage kaidi, Hazor ga hegwang teigwang kecude. Pegu reugwamaa muibe au Sisera, nah pa Harosheth Haggoyim ga lungh bamla. 3 Pecai Israel namedung RAMPAUBE dage hapgai, kedanemene pa hegeu le tei kelu bagidung haihekui bam nah pa Israel namedung de zaisiet ngkingsüt kecu teu eh mmi ngkai ge teikeherei la kecune.

4 Deborah au caihakeci puige, Lappidoth nau. Cidau pa Israel tutiakla. 5 Pa kideutu deudi Ephraim ga Ramah penai Bethel kakga, Deborah palm bang kangga ntum la nah Israel name tutiak ziemne peda gwang. 6 Pa Barak de qu kera mide langgai, Abinoam napei, Kedesh Naphtali renam gade. Pa pe dage rangdi, "RAMPAUBE, Israel Tinggwang, ajahkai meni: ‘Tabor Deutu ga mie cu, nah nang Naphtali namedung nah Zebulun namedung kakgade mina cangkerei de ngngwa luzie’? 7 ‘Ih Sisera de keu mpet luzie, Jabin reugwamaa muibe de, Kishon Reuki kunga de, nah pe kün gari nah pe madibe de, nah Ih pecu pwa n ba gage kai beu zie’." 8 Barak pe sam keligai, "Nang acu nzangmie cai, Ih miezie, dede nang acu nzangmie mecai, Ih mie lak." 9 Pa mdugai, "Ih ncu nzangmie kesang zie, nang kemie lampui de au ncu kerüt gade lak, dede mipuige ba teu eh RAMPAUBE au Sisera de kaibeu zie kecune." Pecai Deborah cuhlu delwe Barak de nzang Kedesh ga mie di. 10 Pecai Barak Zebulun nah Naphtali de Kedesh renam gage qugai. Nah mina cang kerei pecai suilu eh hangdi, nah Deborah pecu ngngwa hangdi.

11 Kenitme pei Heber, Cain dade mpet tsam lu, Hobab namedung dade, Moses nau pei. Pa Kedesh taiga kebam Zaanannim ga mhu bang kemdei ga mie pe paiki lim lu.

12 Penui Sisera dage Barak, Abinoam napei, Tabor Deutu ga hangdi delie pau kebeu dau, 13 Sisera pegu bagidung pelane de qulu, hegeukwen bagi hai hekui, nah mina pecu ngngwa kela pelane, Harosheth Haggoyim namdi gade Kishon reuki kecang gade. 14 Pecai Deborah Barak de rangbeu, "Cuhlu! Henai RAMPAUBE au Sisera de kaipwa n ba ga ge kepeu dau, RAMPAUBE n dwa ga tet mie meni?" Cine Barak mina cangkerei pecu si eh Tabor Deutu gade nghung di. 15 RAMPAUBE kebwak gai Sisera nah hekwen garidung pelane nah reugwame pelane de kingtie lwe Barak dwade. Cine Sisera hekwen gari gade nghunglwe pepi le pak tetdi.✝ 16 Dede Barak hekwen garidung nah reugwame de Harosheth Haggoyim kecang zuimie, nah Sisera reugwame pelane kingtie dwade kaudi, migede bang luma.✝

17 Ciuliede Sisera Jael paiki ga pe pile pak gwangdi, pa Keniteme pei Heber nau, kedanemene Hazor gwangpei Jabin nah Kenitme pei Heber kelak ga lungciep bam kecune. 18 Jael Sisera de redau kera tetpet nah pedade rangdi, "Aika gwanglu, a kedibo, ada gwanglu lo. Ngngi so." Cine pa peda nreugwang pe paiki ga lüt lu, nah pa paige teu pecu gum kebai di. 19 Pa pedade kiedi, "Kehereide sak kera dui nage acu peugai lo, Ih hereudi delu." Cine pa tungdui teigeu lade ngkeilwe sak kera pecu peu, delwe pecu gumdi. 20 Pecai pa pedage rangdi, "Paiki kimui ga saplu. Keheibe de gwang eh ncu keteu eh ‘Aika mige de bam mi?’ De rangcai, ‘Nang melie rangzie.’" 21 Pecai Heber nau, Jael paiki gwak de keulu nah pa hegeuteisang pe baga pwalu. Pa matu mene peda gwanglu, delwe pa pegwak de pe takla gade giamie hangdeu gage kaidi. Kedanemene pa au zipzing kedine nah leukedine, iciu eh pa tsaidi. 22 Pecai, Barak Sisera de zuila nah Jael pecu redau kera tetpet eh pe dage rangdi, "Gwanglu, acu peu nang peikelabe de pwa ncu liagai lo." Cine pa peda gwanglu, ge Sisera tsai kau kezeu ngaulu, nah magwak de petakla ga bam.

23 Cine cipaunai Israel namedung dwade, Tinggwang ne Canaan gwangpei, Jabin de ngkapdi.✝ 24 Iciu eh Israel namedung Canaan gwangpei, Jabin de renia mtei sütdi, Canaan gwangpei Jabin de ngkapkedi ga kecangde nghangcang di.