1 Joshua tsai kedicai, Israelmedung RAMPAUBE dage ranggai, "Caube ne Canaanme de regi kera anuide teuswa rai zieno?" 2 RAMPAUBE keligai, "Judah leuhme nghang zie. Ainie, Ih pe ba gage Canaanme deu peubeu dida." 3 Pecai Judahme penui siname Israelme, Simeon leuhme dade rangdi, "Anuide RAMPAUBE ne kepeube deu dega anuide ngngwa nghang lo, iciu eh anui Canaanme de ngngwa regi go. Anui de cinzwa regi zie, RAMPAUBE ne nnuide kepeube deu dega." Cine Simeon leuhme penuide ngngwa miedi. 4 Judah leuhme nghangdi, nah RAMPAUBE Canaanme nah Perizzme de pwa penai ba gage kai gaibeu, nah penai Bezek de qukela bam gade mina cang kerei de gidi. 5 Penai Bezek ga Adoni-Bezek de ngaulu nah penai pecu ngngwa regi. Penai Canaanme nah Perizzme de ngamlu. 6 Ge hegwangpei Adoni-Bezek pakdi, dede penai pecai zuimie. Penai pecu tuilu, nah penai pe ba zurangpui nah pe pi zurangpui kenana dangdi. 7 Adoni-Bezek rangdi, "Hegwang riakhena penui ba zurangpui nah penui pi zurangpui dang kedime a taktyeibam kang ga ketyei kwariedung tangra kemiebe kebau bamla. Ih tei kedi nzwa Tinggwang acu peu daida." Pecai Judahme pecu Jerusalem ga ngngwa gwanglu, nah cikade pa tsaidi.

8 Judahme Jerusalem namdi dede ngngwa regi eh penui cide de ngamlu. Penui cika minadung de teitsetdi eh namdi de rudi. 9 Pecai, Judahme, Canaanme kideutu deudi ga lungh kebammedung, nah tingbangle hetaideu lebie, nah naimiak kenlütle hangdeu kehenah ga lungh kebamme de ngngwa regi kera miedi. 10 Pecai Judahme Canaanme Hebron ga lungh kebam ga nghung (ndaa Hebron de Kiriath Arba lie qula), nah penui Sheshai, nah Ahiman, nah Talmai leuhmedung de ngamlu.

11 Judahme cikade Debir ga lungh kelame da miedi (ndaa Debir de Kiriath Sepher lie qula). 12 Pecai Caleb rangdi, "Keheibede Kiriath Sepher de gwa nah cide tui kelube de pe nau kerane, Ih a napui Aksah de pecu peu zie."* 13 Kenaz napei, Othniel, Caleb caihereibe, cide tuilu, cine pa pecu pe napui Aksah de penau kera peudi. 14 Aksah gwang kelucai pa Othniel lung teigai eh pecu peu pe pei dade luhpak ge kie lulo rangdi. Pa gada reu gade nghung, ge Caleb pe dage rangdi, "Ih n ziemne dai teilu buino?" 15 Pecai Aksah pe pei dage kiedi, "Acu samlam ge peulo. Nang acu Negev deu de peu liede, nang acu duilet dung dede peulo." Cine Caleb pecu duilet nreubedung nah duilet ngkangbedung peudi.

16 Moses nau pei leuhme, Kenit namedung, Jewmedung de ngngwalwe lira namdi* de gidi eh, Arad deudi tingbangle kebam Judah hetaideu ga miedi. Cine pa mie Amelikme de ngngwa lungh ladi. 17 Pecai Judah leuhme penui siname Israel Simeon leuhme de nzang miedi nah penai Zephath ga lungh kebam Canaanme de ngamlu. Cine penai helungkai eh cide ngkapdi nah penai namdi cide de Hormah* de qudi. 18 Judahme Gaza, Ashkelon, nah Ekron nah twagwapung kebam deudung de tuilu. 19 RAMPAUBE au Judah de ngngwala nah pa kideutu deudi de gumlu, dede pa langkam ga kelungmedung hegeu bagidung kebamde ziemne gwa luma. 20 Penui Moses ne rang kebeu nzwa Caleb de Hebron peudi, nah pa cikade Anak pautsa hangcum de gwampet di. 21 Dede Jerusalem ga lungh kebam Jebusitme, Benjamin leuhmedung de gwagi luma. Cine Jebusme henai kecang de* Benjamin leuhmedung de Jerusalem ga ngngwa lungh ladi.

22 Cinzwa Joseph leuhme mie Bethel de renia, RAMPAUBE penuide ngngwa la. 23 Joseph leuhme Bethel rehi pie kerana reketme de langmpetgai; ndaa namdi cide Luz lie qula. 24 Mie kepieme namdi cikade mige tetmpet kecu ngau, nah penui pe dage rangdi, "Anuide kehereide namdibe ga kelüt kimuiki de saulia lo, iciude anui ncu ngaunggia beuzie." 25 Cine pa penuide namdi kelüt kirie de saulia gai, nah penui namdi de kiengtie teu ngam di, dede penui minabe de nah pe kelak pelane de püt beu. 26 Pecai minadung Hittime deu ga miedi nah pa namdi ge teilu. Pa cide Luz qulu, cide henai kecangde cinzwa qula.

27 Dede Manasseh leuhmDede Manasseh leuhme Beth Shan leuhme de gum ma, mede Taanach, mede Dor ga lungh kebamme, mede Ibleam ga lungh kebamme, mede Megiddo ga nah pe taiga lungh kebamme, kedanemene Canaanme kideu cika lungh kera cetla kedine. 28 Israel ngkieng reureu luge, pa Canaanme dade ceha lu cuhdi, dede pa penuide gwampet dima.

29 Mede Ephraim leuhme liede Gezer ga lungh kebam Canaanme de gwagi dima, cine Canaanme pe leuhme kakga Gezer ga lunghdi.

30 Zebulunme liede Kitron ga lungh kebamme de gwagi dima, mede Nahalol ga kelunghme de de, cine Canaanme penui kakga lunghdi. Dede penui kemei tei eh peu penui gwatei.

31 Asher leuhme au Akko namdi ga lungh kebamme de, mede Sidon namdi ga, mede Ahlab, mede Achzib, mede Helbah, mede Aphek, mede Rehob namdidung ga lungh kebamme de gwagi dima. 32 Cine Asher leuhme kideu cika Canaanme kakga lungh ladi, kedanemene Asher leuhme penuide gwagi di kemakne.

33 Naphtali de Beth Shemesh ga lungh kelame de gwagi dima, mede Beth Anath ga lungh kelame de. Cine pa kideu cika Canaanme kakga lungh di. Iciude, Beth Shemesh nah Beth Anath ga lungh kelame au penui kemei tei eh peu penui gwatei.

34 Amorme ne Dan leuhme de nia pwa kideutu deudi gage kaidi, kedanemene pa pecu peu langkam ga nghung kera kaam kedine. 35 Amorme Aijalon ga, Heres Deutu ga lunghdi kera cetlu, nah Shaalbim ga, dede Joseph leuhme ngkieng pet luge, Amorme depeu penui kangga lungh eh penui gwatei di. 36 Amorme deurai au Akrabbim gicak gade, nghang hetialwa nreule kecang.