1 Israel namedung RAMPAUBE dwade mau lie kecube teidi, cine RAMPAUBE penuide mmi hena Midianme ba gage kaidi. 2 Iciu eh Midianme miekang ga Israelme lunghdi. Midianme lungh kebamne, Israel namedung au lamlwatudung ga penui ki tei eh tsupopdung ga lungh nah nsiulu kebui kedadung ga ladi. 3 Israelme heleuh ling luge, Midianme nah Amalekme gwangla, nah naimiak kepetle namedung de gwang pecu renia dila. 4 Medianme ramzeuki teilwe penuide twagwa lula nah kemdei Gaza namdi kecangde penui luh ngkap dila. Cine Israel ga lungh bamlu kebui bam sitadi, meurün, mede ketum, mede gada liede. 5 Medianme nah penui kauruinedung ngngwa gwang luge, penuigu paikidung si eh, penui maadi tangriem nzwa gwa nghang lula. Penui nah penui gu utdung pei kapgai kelak bam, cine penui hangdeube ga gwang cide teingkap kera teila. 6 Midianme kebam ziemne Israelme magah sütdi, cine Israel namedung RAMPAUBE dage hapgai.

7 Israel namedung Midianme ziemne RAMPAUBE dage hap kegai dau, 8 RAMPAUBE mige de langgai, Israel namedung dage caihakecibe gede langgai beu. Pa penui dade rangdi, "RAMPAUBE, Israel Tinggwang rangla: ‘Ih ne nnuide Egypt gade ngngwa mpet lu, nah Ih nnuide hebaangki gade ngngwa mpet lu. 9 Ih nnuide Egyptme ba gade kelilu, nah nnui de tei keherei kela pelane ba gade. Ih penuide nnui kebam gade gwadi, nah Ih penui deu pwa nnuide peudi. 10 Ih nnui dage rangla, "Ih RAMPAUBE, nnui Tinggwang; nnui Amoritme rabedung de reca lak, nnui penui deu ga lung kebam dau." Dede nnui a kwa kingnei ma.’"

11 Cu RAMPAUBE gwabe Ophrah nam ga kebam mhubang kang ga ntumlu, cide Abiezer tsame Joash gu. Cidau Gideon, pe napei, au Midianme kebam gade mbailu kerane zaukeniak bam ga ciu neumpet bam. 12 Pecai RAMPAUBE gwabe pecu ngaugai eh pe dage ndugai, "RAMPAUBE ncu ngngwala, O kekuu reugwabo!" 13 Gideon pe dage rangdi, "Acu ngngwa lani, a kedibo? RAMPAUBE anuide ngngwalacai daitei ma aidungde pelane anuida gwang zeuno? RAMPAUBE tei kegai miswakega batadung leune daiga lano, anui paume anui dage rang keliadungde, ‘RAMPAUBE anuide Egypt gade ngngwa mpetlu meni?’ De eh rang keladung. Dede RAMPAUBE anuide püt dida delwe anuide pwa Midianme ba gage peu gai dida." 14 Ge RAMPAUBE peda nreugwanglu delwe rangdi, "N kengkieng aide teu eh miecu nah nang Israel de Midianme ba gade keli luzie. Ih ncu langgai meni?" 15 Pecai pa pe sam keligai, "Kehereide, a mpaubo! Ih dai ciem tei eh Israel de keli beulai? Pielo, a pautsa au Manasseh gade mneitube, nah apei ki gade Ih au mneitube." 16 Pecai RAMPAUBE pedage rangdi, "Kedanemene Ih ncu ngngwa lazie, nah Midianme de mina hangge de nzwa ngkap bi dizie." 17 Pa pe dage sam keligai, "Ih n dwade n suiyi ngaulu kesang cai, iciucai a dwade nang ne a dage rang kegai rehi gade marehi ge tei gailo. 18 Kehereide heni aika de tetdi so, Ih nda gwanglu kemaktane iciude Ih a reca ncu teugwang beuzie nah Ih cide n dwaga kai beuzie." Cine pa rangdi, "Akatei, Ih bam luzie nang cailigwang kemaktane."

19 Pecai Gideon tetdi nah hemeuna ge teleilu delwe tokkui ephah ge* cehi kaikemak tangku rulu. Pa raptui ge gage hetei kailu nah lige gage hetei gidui kailwe mhu bang kangga cide pwa gwanglu, delwe pa cidungde peugai. 20 Pecai Tinggwang gwabe peda ge rangdi, "Heteih de nah cehi kaikemak tangku de pwalu delwe cide tangtsu aide reu ge kailu, delwe gidui de ruigai," dege pa cide teigai. 21 Pecai RAMPAUBE gwabe pe ba ga kebam tuitie ketwapet gai. Pa heteih nah tsehikaikemak tangku de tunggai; tangtsu gade mi heucudi delwe heteih nah cehi kaikemak tangku de rudi. Pecai RAMPAUBE gwabe pa kengau gade tetdi. 22 Gideon au cipaude RAMPAUBE gwabe kecu ngau luge, Gideon hapdi, "Hei, a mpaube RAMPAUBO, aide ziemne Ih RAMPAUBE gwabe de kezumok eh ngauda!" 23 Dede RAMPAUBE pedage sam keligai, "Helungkenciep nda lalu! Ngngi diso, nang tsaidi lak." 24 Gideon cikade RAMPAUBE dage recabam ge teigai nah pa cide de RAMPAUBE au lungciep lie msiak gai. Henai kecang de Abiezer pautsa deu ga Ophrah ga cide sap bam.

25 Cipau ziu de RAMPAUBE pedage ranggai, "N pei gu hetumseuna de teulu, nah hetumseu kenabe de mmi hena kedide, n pei gu Baal recabam de tei kecai di, delwe cide taiga kebam Asherah de bikaudi. 26 Nang RAMPAUBE n Tinggwang dage aipau nsiulu kela heni peutwang gage teleibeu kela nzwa reca bam ge tei beu zie. Pecai nang hetumseu pe kenabe de keulu nah pelane pwa keru ratak teibeu zie, nang bikaudi kera Asherah tsingpakdung reu gage." 27 Cine Gideon pe kilamedung kakgade mina hangkerei ngngwalwe RAMPAUBE rangkebeude nzwa tei di. Pa cide tingna tei kera pe pei kelak nah namdi cika kebamme de kehingne, pa cide tingmui teidi.

28 Namdi cika minadung tingcang nuge cuh luge, nah Baal recabamde tei kecai kedi, petaiga Asherah de bikau kedi, nah hetumseu pe kenabede recabam tei kelude gage recabeu kedi ngaulu. 29 Cine, hange ge kecu pe kidabe dage rangdi, "Caune aide tei no?" Penui keteu nah peei kechung ge, penui rangdi, "Gideon, Joash napei ne ma aide tei lie." 30 Pecai namdi ga minadung Joash dage rangdi, "N napei de teu mpetlu pecu teitsetlu kerane, kedanemene pa Baal recabam tei kecai dida, nah cipau tai Asherah de bikau dide lu." 31 Joash pecu sap eh mmau kebam pelane dage rangdi, "Nnui Baal keleu gade renia lubui ni? Nnui pecu ngha kesang zie ni? Pe ziemne renia kelame keheibede cu tingcang ting gage teitset di zie. Pa au rabe ge liecai, peu pecu mnung lulo mige pe recabam teikau kedi dau." 32 Cine cipaunai pa pecu "Jerub Baal," lie qu di, rang eh, "Peu Baal de pecu mmaulu," kedanemene pa pegu recabam de teikaudi didelu.

33 Aipau cai Midianme, Amalekme, nah kepetle namedung pelane ngkwalu delwe kahpet Jezreel langkam gage ramzeuki teilu. 34 Dede RAMPAUBE Rabe Gideon de gumlu. Cine pa teluibe kwagai, iciu eh pa Abiezer de qulu. 35 Pecai pa Manasseh pelane gage samgwame langgai, nah pa pecu de peu suilu. Pa Asher, Zebulun, nah Naphtali gade samgwame langgai, nah penuide redau kerane penui hangdi.

36 Pecai Gideon Tinggwang kesangbe dage rangdi, "Nang a ba le teu Israel de kelibeu zielie bam cai, nang rang kegai nzwa, 37 pielo, Ih mamai pai aide hecaipung gage kai gaila. Magade mamai pai cide reuga rünne hezin hwacai, dede hangdeu pelane canghcai, iciucai nang a bale pwa Israel de kelibeu kera Ih cilu zie, nang rang kegai nzwa eh." 38 Pecai benai pa nuge cuhlu, nah pa mamai pai de tuigai. Pa mamai pai gade hezin tuimpet lu, cide duikwakde puilu. 39 Pecai Gideon Tinggwang kesangbe dage rangdi, "N rata de peu acu mmau eh rudi so, dede Ih henai pia rünne ranglu bui mi. Henai pia rünne Ih mamai pai teu kedei lubui mi? Ih kiela, peu mamai pai reuga rünne canglu, dede hangdeu pelane peu hezin keilu." 40 Cine Tinggwang cipau ziu de aide teigai. Mamai pai reuga rünne cangh bam, dede hangdeu pelane ga hezin bamdi.