1 Ephraim hangdeutu deudi ga mipei ge bamla, nah pezi cai Micah. 2 Pa pe pui dage rangdi, "Rangkanggeu cang ge hai ge ndade mige rega teu kedide, nang cide gage reset sampet kebeude, nah cipau reude nang a kwen gage rang kegaide, ainie! Rangkanggeu de a da la. Ih ne akatei cide keu ludi." Pe pui rangdi, "Ana de RAMPAUBE ne samlam beuda!" 3 Pecai pa rangkanggeu cang ge haige de pe pui de keu caili beudi ge pe pui rangdi, "Ih rangkanggeu de RAMPAUBE dage teimci cangsiak gaibeu dida, a ba gade a na ba gage mamie ge teilu nah kemai kelu mie ge teilu kerane. Cine cu, Ih ncu keu caili beu dizie." 4 Iciuliede pa pe pui dage rangkanggeu de peu caili beudi, pe pui rangkanggeu hai na keulu delwe pa cide pwa hegeu ta tei kecime de peudi. Pa cide pwa mamie teilu, nah kemai kelu mie ge, nah cine cide Micah kiga bamdi. 5 Cu Micah cipaude pa rabedung ki ge bamla. Pa hekeutupai ge nah kelak mamiedung teilu, nah pa pe napei hangge de cingku kedetlu. 6 Cipau tingdau Israel ga hegwangpei ge de gah. Mi hangge ge kecu pedwa gade petaube keheibe de teila.

7 Cu Judah ga Bethlehem namdi gade rehangme ge bamla, Judah kelak gade, nah pa au Levime ge. Pa cika gwang lunghbam la. 8 Mipei de namdi gade tetdi, Judah ga Bethlehem gade pa ngau kelu heni kehei gade lungh kerane. Pa mbeuh gwang keladau Ephraim hangdeutu deudi ga Micah kiga gwanglu. 9 Micah pe dage keteudi, "Nang dai gade gwangla no?" Pa pe dage keligai, "Ih au Levime ge Judah ga Bethlehem gade gwanglie, nah Ih au heni ngaulu kebui kehei gade Ih lungh kera mie lalie." 10 Micah pe dage rangdi, "A da bamlu, delwe acu keledeube nah cingkupei lulo. Ih ncu mmi ge rangkanggeu kerei nah paihenidung nah nang teu maikesiabe peu zie." Cine Levime pei de pa kerang de luulu delwe pe ki ga nlütdi. 11 Cine Levime pei de cipaude de ngngwa bam neudi, nah rehangbe de pe napeime ge nzwa tei eh bamdi. 12 Micah Levime pei de pe cingku kedetlu nah rehangbe de Micah kiga lunghdi. 13 Pecai Micah rangdi, "Cu au RAMPAUBE a ziemne ngkiengkelu peu zie Ih cibam, Ih au Levime pei aide teu a cingkupei ge tei kelune."